കമ്മിഷണര്‍ക്കെതിരെ നടപടി വേണം: കരുണാകരന്‍

കൊച്ചി: കോഴിക്കോട് ഡിസിസി പ്രസിഡന്റിനെ അസമയത്ത് അറസ്റ് ചെയ്ത സിറ്റി പൊലീസ് കമ്മിഷണര്‍ക്കെതിരെ അന്വേഷണം നടത്താതെ നടപടി സ്വീകരിക്കണമെന്ന് മുതിര്‍ന്ന കോണ്‍ഗ്രസ് നേതാവ് കെ. കരുണാകരന്‍ ആവശ്യപ്പെട്ടു.

സംഭവത്തിന്റെ മുഴുവന്‍ ഉത്തരവാദിത്തവും ഡിഐജി ഏറ്റെടുത്ത നിലക്ക് കുറിച്ച് ഇനിയൊരു അന്വേഷണം ആവശ്യമില്ല. കമ്മിഷണര്‍ക്കെതിരെ എന്തു നടപടിയാണ് സ്വീകരിക്കേണ്ടതെന്ന് മുഖ്യമന്ത്രിയാണ് തീരുമാനിക്കേണ്ടതെന്ന് കരുണാകരന്‍ പറഞ്ഞു. നവംബര്‍ മൂന്ന് ശനിയാഴ്ച കൊച്ചിയിലെ വസതിയില്‍ വാര്‍ത്താ ലേഖകരോട് സംസാരിക്കുകയായിരുന്നു അദ്ദേഹം.

അറസ്റ് സംബന്ധിച്ച് സുപ്രിം കോടതി ഉത്തരവില്‍ പറയുന്ന വ്യവസ്ഥകള്‍ ലംഘിച്ചുകൊണ്ടാണ് വീരാന്‍കുട്ടിയെ അറസ്റ് ചെയ്തത്. പ്രശ്നത്തില്‍ മുഖ്യമന്ത്രി തന്റെ ഉത്തരവാദിത്തം നിറവേറ്റണം.

പാര്‍ട്ടി പ്രവര്‍ത്തകര്‍ക്കെതിരെ പൊലീസിന്റെ ഇത്തരം കുതിരകയറ്റമുണ്ടായാല്‍ പാര്‍ട്ടി പ്രവര്‍ത്തനം എങ്ങനെ മുന്നോട്ടുകൊണ്ടുപോവുമെന്ന് കരുണാകരന്‍ ചോദിച്ചു.

സര്‍ക്കാരിന് ആറ് മാസം സമയം തരണമെന്ന് മുഖ്യമന്ത്രി പറഞ്ഞിരുന്നതുകൊണ്ട് സര്‍ക്കാരിന്റെ പ്രവര്‍ത്തനത്തെ കുറിച്ച് താന്‍ ഇപ്പോള്‍ ഒന്നും പറയുന്നില്ല. ആറ് മാസം പൂര്‍ത്തിയാവാന്‍ ഇനി ഒരാഴ്ച കൂടിയുണ്ട്. എങ്കിലും സര്‍ക്കാരിന്റെ പ്രവര്‍ത്തനത്തില്‍ കാര്യമായ പുരോഗതിയൊന്നും കാണുന്നില്ലെന്ന് കരുണാകരന്‍ പറഞ്ഞു.