വരാപ്പുഴ പീഡനം: ശോഭയുടെ ഇടനിലക്കാര് ഒളിവില്
കൊച്ചി: വരാപ്പുഴ പെണ്വാണിഭത്തില് പെണ്കുട്ടിയെ ഉന്നതര്ക്ക് കാഴ്ചവെയ്ക്കാനായി ശോഭ ജോണിന്റെ ഇടനിലക്കാരായി പ്രവര്ത്തിച്ച ബാങ്ക് മാനേജരും ഭാര്യയും ഒളിവില്.
ശോഭ ജോണ് പിടിയിലായതോടെ തിരുവനന്തപുരം സ്വദേശികളായ ഇവര് പോലീസിനെ വെട്ടിച്ച് ബാംഗ്ലൂരിലേക്ക് കടന്നതായി അന്വേഷണ സംഘത്തിനു വിവരം ലഭിച്ചു. പ്രതിപ്പട്ടികയിലുള്പ്പെട്ട ബാങ്ക് മാനേജര് പെണ്കുട്ടിയെ പീഡിപ്പിച്ചിട്ടുണ്ടെന്നാണ് പൊലീസിന് ലഭിച്ചിരിക്കുന്ന വിവരം.
ബാംഗ്ലൂര് അല്സൂര്ലേക്കിലെ ഒരു ഫഌറ്റില്വച്ചാണ് പെണ്കുട്ടിയെ ഒട്ടേറെപ്പേര്ക്ക് കാഴ്ചവച്ചത്. ശോഭ ജോണിനെ ഇവിടെയെത്തിച്ച് പോലീസ് തെളിവെടുത്തിരുന്നു. കര്ണാടകക്കാരും ഹിന്ദിക്കാരുമുള്പ്പെടെ ഒട്ടേറെപേര് ഇവിടെവച്ച് പെണ്കുട്ടിയെ പീഡിപ്പിച്ചെന്ന് വ്യക്തമായിട്ടുണ്ട്. ഇവരെ പിടികൂടാനുള്ള ശ്രമത്തിലാണ് പോലീസ്.
ഇതിനിടെ കേസില് കായംകുളം സ്വദേശിയായ ഗോപി എന്ന ബിസിനസുകാരനെ വ്യാഴാഴ്ച പോലീസ് അറസ്റ്റ് ചെയ്തു. ശോഭ ജോണിന്റെ ഇടനിലക്കാരിയായ രാധാലക്ഷ്മി മുഖാന്തരമാണ് ഇയാള് പെണ്കുട്ടിയെ പീഡിപ്പിച്ചത്.
ശോഭ ജോണ് പിടിയിലായി ദിവസങ്ങള് കഴിഞ്ഞിട്ടും കേസില് നിര്ണായക വഴിത്തിരിവുകളൊന്നും ഉണ്ടാക്കാന് പോലീസിനു കഴിയാത്തത് സംശയങ്ങള്ക്കിടയാക്കിയിട്ടുണ്ട്. ഒട്ടേറെ ഫോണ് നമ്പറുകള് രേഖപ്പെടുത്തിയിട്ടുള്ള എട്ടു പോക്കറ്റ് ഡയറികളും ആറ് സിം കാര്ഡുകളും ലഭിച്ചിട്ടും പത്തോളം പേരെ മാത്രമാണ് പോലീസിന് ഇതുവരെ പിടികൂടാനായത്.
ശോഭ ഉന്നതര്ക്ക് സംഭവത്തില് പങ്കുണ്ടെന്ന് വെളിപ്പെടുത്തിയിരുന്നു. കേസില് കൂടുതല് അറസ്റ്റുണ്ടാകാത്തത് ഇതുമായി ചേര്ത്ത് വായിക്കപ്പെടുകയാണ്.
ശോഭ ജോണിനെയും ബെച്ചു റഹ്മാനെയും കൂട്ടാളികളെയും പിടികൂടിയ പറവൂര് സി.ഐ. അബ്ദുള് സലാമിനെ അന്വേഷണച്ചുമതലയില് നിന്നും ആദ്യമേ തന്നെ മാറ്റിയതോടെ അന്വേഷണത്തിന്റെ ഗതിമാറിയെന്ന് ആക്ഷേപമുയര്ന്നിരുന്നു. ഇതു ശരിവയ്ക്കുന്ന വിധത്തിലാണ് അന്വേഷണ സംഘത്തിന്റെ നടപടികള്.