പഞ്ചായത്ത് യോഗത്തിന് പോയി തിരിച്ചെത്താന്‍ വൈകി; വൈസ് പ്രസിഡന്റിന്റെ മുഖത്ത് ഭര്‍ത്താവ് ആസിഡൊഴിച്ചു

By Desk

Updated: Tuesday, August 18, 2020, 21:11 [IST]

തൊടുപുഴ: പഞ്ചായത്ത് വൈസ് പ്രസിഡന്റിന് നേരെ ഭര്‍ത്താവിന്റെ ആസിഡ് ആക്രമണം. പഞ്ചായത്ത് ഭരണ സമിതി യോഗത്തിന് പോയി തിരിച്ചെത്താന്‍ വൈകി എന്നാരോപിച്ചാണത്രെ ഭര്‍ത്താവ് ആസിഡൊഴിച്ചത്. ഇവരെ തൊടുപുഴയിലെ സ്വാകാര്യ ആശുപത്രിയില്‍ പ്രവേശിപ്പിച്ചു. മുരിക്കാശേരി വാത്തിക്കുടിയില്‍ പഞ്ചായത്ത് വൈസ് പ്രസിഡന്റായ ശ്രീജക്ക് നേരെയാണ് ആക്രമണമുണ്ടായത്. ഭര്‍ത്താവ് അനിലിനെ മുരിക്കാശേരി പോലീസ് കസ്റ്റഡിയിലെടുത്തു. ചൊവ്വാഴ്ച ഉച്ചയ്ക്ക് ശേഷമാണ് സംഭവം.

രാവിലെ പഞ്ചായത്ത് യോഗത്തിന് പോയതായിരുന്നു ശ്രീജ. തിരിച്ച് വീട്ടിലെത്തുമ്പോള്‍ ഉച്ച കഴിഞ്ഞിരുന്നു. എന്തുകൊണ്ട് വൈകി എന്ന് ചോദിച്ചായിരുന്നുവത്രെ ആക്രമണം. നേരത്തെ കുടുംബ കലഹം നിലനിന്നിരുന്നുവെന്നും പറയപ്പെടുന്നു. ശ്രീജയുടെ മുഖത്തും കഴുത്തിലുമാണ് ആസിഡ് വീണത്. ശേഷം അവര്‍ തന്നെയാണ് ബന്ധുക്കളെയും പോലീസിനെയും വിവരം അറിയിച്ചത്.

പോലീസെത്തി അനിലിനെ കസ്റ്റഡിയില്‍ എടുക്കുകയായിരുന്നു. ശ്രീജയെ ആദ്യം മുരിക്കാശേരിയിലെ ആശുപത്രിയില്‍ എത്തിച്ചെങ്കിലും പിന്നീട് തൊടുപുഴയിലെ സ്വകാര്യ ആശുപത്രിയിലേക്ക് മാറ്റി. ഇപ്പോള്‍ തൊടുപുഴയിലെ ആശുപത്രിയിലാണുള്ളത്. പരിക്ക് ഗുരുതരമാണെന്നും അല്ലെന്നുമുള്ള വിവരങ്ങള്‍ പുറത്തുവരുന്നുണ്ട്.