മേശയ്ക്കരികില്‍ വേലക്കാരിയെ നിര്‍ത്തി ഭക്ഷണം കഴിച്ച രേണുകാ ചൗധരി വിവാദത്തില്‍

ദില്ലി: കുട്ടിയെ നോക്കുന്ന വേലക്കാരിയെ തൊട്ടടുത്ത് നിര്‍ത്തി റെസ്‌റ്റൊറന്റില്‍ കുടുംബസമേതം ഭക്ഷണം കഴിക്കുന്ന ഒരു വിദേശിയുടെ ചിത്രം കഴിഞ്ഞദിവസങ്ങളില്‍ സോഷ്യല്‍ മീഡിയയില്‍ പ്രചരിച്ചിരുന്നു. കുടുംബം വിഭവസമൃദ്ധമായ ഭക്ഷണം കഴിക്കുമ്പോള്‍ തൊട്ടപ്പുറത്ത് നോക്കിനില്‍ക്കുന്ന ആയയുടെ ചിത്രം ദയനീയമായ ഒരു കാഴ്ചയായിരുന്നു.

ഇതിന് തൊട്ടുപിന്നാലെ ഇന്ത്യയെ ഞെട്ടിച്ചുകൊണ്ട് സമാനമായ മറ്റൊരു ചിത്രം സോഷ്യല്‍ മീഡിയയിലെത്തി. മുന്‍ കേന്ദ്രമന്ത്രിയും കോണ്‍ഗ്രസ് നേതാവുമായ രേണുക ചൗധരിയും കുടുംബവും റെസ്‌റ്റൊറന്റില്‍ ഭക്ഷണം കഴിക്കുന്നതും തൊട്ടടുത്ത് മറ്റൊരു കസേരയില്‍ കുട്ടിയും കുട്ടിക്കരികില്‍ നില്‍ക്കുന്ന ആയയുടെയും ചിത്രമാണ് പുറത്തുവന്നത്.

കുടുംബാംഗങ്ങളെല്ലാം ഭക്ഷണം കഴിക്കുമ്പോള്‍ ആയയെ തൊട്ടടുത്ത് കാഴ്ചക്കാരിയാക്കി നിര്‍ത്തിയ രേണുകാ ചൗധരിക്ക് സോഷ്യല്‍ മീഡിയയിലുടെ കടുത്ത വിമര്‍ശനവും ഏല്‍ക്കേണ്ടിവന്നു. കുട്ടിയെ നോല്‍ക്കുന്ന വേലക്കാരിക്ക് ഭക്ഷണം നല്‍കാനാകില്ലെങ്കില്‍ റെസ്‌റ്റൊറന്റില്‍ വിളിച്ചുകൊണ്ടുപോകരുതെന്നാണ് പലരും വിമര്‍ശിച്ചത്.

അതിക്രൂരമാണ് രേണുകാ ചൗധരിയുടെ പെരുമാറ്റമെന്നും വിമര്‍ശനമുണ്ടായി. നേരത്തെ സ്ത്രീകളുടെയും കുട്ടികളുടെയും ക്ഷേമത്തിനായി പ്രവര്‍ത്തിക്കുന്ന മന്ത്രിയായിരുന്നു രേണുകാ ചൗധരി എന്നതാണ് രസകരമായ മറ്റൊരു വസ്തുത. വേലക്കാരിയായ പെണ്‍കുട്ടിയെ അടിമയെപ്പോലെ കാണുന്ന രേണുകാ ചൗധരി ഇനി പൊതുപ്രവര്‍ത്തനത്തിന് ഇറങ്ങരുതെന്ന് ട്വിറ്ററില്‍ ചിലര്‍ വ്യക്തമാക്കി.

English summary

Congress leader Renuka Chowdhury is facing flak on Twitter