സ്ത്രീധന പീഡനം: ഭർത്താവും ഭർതൃമാതാവും കൊല്ലുമെന്ന് ഭീഷണിപ്പെടുത്തുന്നു, പോലീസിൽ പരാതിപ്പെട്ട് യുവതി

ആലപ്പുഴ: സ്ത്രീധനത്തിന്റെ പേരിൽ ഭർത്താവും ഭർതൃവീട്ടുകാരും ചേർന്ന് പീഡിപ്പിക്കുന്നതായി യുവതിയുടെ പരാതി. സൈനികനായ ഭർത്താവും ഭർത്താവിന്റെ അമ്മയും ചേർന്ന് തന്നെ പീഡിപ്പിക്കുന്നുവെന്നാണ് പരാതിയിൽ പറയുന്നത്. മണ്ണഞ്ചേരി അമ്പലക്കടവ് പണ്ടാരപ്പാട്ടത്തിൽ കിരൺ കുമാർ (26), അമ്മ ഗീത (46) എന്നിവർക്കെതിരെയാണ് അമൃത എന്ന 26കാരി പരാതി നൽകിയിട്ടുള്ളത്. മണ്ണഞ്ചേരി പോലീസിൽ പരാതി നൽകിയതിന് പുറമേ ജില്ലാ പോലീസ് മേധാവിക്കും പരാതി നൽകിയിട്ടുണ്ട്.

പ്രണയത്തിലായിരുന്ന കിരൺകുമാറും അമൃതയും 2019 ഏപ്രിൽ 24നായിരുന്നു വിവാഹിതരാകുന്നത്. കരസേന ഉദ്യോഗസ്ഥനാ കിരണിനും അമൃതയ്ക്കും ഒരു വയസ്സ് പ്രായമുള്ള പെൺകുട്ടിയുമുണ്ട്. അമൃതയുടെ വീട്ടുകാർ നൽകിയ സ്ത്രീധനം കുറഞ്ഞുപോയെന്ന പേരിൽ വിവാഹ ശേഷം ഇരുവരും ചേർന്ന് തന്നെ നിരന്തരം മർദ്ദിക്കുകയും കൊലപ്പെടുത്തുമെന്ന് ഭീഷണിപ്പെടുത്തുകയാണെന്നും അമൃത പരാതിയിൽ പറയുന്നു.

മണ്ണഞ്ചേരി പഞ്ചായത്തിലെ കായച്ചിറയിൽ അനിമോന്റെ മകളാണ് അമൃത. വിവാഹ സയത്ത് 37 പവൻ സ്വർണ്ണത്തിന് പുറമേ മൂന്ന് ലക്ഷം രൂപയും അനിമോൻ മകൾക്ക് നൽകിയിരുന്നു. എന്നാൽ പണയം വെക്കാനെന്ന പേരിൽ കൊണ്ടുപോയി തന്റെ അനുമതിയില്ലാതെ സ്വർണ്ണം മുഴുവൻ വിറ്റുവെന്നും അമൃത പറയുന്നു.

നേരത്തെ ഇത്തരത്തിൽ പ്രശ്നമുണ്ടായതോടെ കോടതി ഇടപെട്ടിരുന്നു. അമൃതയ്ക്കും കുഞ്ഞിനും സംരക്ഷണം നൽകാൻ ഉത്തരവിടുകയും ചെയ്തിരുന്നു. എന്നാൽ കോടതി വിധിയ്ക്ക് ശേഷവും തന്നെ മർദ്ദിച്ചിരുന്നുവെന്നാണ് യുവതി പറയുന്നു. ലോക്കൽ പോലീസ് തന്റെ പരാതിയിൽ നടപടിയെടുക്കാത്ത സാഹചര്യത്തിലാണ് ആലപ്പുഴ ജില്ലാ പോലീസ് മേധാവിയ്ക്ക് നേരിട്ട് പരാതി നൽകിയിട്ടുള്ളതെന്നും അവർ ചൂണ്ടിക്കാണിക്കുന്നു.

English summary

Alappuzha: Woman complaint about dowry harassment against husband and mother in law