രാജ്യസഭ സീറ്റ്‌ :ചാണ്ടിയും ചെന്നിത്തലയും ദില്ലിയില്‍

ദില്ലി: ഒഴിവ്‌ വരുന്ന രാജ്യസഭാ സീറ്റ്‌ സംബന്ധിച്ചുള്ള ചര്‍ച്ചകള്‍ക്കായി പ്രതിപക്ഷ നേതാവ്‌ ഉമ്മന്‍ ചാണ്ടിയും കെപിസിസി പ്രസിഡന്റ്‌ രമേശ്‌ ചെന്നിത്തലയും ദില്ലിയിലെത്തി. കോണ്‍ഗ്രസ്‌ ഹൈക്കമാന്‍ഡിന്റെ നിര്‍ദ്ദേശപ്രകാരമാണ്‌ ഇരുവരും ദില്ലിയിലെത്തിയിരിക്കുന്നത്‌.

കഴിഞ്ഞ അഞ്ച്‌ തവണ കോണ്‍ഗ്രസിന്‌ വിട്ടുകൊടുത്ത സീറ്റ്‌ ഇത്തവണ തങ്ങള്‍ക്ക്‌ വേണമെന്ന കേരള കോണ്‍ഗ്രസ്‌ എമ്മിന്റെ നിലപാടാണ്‌ പ്രശ്‌നങ്ങള്‍ സൃഷ്ടിച്ചിരിയ്‌ക്കുന്നത്‌. കോണ്‍ഗ്രസ്‌ അധ്യക്ഷ സോണിയ ഗാന്ധിയെക്കണ്ട്‌ കെ.എം മാണി ഇക്കാര്യം ആവര്‍ത്തിച്ച്‌ ആവശ്യപ്പെടുകയും ചെയ്‌തിരുന്നു.

കോണ്‍ഗ്രസിന്റെ രണ്ട്‌ രാജ്യസഭാംഗങ്ങളുടെയും കാലാവധി കഴിയാനിരിയ്‌ക്കെ സീറ്റ്‌ ഇത്തവണയും കോണ്‍ഗ്രസ്‌ ഏറ്റെടുക്കാന്‍ തന്നെയാണ്‌ സാധ്യത. പാര്‍ട്ടിയ്‌ക്കുള്ളില്‍ സീറ്റ്‌ മോഹികള്‍ ഒട്ടേറെ പേര്‍ ഉണ്ടെന്നതിനാല്‍ അക്കാര്യത്തിലും ഹൈക്കമാന്‍ഡിന്‌ തീരുമാനമെടുക്കേണ്ടി വന്നേക്കും.

ഐ ഗ്രൂപ്പ്‌ നേതൃത്വത്തെ പ്രതിനിധീകരിച്ച്‌ നേരത്തെ സോണിയയെ സന്ദര്‍ശിച്ച പദ്‌മജ സീറ്റ്‌ കരുണാകരന്‌ നല്‌കണമെന്ന്‌ ആവശ്യപ്പെട്ടിരുന്നു. എന്നാല്‍ രമേശ്‌ ചെന്നിത്തല, വയലാര്‍ രവി, വി എം. സുധീരന്‍ എന്നിവരില്‍ ആരെങ്കിലും സ്ഥാനാര്‍ത്ഥിയാകുമെന്നാണ്‌ കരുതപ്പെടുന്നത്‌. കേരളാ കോണ്‍ഗ്രസ്‌ എമ്മിന്‌ അടുത്ത തവണ സീറ്റ്‌ നല്‌കാമെന്ന പരസ്യ പ്രസ്‌താവനയും ഉണ്ടായേക്കും.