ആലപ്പുഴയില്‍ സഹോദരി ഭര്‍ത്താവിന്റെ വീട്ടില്‍ യുവതി മരിച്ചനിലയില്‍; കൊലപാതകമെന്ന് സംശയം

ആലപ്പുഴ: ആലപ്പുഴയില്‍ യുവതിയെ വീടിനുള്ളില്‍ മരിച്ച നിലയില്‍ കണ്ടെത്തി. കടക്കര പള്ളി തളിശേരിതറ ഹരികൃഷ്ണ (25) എന്ന യുവതിയെ സഹോദരി ഭര്‍ത്താവിന്റെ വീട്ടിലാണ് മരിച്ച നിലയില്‍ കണ്ടെത്തിയത്. സംഭവത്തെ തുടര്‍ന്ന് സഹോദരി ഭര്‍ത്താവ് കടക്കര പള്ളി പുത്തന്‍കാട്ടില്‍ രതീഷിനെ പൊലീസ് തിരയുകയാണ്. മരണപ്പെട്ട ഹരികൃഷ്ണ അവിവാഹിതയാണ്. ആലപ്പുഴ മെഡിക്കല്‍ കോളേജില്‍ താല്‍ക്കാലിക നഴ്‌സായി ജോലി നോക്കുകയായിരുന്നു.

എറണാകുളത്തെ സ്വകാര്യ ആശുപത്രിയിലെ നഴ്‌സാണ് ഹരികൃഷ്ണയുടെ സഹോദരി. വെള്ളിയാഴ്ച രാത്രി സഹോദരിക്ക് ജോലിയുണ്ടായതിനെ തുടര്‍ന്ന് രതീഷ് കുഞ്ഞിനെ നോക്കാന്‍ ഹരികൃഷ്ണയെ വീട്ടിലേക്ക് വിളിച്ചുകൊണ്ടു പോകുകയായിരുന്നെന്നാണ് പ്രാഥമിക നിഗമനം. ഹരികൃഷ്ണയെയും രതീഷിനെയും ഫോണില്‍ വിളിച്ച് കിട്ടാത്തതിനെ തുടര്‍ന്ന് നടത്തിയ അന്വേഷണത്തിലാണ് മൃതദേഹം കണ്ടെത്തിയത്.

പട്ടണക്കാട് പൊലീസ് കേസെടുത്ത് അന്വേഷണം ആരംഭിച്ചിരിക്കുകയാണ്. കാണാനില്ലെന്ന് പരാതി ലഭിച്ചതിനെ തുടര്‍ന്ന് നടത്തിയ അന്വേഷണത്തിലാണ് ഹരികൃഷ്ണയെ മരിച്ച നിലയില്‍ കണ്ടെത്തിയത്.

English summary

Woman found dead at sister's husband's house in Alappuzha, Suspicion of murder