മോഡിയ്ക്ക് സുപ്രിം കോടതി വിമര്‍ശനം

ദില്ലി: ബെസ്റ് ബേക്കറി കേസിലെ ഗുജറാത്ത് സര്‍ക്കാരിന്റെ നിലപാടിനെ സുപ്രിം കോടതി നിശിതമായി വിമര്‍ശിച്ചു.

പൗരന്‍മാര്‍ക്ക് സംരക്ഷണം നല്‍കാന്‍ കഴിയില്ലെങ്കില്‍ സര്‍ക്കാരിന് അധികാരത്തില്‍ തുടരാന്‍ അവകാശമില്ലെന്ന് ചീഫ് ജസ്റിസ് വി. എന്‍. ഖുരെ, ജസ്റിസുമാരായ ബ്രിജേഷ് കുമാര്‍ എസ്. ബി. സിന്‍ഹ എന്നിവരുള്‍പ്പെട്ടെ ബെഞ്ച് ഗുജറാത്ത് സര്‍ക്കാരിനെ ഓര്‍മിപ്പിച്ചു.

കേസിലെ പ്രതികളെ കുറ്റവിമുക്തമാക്കിയതിനെതിരെ ഹൈക്കോടതിയില്‍ സര്‍ക്കാര്‍ നല്‍കിയ ഹര്‍ജി കണ്‍കെട്ട് മാത്രമാണെന്ന് സുപ്രിം കോടതി പറഞ്ഞു. എന്താണ് സര്‍ക്കാര്‍ ചെയ്യേണ്ട രാജധര്‍മം? കുറ്റവാളികളെ പ്രോസിക്യൂട്ട് ചെയ്യാന്‍ കഴിയുന്നില്ലെങ്കില്‍ സര്‍ക്കാര്‍ രാജിവയ്ക്കണം. ആരെയും വിചാരണ ചെയ്യാതിരിക്കുക എന്നതല്ല ജനാധിപത്യത്തിന്റെ അര്‍ഥം.- സുപ്രിം കോടതി ചൂണ്ടിക്കാട്ടി.

ബെസ്റ് ബേക്കറി കേസിലെയും മറ്റ് കേസുകളിലെയും സാക്ഷികള്‍ക്ക് സംരക്ഷണം നല്‍കണമെന്ന് ആവശ്യപ്പെട്ട് ദേശീയ മനുഷ്യാവകാശ കമ്മിഷനും സാക്ഷിയായ സഹീറ ഷെയ്ക്കും നല്‍കിയ ഹര്‍ജികളിന്‍മേല്‍ വാദം കേള്‍ക്കവെയാണ് സുപ്രിം കോടതി ഗുജറാത്ത് സര്‍ക്കാരിനെതിരെ വിമര്‍ശനം നടത്തിയത്.

ബെസ്റ് ബേക്കറി, ഗോദ്ര കൂട്ടക്കൊല കേസുകളിലും കലാപവുമായി ബന്ധപ്പെട്ട മറ്റ് കേസുകളിലും ഒരു സ്വതന്ത്ര പ്രോസിക്യൂട്ടിംഗ് ഏജന്‍സിയെ നിയോഗിക്കാന്‍ ഗുജറാത്ത് സര്‍ക്കാരിനോട് കോടതി നിര്‍ദേശിച്ചു.