തങ്ങളുടെ 80 ശതമാനം നേതാക്കളേയും പൊലീസ് അറസ്റ്റ് ചെയ്തു: കോടതിയില്‍ ഹാജരാക്കുന്നില്ലെന്നും എഎപി

ഇത് അടിയന്തരാവസ്ഥയുടെ അടയാളങ്ങളാണെന്നും മുൻ പ്രധാനമന്ത്രി ഇന്ദിരാഗാന്ധി 1975ൽ അടിയന്തരാവസ്ഥ ഏർപ്പെടുത്തിയപ്പോൾ ചെയ്തതുപോലെയാണ് കേന്ദ്രത്തിലെ നരേന്ദ്ര മോദി സർക്കാർ ചെയ്യുന്നതെന്നും എഎപി

Updated: Monday, February 27, 2023, 17:04 [IST]

ദില്ലി: ഞായറാഴ്ച മുതൽ തങ്ങളുടെ 80 ശതമാനം നേതാക്കളെയും ഡൽഹി പോലീസ് അറസ്റ്റ് ചെയ്തതുവെന്ന ആരോപണവുമാണ് ആം ആദ്മി പാർട്ടി. അറസ്റ്റ് ചെയ്ത നേതാക്കളില്‍ പലരേയും ഇതുവരെ കോടതിയില്‍ ഹാജരാക്കിയില്ലെന്നും 24 മണിക്കൂറിൽ കൂടുതൽ സമയം പൊലീസിന് ആരെയെങ്കിലും തടങ്കലിൽ വയ്ക്കാൻ കഴിയുമോയെന്നും എ എ പി നേതൃത്വം ചോദിക്കുന്നു. എക്സൈസ് നയത്തിലെ അഴിമതിയുമായി ബന്ധപ്പെട്ട് ഡൽഹി ഉപമുഖ്യമന്ത്രി മനീഷ് സിസോദിയയെ സി ബി ഐ ഞായറാഴ്ച അറസ്റ്റ് ചെയ്തതോടെ സി ബി ഐ ഓഫീസിന് സമീപം പ്രതിഷേധിച്ച എ എ പി എംപി സഞ്ജയ് സിംഗ്, മന്ത്രി ഗോപാൽ റായി എന്നിവരുൾപ്പെടെ 50 പേരെ പോലീസ് കസ്റ്റഡിയിലെടുത്തിട്ടുണ്ട്. അതേസമയം, ഞായറാഴ്ച കസ്റ്റഡിയിലെടുത്ത നേതാക്കളെ ഇന്ന് വിട്ടയക്കുമെന്നാണ് ദില്ലി പൊലീസ് അറിയിക്കുന്നത്.

ദീർഘനാളത്തെ തടങ്കൽ നിയമവിരുദ്ധമാണെന്നും മുൻ പ്രധാനമന്ത്രി ഇന്ദിരാഗാന്ധിയുടെ അടിയന്തരാവസ്ഥ കാലത്തിന് സമാനമായ രീതിയിലാണ് കാര്യങ്ങള്‍ നടക്കുന്നതെന്നും എ എ പി ദേശീയ വക്താവ് സൗരഭ് ഭരദ്വാജ് പത്രസമ്മേളനത്തിൽ പറഞ്ഞു. 'ഇന്നലെ മുതൽ ആം ആദ്മി പാർട്ടി ആവർത്തിച്ച് പറയുന്നത് മനീഷ് സിസോദിയയെ മാത്രമല്ല, പാർട്ടിയുടെ 80 ശതമാനം നേതൃത്വത്തെയും പോലീസ് അറസ്റ്റ് ചെയ്തിട്ടുണ്ടെന്നാണ്. ചോദിച്ചപ്പോൾ കേന്ദ്ര സർക്കാർ പറയുന്നത് കസ്റ്റഡിയിലെടുത്തുവെന്ന് മാത്രമാണ്," അദ്ദേഹം പറഞ്ഞു.

"തടങ്കലിൽ വയ്ക്കുന്നത് ഒരു മണിക്കൂറോ രണ്ട് മണിക്കൂറോ മൂന്ന് മണിക്കൂറോ എന്ന് എനിക്ക് അറിയണം. ഇപ്പോൾ അത് 24 മണിക്കൂറായിരിക്കും, ഇത്രയും വലിയ നേതാക്കളെ 24 മണിക്കൂർ പോലീസിന് തടങ്കലിൽ വയ്ക്കാൻ കഴിയുമോ? നിയമത്തിൽ അങ്ങനെയൊരു വ്യവസ്ഥയില്ല," -സൗരഭ് ഭരദ്വാജ് പത്രസമ്മേളനത്തിൽ ചൂണ്ടിക്കാട്ടി.

ഒരാളെ ഇത്രയും കാലം തടങ്കലിൽ വയ്ക്കുന്നത് നിയമവിരുദ്ധമാണ്. നേതാക്കളെ കോടതിയിൽ ഹാജരാക്കേണ്ടതായിരുന്നു. അവരെ കോടതിയിൽ ഹാജരാക്കി ഏതൊക്കെ വകുപ്പുകൾ പ്രകാരമാണ് നിങ്ങൾ രാജ്യസഭാ എംപിയെ അറസ്റ്റ് ചെയ്തതെന്ന് പറയേണ്ടതായിരുന്നു? ഡൽഹിയിലെ മുതിർന്ന നേതാവ് ഗോപാൽ റായിയെ തടഞ്ഞുവച്ചു. സംഘടനയുടെ പ്രവർത്തനങ്ങൾ നോക്കുന്ന ആദിൽ അഹമ്മദ് ഖാനും അറസ്റ്റ് ചെയ്യപ്പെട്ടവരിലുണ്ട്. ഡസൻ കണക്കിന് എംഎൽഎമാരെയും തിരഞ്ഞെടുക്കപ്പെട്ട കൗൺസിലർമാരെയും ഇന്നലെ മുതൽ പൊലീസ് അറസ്റ്റ് ചെയ്തിട്ടുണ്ട്. രാത്രി മുഴുവൻ അവർ പോലീസ് സ്റ്റേഷനിൽ ചെലവഴിച്ചു. പോലീസ് ഇതുവരെ അവരെ വിട്ടയച്ചിട്ടില്ലെന്നും എഎപി വ്യക്തമാക്കുന്നു.

ഇത് അടിയന്തരാവസ്ഥയുടെ അടയാളങ്ങളാണെന്നും മുൻ പ്രധാനമന്ത്രി ഇന്ദിരാഗാന്ധി 1975ൽ അടിയന്തരാവസ്ഥ ഏർപ്പെടുത്തിയപ്പോൾ ചെയ്തതുപോലെയാണ് കേന്ദ്രത്തിലെ നരേന്ദ്ര മോദി സർക്കാർ ചെയ്യുന്നതെന്നും ഭരദ്വാജ് പറഞ്ഞു.
"ഇത് വളരെ അപകടകരമായ അടയാളങ്ങളാണ്. ഇത് അടിയന്തരാവസ്ഥയുടെ അടയാളങ്ങളാണ്. ഒരു കാരണവുമില്ലാതെ നിങ്ങൾ എല്ലാ നേതാക്കളെയും ജയിലിൽ അടച്ചു, ഇത് തെറ്റാണ്. എന്ത് അടിസ്ഥാനത്തിലാണ് ഞങ്ങളുടെ ഉന്നത നേതൃത്വത്തെ അറസ്റ്റ് ചെയ്ത് ജയിലിൽ അടച്ചതെന്ന് കേന്ദ്ര സർക്കാർ ഉത്തരം പറയണം." അദ്ദേഹം പറഞ്ഞു.