മന്ത്രി കെസി ജോസഫിന്റെ കാറിടിച്ച് 2 മരണം
ഞായറാഴ്ച വൈകിട്ട് 7.15ന് ദേശീയപാതയില് കരയാംപറമ്പ് സെന്റ് ജോസഫ് പള്ളിക്കുമുന്നിലായിരുന്നു അപകടം. ചാലക്കുടിയിലെ ഡിവൈന് ധ്യാനകേന്ദ്രത്തിലെ ചടങ്ങില് പങ്കെടുത്ത് മന്ത്രി ദില്ലിയ്ക്ക് പോകാന് നെടുമ്പാശേരി വിമാനത്താവളം ലക്ഷ്യമാക്കി അതിവേഗത്തില് കാറില് പോകുമ്പോഴായിരുന്നു അപകടം.
റോഡ് മുറിച്ചുകടക്കുകയായിരുന്ന മൂവരേയും ഇടിച്ച് തെറിപ്പിച്ച കാര് 50 മീറ്ററോളം മുന്നോട്ടുപാഞ്ഞാണ് നിന്നത്. ഇടിയുടെ ആഘാതത്തില് ജോര്ജ് ഇടതുവശത്തേക്കും വിജയന് വലതുവശത്തേക്കും തെറിച്ചുവീഴുകയായിരുന്നു. തോമസ് എബ്രഹാം മീഡിയനിലേക്കാണ് തെറിച്ചുവീണത്.
ജോര്ജിനെയും വിജയനെയും ആശുപത്രിയിലേക്കു കൊണ്ടുപോയെങ്കിലും വഴിമധ്യേ മരിച്ചു. പരിക്കേറ്റ തോമസ് എബ്രഹാം എല്എഫ് ആശുപത്രിയില് ചികിത്സയിലാണ്.
മന്ത്രിയുടെ വാഹനത്തിന്റെ അമിതവേഗമാണ് അപകടത്തിന് കാരണമെന്നാരോപിച്ച് കരയാംപറമ്പില് നാട്ടുകാരും സിപിഐ എം പ്രവര്ത്തകരും അരമണിക്കൂറോളം റോഡ് ഉപരോധിച്ചു. പിന്നീട് കൂടുതല് പൊലീസ് എത്തിയാണ് പ്രതിഷേധക്കാരെ ഒഴിപ്പിച്ചത്.