എന്‍എസ്എസിന്റെ കളി മുരളിയെ മന്ത്രിയാക്കാന്‍?

തിരുവനന്തപുരം: കെബി ഗണേഷ് കുമാര്‍ രാജിവച്ച മന്ത്രിപദവിയിലേയ്ക്ക് കെ മുരളീധരനെ എത്തിക്കാന്‍ എന്‍എസ്എസ് കരുനീക്കമെന്ന് സൂചന. മുഖ്യമന്ത്രി ഉമ്മന്‍ചാണ്ടിയ്ക്കും കെപിസിസി പ്രസിഡന്റ് രമേശ് ചെന്നിത്തലയ്ക്കും മുരളിയെ മന്ത്രിയാക്കുന്നതിനോട് യോജിപ്പില്ല. പക്ഷേ ഇക്കാര്യത്തില്‍ എന്‍എസ്എസിന്റെ നിലപാട് പൂര്‍ണമായും തള്ളാന്‍ കോണ്‍ഗ്രസിന് കഴിയുകയുമില്ല. ഈ അവസരം മുതലെടുത്ത് ആദ്യം ഗണേഷിനെത്തന്നെ മന്ത്രിയാക്കണമെന്ന് ആവശ്യമുന്നയിച്ച് ഈ സ്ഥാനത്തേയ്ക്ക് മുരളിയെ എത്തിക്കാനാണ് എന്‍എസ്എസ് ശ്രമമെന്നാണ് സൂചന.

ദുഷ്‌പേരുമൂലം മന്ത്രിസ്ഥാനം നഷ്ടപ്പെട്ട ഗണേഷിനെ തിരിച്ച് മന്ത്രിസഭയിലെത്തിയ്ക്കുകയെന്ന പരീക്ഷണത്തിന് കോണ്‍ഗ്രസ് മുതിരില്ലെന്നകാര്യം ഏതാണ്ട് ഉറപ്പാണ്. കേരള കോണ്‍ഗ്രസ് ബിയ്ക്കും ആര്‍ ബാലകൃഷ്ണപിള്ളയ്ക്കും ഇക്കാര്യത്തില്‍ യോജിപ്പുമില്ല. അപ്പോള്‍ മറ്റൊരാളെ മന്ത്രിസ്ഥാനത്തേയ്ക്ക് നിര്‍ദ്ദേശിയ്ക്കാന്‍ കോണ്‍ഗ്രസിന് എന്‍എസ്എസിനോട് ആവശ്യപ്പെടേണ്ടിവരും. ആ അവസരത്തില്‍ മുരളിയുടെ പേര് പറയുകയെന്ന തന്ത്രമാണ് എന്‍എസ്എസിന്റേതെന്നാണ് കരുതപ്പെടുന്നത്.

ഇപ്പോള്‍ത്തന്നെ എന്‍എസ്എസും കോണ്‍ഗ്രസും അകല്‍ച്ചയിലാണ്. ഇത് കൂട്ടാതിരിക്കാന്‍ കോണ്‍ഗ്രസ് ശ്രമിയ്ക്കുമെന്നകാര്യവും ഉറപ്പാണ്. മുരളിയെ മന്ത്രിയാക്കുന്നതിനോട് വെള്ളാപ്പള്ളി നടേശനും അനുകൂലമനോഭാവമാണത്രേ. ഗണേഷിന് വേണ്ടി വാദിച്ച് മുരളിയ്ക്ക് വേണ്ടി വഴിയൊരുക്കുകയെന്ന തന്ത്രമാണ് എന്‍എസ്എസ് പയറ്റുന്നതെന്നാണ് രാഷ്ട്രീയ നിരീക്ഷകര്‍ കരുതുന്നത്.

English summary

NSS trying to place K Muraleedharan as cabinet member