തൊടുപുഴയില്‍ വീണ്ടും ഉരുള്‍പൊട്ടല്‍, ആളപായമില്ല

തൊടുപുഴ: ഇടുക്കി ജില്ലയിലെ തൊടുപുഴയ്ക്കടുത്ത ഉടുമ്പന്നൂരില്‍ വീണ്ടും ഉരുള്‍പൊട്ടല്‍. ജൂലായ് 10 ചൊവാഴ്ച രാവിലെ ഏഴരയ്ക്കു ശേഷമാണ് വീണ്ടും ഉരുള്‍പൊട്ടലുണ്ടായത്. ആളപായമില്ലെന്നാണ് ആദ്യ റിപ്പോര്‍ട്ടുകള്‍ സൂചിപ്പിക്കുന്നത്.

തിങ്കളാഴ്ച ഉണ്ടായ ഉരുള്‍പൊട്ടലില്‍പ്പെട്ട് കാണാതായവര്‍ക്കു വേണ്ടി തിരച്ചില്‍ നടത്തുന്നതിനിടയിലാണ് വീണ്ടും ഉരുള്‍പൊട്ടിയത്. തിങ്കളാഴ്ചത്തെ ഉരുള്‍പൊട്ടലില്‍ മലയാള മനോരമ ഫോട്ടോഗ്രാഫര്‍ വിക്ടര്‍ ജോര്‍ജ് ഉള്‍പ്പെടെ നാലു പേരെ കാണാതായിരുന്നു. ഇവര്‍ക്കു വേണ്ടിയുള്ള തിരച്ചില്‍ ഇപ്പോഴും തുടരുകയാണ്.

ചൊവാഴ്ച രാവിലെ വിക്ടര്‍ ജോര്‍ജ് ഉപയോഗിച്ച ക്യാമറയും ഫിലിം റോളുകളും കണ്ടു കിട്ടിയിട്ടുണ്ട്. മൂടല്‍മഞ്ഞും മോശമായ കാലാവസ്ഥയും കാരണം രാവിലെത്തന്നെ തിരച്ചില്‍ തുടങ്ങാന്‍ കഴിഞ്ഞിരുന്നില്ല. കൊച്ചിയില്‍ നിന്ന് നാവികസേനയുടെ സംഘം എത്തിയതിനു ശേഷമാണ് തിരച്ചില്‍ തുടങ്ങിയത്.

കനത്ത കാലവര്‍ഷത്തെത്തുടര്‍ന്ന് ഒറ്റപ്പെട്ടുപോയ ഇടുക്കിയില്‍ വാഹനഗതാഗതം പുനസ്ഥിക്കാനുള്ള തീവ്രശ്രമങ്ങള്‍ തുടരുന്നു.