സെന്നിനെതിരായ ഇംപീച്ച്‌മെന്റ് പ്രമേയം പാസായി

ദില്ലി: സാമ്പത്തിക ക്രമക്കേടിന്റെ പേരില്‍ ആരോപണ വിധേയനായ കൊല്‍ക്കത്ത ഹൈക്കോടതി ജഡ്ജി സൗമിത്രസെന്നിന്റെ ഇംപീച്ച്‌മെന്റ് പ്രമേയം രാജ്യസഭ പാസാക്കി. 189 അംഗങ്ങള്‍ പ്രമേയത്തെ അനുകൂലിച്ചു. 17 അംഗങ്ങളാണ് എതിര്‍ത്ത് വോട്ട് ചെയ്തു. ബിഎസ്പി അംഗങ്ങളാണ് എതിര്‍ത്ത് വോട്ട് ചെയ്തത്.

സ്വതന്ത്രഇന്ത്യയുടെ ചരിത്രത്തില്‍ ആദ്യമായാണ് രാജ്യസഭയില്‍ ജഡ്ജിയെ ഇംപീച്ച് ചെയ്യുന്നത്. സിപിഎം പൊളിറ്റ് ബ്യൂറോ അംഗം സീതാറാം യെച്ചൂരിയുടെ നേതൃത്വത്തില്‍ 57 സഭാംഗങ്ങള്‍ സമര്‍പ്പിച്ച കുറ്റവിചാരണാ നോട്ടീസിന്റെ അടിസ്ഥാനത്തില്‍ രാജ്യസഭാ ചെയര്‍മാന്‍ ഹമീദ് അന്‍സാരി അന്വേഷണത്തിനായി മൂന്നംഗ സമിതിയെ നിയോഗിക്കുകയായിരുന്നു. ഈ സമിതി സെന്‍ കുറ്റക്കാരനാണെന്ന് കണ്ടെത്തുകയായിരുന്നു.

പെരുമാറ്റ ദൂഷ്യത്തിന്റെ പേരില്‍ ഹൈക്കോടതിയിലേയോ സുപ്രീംകോടതിയിലേയോ ജഡ്ജിമാരെ പുറത്താക്കണമെന്നുള്ള പ്രമേയം പാര്‍ലമെന്റിന്റെ ഇരുസഭകളും മൂന്നില്‍ രണ്ട് ഭൂരിപക്ഷത്തോടെ അംഗീകരിക്കുകയാണെങ്കില്‍ രാഷ്ട്രപതിക്ക് ഇവരെ പുറത്താക്കാമെന്നാണ് ഭരണഘടന അനുശാസിക്കുന്നത്.

English summary

Impeachment motion against Soumitra Sen was passed by Rajya Sabha