ഇന്ദുവിന്റെ മൃതദേഹം പെരിയാറില് നിന്നു കണ്ടെത്തി
ആലുവ ചെങ്ങമനാട് കണ്ടന്തുരുത്തില് വ്യാഴാഴ്ച വൈകീട്ട് 5 മണിയോടെ മത്സ്യത്തൊഴിലാളികളാണ് പുഴയില് യുവതിയുടെ മൃതദേഹം കണ്ടത്. പുഴയില് കമിഴ്ന്നുകിടക്കുന്ന നിലയില് ആയിരുന്നു മൃതദേഹം.
മത്സ്യത്തൊഴിലാളികള് വിവരമറിയിച്ചതനുസരിച്ച് ഇന്ദുവിനായി തിരച്ചില് നടത്തിക്കൊണ്ടിരുന്ന പോലീസ്സംഘം സ്ഥലത്തെത്തി. യുവതിയുടെ മൃതദേഹം കരയ്ക്കുകയറ്റുകയായിരുന്നു.
രാത്രി 8 മണിയോടെ ഇന്ദുവിന്റെ പിതൃസഹോദരന്മാരായ ഗോപിനാഥന്നായര്, മുരളീധരന്നായര്, അമ്മാവന് രാധാകൃഷ്ണന്നായര് എന്നിവര് സ്ഥലത്തെത്തി മൃതദേഹം തിരിച്ചറിഞ്ഞു. ഇന്ദുവിനെ തീവണ്ടിയില് നിന്നു കാണാതാകുമ്പോള് ധരിച്ചിരുന്ന പച്ചനിറത്തിലുള്ള ചുരിദാറും വൈറ്റ്മെറ്റല് കൊണ്ടുള്ള പാദസരവും ആഭരണങ്ങളും തന്നെയാണ് മൃതദേഹത്തിലുണ്ടായിരുന്നത്.
ഏപ്രില് 24ന് ഞായറാഴ്ച രാത്രി തിരുവനന്തപുരം മംഗലാപുരം തീവണ്ടിയില് യാത്ര ചെയ്യുന്നതിനിടെയാണ് ഇന്ദുവിനെ കാണാതായത്.
കായംകുളത്തിനും കുറ്റിപ്പുറത്തിനും ഇടയില് എവിടെയോ വെച്ചാണ് ഇന്ദുവിനെ കാണാതായതെന്ന് ഒപ്പം യാത്ര ചെയ്തിരുന്ന സഹപ്രവര്ത്തകനായ സുഭാഷില് നിന്ന് പോലീസിന് വിവരം ലഭിച്ചിരുന്നു. ഇതേതുടര്ന്ന് ആലുവ റെയില്വേ പാലത്തിനുകീഴെ പെരിയാറില് തിരച്ചില് നടത്താന് റെയില്വേപോലീസിന് നിര്ദേശം കൊടുത്തു.
ഇതിനിടെ ബുധനാഴ്ച യുവതിയുടെ മൃതദേഹം ആലുവ തുരുത്ത് ഭാഗത്ത് പെരിയാറില് കണ്ടതായി ഒരാള് പോലീസിനെ അറിയിച്ചിരുന്നു. ഈ വിവരത്തിന്റെ പശ്ചാത്തലത്തില് പൊലീസ് വിപുലമായ തിരച്ചില് നടത്തിയിരുന്നു.
വെള്ളിയാഴ്ച ഇന്ക്വസ്റ്റ് നടപടികള് പൂര്ത്തിയാക്കി മൃതദേഹം ആലപ്പുഴ മെഡിക്കല് കോളേജില് പോസ്റ്റ്മോര്ട്ടം നടത്തിയശേഷം ബന്ധുക്കള്ക്ക് വിട്ടുകൊടുക്കും.
Click it and Unblock the Notifications
Sign in with Google