മോദി മുസ്ലിങ്ങൾക്കെതിരെ വിദ്വേഷ പരാമർശം നടത്തിയ ഇടം; ബൻസ്വാരയിൽ ബിജെപി തോറ്റത് 2.5 ലക്ഷം വോട്ടിന്

Updated: Friday, June 7, 2024, 15:38 [IST]

ന്യൂഡൽഹി: ഏപ്രിൽ മാസത്തിൽ തിരഞ്ഞെടുപ്പ് പ്രചരണം തകർത്തുമുന്നേറുന്ന വേളയിലാണ് നരേന്ദ്ര മോദി രാജസ്ഥാനിൽ എത്തുന്നത്. അന്ന് ബിജെപി ശക്തമായ പ്രചരണവുമായി ഇന്ത്യ സഖ്യത്തേക്കാൾ ഒരുപടി മുകളിൽ നിൽക്കുന്ന സമയം. രാജസ്ഥാനിലെ ബൻസ്വാരയിൽ വച്ചാണ് അദ്ദേഹം മുസ്ലിങ്ങളെ കുറിച്ച് വിദ്വേഷ പരാമർശം നടത്തുന്നതും വലിയ വിവാദങ്ങളിലേക്ക് വഴിയൊരുക്കുന്നതും.

അതേ ബൻസ്വാര പോളിങ് ബൂത്തിലേക്ക് നടന്നുകയറിയപ്പോൾ ഉള്ളിൽ കണക്ക് കൂട്ടിയത് ആർക്കും അറിയില്ലായിരുന്നു. ഒടുവിൽ ജൂൺ നാലിന് വോട്ടെണ്ണിയപ്പോഴാണ് എന്താണ് ബൻസ്വാരയുടെ മനസ്സിൽ ഒളിപ്പിച്ചതെന്ന് എല്ലാവരും അറിഞ്ഞത്. മോദിയുടെ വിദ്വേഷ പ്രസംഗത്തിന് വേദിയായ ഈ മണ്ഡലത്തിൽ ഏകദേശം രണ്ടര ലക്ഷത്തോളം വോട്ടുകൾക്കാണ് ബിജെപി അതിദയനീയമായി പരാജയപ്പെട്ടത്.

ഇത് ഉത്തരേന്ത്യൻ രാഷ്ട്രീയത്തിലെ മാറുന്ന സങ്കൽപങ്ങളെയും രീതികളെയും ഒക്കെ തുറന്നുകാണിക്കുന്ന ഒരു പരിച്ഛേദമായി നമുക്ക് വേണമെങ്കിൽ കണക്കാക്കാം. നരേന്ദ്ര മോദിയുടെ സ്വന്തം മണ്ഡലമായ വാരണാസിയിൽ ഭൂരിപക്ഷം ഒന്നര ലക്ഷമായി ചുരുങ്ങിയെങ്കിലും ബൻസ്വാരയിലെ വോട്ടർമാരുടെ നിലപാട് വ്യക്തമായിരുന്നു എന്നതും ഇതിനോട് കൂട്ടി വായിക്കേണ്ടതുണ്ട്.

മണ്ഡലത്തിൽ ബിജെപി സ്ഥാനാർത്ഥി മഹേന്ദ്രജീത് സിംഗ് മാളവ്യ ഭാരത് ആദിവാസി പാർട്ടിയുടെ (ബിഎപി) രാജ്‌കുമാർ റോട്ടിനോട് 2,47,054 വോട്ടിന്റെ ഭൂരിപക്ഷത്തിലാണ് പരാജയപ്പെട്ടത്. മുസ്‌ലിങ്ങളെ നുഴഞ്ഞുകയറ്റക്കാരായും 'കൂടുതൽ കുട്ടികളുള്ളവരായും' ഒക്കെ ചിത്രീകരിച്ച നരേന്ദ്ര മോദിയുടെ വിവാദ പ്രസംഗത്തിന് മുഖമടച്ചു കിട്ടിയ മറുപടിയാണ് തിരഞ്ഞെടുപ്പ് ഫലമെന്നാണ് ചിലർ ചൂണ്ടിക്കാണിക്കുന്നത്.

നിങ്ങളുടെ ആസ്‌തി വിവരങ്ങൾ അവർ ശേഖരിക്കുമെന്നും തുടർന്ന് ആ സ്വത്ത് നുഴഞ്ഞുകയറ്റക്കാർക്കും കൂടുതൽ കുട്ടികളുള്ളവർക്കും വിതരണം ചെയ്യുമെന്നും കോൺഗ്രസ് പ്രകടനപത്രികയിൽ പറയുന്നുണ്ടെന്ന് ഏപ്രിൽ 21ന് നടന്ന റാലിയിൽ പ്രധാനമന്ത്രി മോദി ആരോപിച്ചിരുന്നു, ഇതിലൂടെ ലക്ഷ്യമിട്ടത് മുസ്ലിങ്ങളെ ആണെന്ന് പകൽ പോലെ വ്യക്തമായതായി പ്രതിപക്ഷം ആരോപിച്ചു.

രാജ്യത്തിന്റെ സ്വത്തുക്കളിൽ മുസ്ലീങ്ങൾക്കാണ് ആദ്യ അവകാശമെന്ന് മുൻ പ്രധാനമന്ത്രി മൻമോഹൻ സിംഗ് പറഞ്ഞതായി അദ്ദേഹം അവകാശപ്പെടുകയും ചെയ്‌തിരുന്നു. ഇതിന് പിന്നാലെ ഇരുപതിനായിരത്തോളം വരുന്ന ആക്‌ടിവിസ്‌റ്റുകൾ നടപടി വേണമെന്ന് ആവശ്യപ്പെട്ട് തിരഞ്ഞെടുപ്പ് കമ്മീഷനെ സമീപിച്ചെങ്കിലും അവർ അനുകൂലമായല്ല പ്രതികരിച്ചത്.

കോൺഗ്രസും ഏപ്രിൽ 22ന് വിഷയം ചൂണ്ടിക്കാട്ടി തിരഞ്ഞെടുപ്പ് കമ്മീഷന് പരാതി നൽകിയെങ്കിലും അതിലും കൃത്യമായ നടപടി ഉണ്ടായില്ല. പ്രധാനമന്ത്രി നരേന്ദ്ര മോദിക്ക് നോട്ടീസ് അയക്കാനും തിരഞ്ഞെടുപ്പ് കമ്മീഷൻ വിസമ്മതിച്ചിരുന്നു. എന്നാൽ ജനാധിപത്യത്തിലെ അന്തിമ വിധി വോട്ടെടുപ്പ് തന്നെയാണെന്ന് അടിവരയിട്ടുകൊണ്ടാണ് ബൻസ്വാരയിൽ ബിജെപിക്ക് തോൽവി നേരിടേണ്ടി വന്നതെന്നാണ് പ്രതിപക്ഷ പാർട്ടികൾ ഉൾപ്പെടെ ചൂണ്ടിക്കാണിക്കുന്നത്.