ആകെ അറിയാവുന്നത് പേര് മാത്രം; തന്റെ അമ്മയെ തെരഞ്ഞ് സ്വിസ് യുവതി മുംബൈയില്‍

മുംബൈ: സ്വിറ്റ്‌സര്‍ലന്റില്‍ നിന്നുള്ള 44 കാരിയായ സ്ത്രീ തന്റെ അമ്മയെ തേടി മുംബൈയില്‍. ബീന മഖിജാനി മുള്ളര്‍ എന്ന യുവതിയെ 1978 ല്‍ ആണ് മുംബൈയില്‍ നിന്ന് ദത്തെടുത്തത്. 44 വര്‍ഷം മുന്‍പ് വേര്‍പിരിഞ്ഞ അമ്മയുടെ പേര് മാത്രമാണ് ബിനയ്ക്ക് ഓര്‍മയുള്ളത്. റോബെല്ലോ എന്നാണ് അവരുടെ പേര്.

എന്നാല്‍ ഈ ഒരു പേര് മാത്രം വെച്ച് 2011 മുതല്‍ താന്‍ അമ്മയെ തെരയുകയാണ് എന്ന് ബീന മഖിജാനി പറയുന്നു. 1978-ല്‍ മുംബൈയില്‍ വന്ന് എനിക്ക് ജന്മം നല്‍കിയ ഗോവയിലുള്ള റെബെല്ലോ എന്ന പേരുള്ള ഒരു സ്ത്രീയെ ആര്‍ക്കെങ്കിലും അറിയാമെങ്കില്‍, ദയവായി ഞങ്ങളെ ബന്ധപ്പെടുക എന്നാണ് ബീന പറയുന്നത്.

ബീന മഖിജാനി മുള്ളര്‍ സൗത്ത് മുംബൈയിലെ ആശാ സദനിലെ ദത്തെടുക്കല്‍ കേന്ദ്രത്തിലായിരുന്നു ജനിച്ചത്. താമസിയാതെ, അവരെ ദത്തെടുത്ത് സ്വിറ്റ്‌സര്‍ലന്‍ഡിലേക്ക് കൊണ്ടുപോവുകയായിരുന്നു. ബീനയ്ക്ക് 13 ഉം 16 ഉം വയസ്സുള്ള രണ്ട് ആണ്‍മക്കളുണ്ട്.

ഇരുവരും ബീനയോടൊപ്പം മുംബൈയില്‍ വന്നിട്ടുണ്ട്. അതേസമയം മതിയായ രേഖയില്ലാത്തതിനാലാണ് ഇവരെ കണ്ടെത്താന്‍ ബുദ്ധിമുട്ടുന്നത് എന്നാണ് അധികൃതര്‍ പറയുന്നത്. അഡോപ്റ്റി റൈറ്റ്സ് കൗണ്‍സില്‍ പൂനെയുടെ ഡയറക്ടര്‍ അഡ്വക്കേറ്റ് അഞ്ജലി പവാര്‍ ബീനയ്ക്ക് സഹായത്തിനായി ഒപ്പമുണ്ട്.

അതേസമയം ബോംബെ ഹൈക്കോടതിയില്‍ പോയപ്പോഴാണ് ദത്തെടുക്കല്‍ ഏജന്‍സി തങ്ങളോട് സഹകരിക്കാന്‍ തയ്യാറായത് എന്ന് ബീനയുടെ അഭിഭാഷകന്‍ പറയുന്നു. അതേസമയം അമ്മയെ അറിയുന്നവര്‍ ആരെങ്കിലും മുന്നോട്ട് വന്നാല്‍ അവരുടെ ഐഡന്റിറ്റി രഹസ്യമായി സൂക്ഷിക്കുമെന്ന് അഞ്ജലി പവാര്‍ പറഞ്ഞു.

ആരാണ് തന്നെ പ്രസവിച്ചത് എന്നറിയുക എന്നതിലുപരിയായി, എന്തിനാണ് തന്നെ ഉപേക്ഷിച്ചത് എന്നാണ് അറിയേണ്ടത് എന്ന് നിറകണ്ണുകളോടെ ബീന പറയുന്നു. ദൂരവും പണവുമാണ് തനിക്ക് വിലങ്ങ് തടിയാകുന്നത് എന്നും ബീന പറയുന്നു.

English summary

A 44-year-old woman from Switzerland is in Mumbai looking for her mother