ഭൂമി കുംഭകോണം: സഞ്ജയ് റാവത്തിനെ ഇ.ഡി അറസ്റ്റ് ചെയ്തു, വീട്ടില് നിന്ന് 11.50 ലക്ഷം പിടിച്ചെടുത്തു
മുംബൈ: ശിവസേന നേതാവും എം പിയുമായ സഞ്ജയ് റാവത്തിനെ എന്ഫോഴ്സ്മെന്റ് ഡയറക്ടറേറ്റ് (ഇ ഡി) ഞായറാഴ്ച രാത്രി അറസ്റ്റ് ചെയ്തു. തിങ്കളാഴ്ച രാവിലെ 11.30ന് കോടതിയില് ഹാജരാക്കും. അവിടെ നിന്ന് ഇ ഡി ഏജന്സി കസ്റ്റഡിയില് ആവശ്യപ്പെടും.
മുംബൈയുടെ വടക്കന് പ്രാന്തപ്രദേശത്തുള്ള ഒരു ചാള് പദ്ധതിയുടെ പുനര്വികസനവുമായി ബന്ധപ്പെട്ട കള്ളപ്പണം വെളുപ്പിക്കല് കേസില് സഞ്ജയ് റാവത്തിന്റെ വസതിയില് ഞായറാഴ്ച ഒമ്പത് മണിക്കൂറിലധികം ഇ ഡി തിരച്ചില് നടത്തിയിരുന്നു. തുടര്ന്ന് ചോദ്യം ചെയ്യുന്നതിനായി അദ്ദേഹത്തെ കസ്റ്റഡിയിലെടുത്തിരുന്നു.
നേരത്തെ ജൂലൈ ഒന്നിന് ഇ ഡി റാവത്തിനെ 10 മണിക്കൂറിലധികം ചോദ്യം ചെയ്യുകയും ജൂലൈ 20 ന് അദ്ദേഹത്തെ വീണ്ടും വിളിപ്പിക്കുകയും ചെയ്തിരുന്നു. ഞായറാഴ്ച പുലര്ച്ചെയാണ് ഇ ഡി റാവത്തിന്റെ വീട്ടിലെത്തിയത്. സഞ്ജയ് റാവത്തിന് പിന്തുണയുമായി ശിവസേന പ്രവര്ത്തകര് അദ്ദേഹത്തിന്റെ വസതിക്ക് പുറത്ത് തടിച്ചുകൂടിയിരുന്നു.
ഹൗസിംഗ് ഡെവലപ്മെന്റ് ആന്ഡ് ഇന്ഫ്രാസ്ട്രക്ചര് ലിമിറ്റഡിന്റെ (എച്ച്ഡിഐഎല്) അനുബന്ധ സ്ഥാപനമായ ഗുരു ആഷിഷ് കണ്സ്ട്രക്ഷന് പ്രൈവറ്റ് ലിമിറ്റഡിന്റെ പത്ര ചൗളിന്റെ പുനര്വികസനത്തിലെ ക്രമക്കേടുമായി ബന്ധപ്പെട്ട കേസില് 2002 ലെ കള്ളപ്പണം വെളുപ്പിക്കല് തടയല് നിയമത്തിന്റെ (പിഎംഎല്എ) ലംഘനങ്ങളാണ് ഇ ഡി അന്വേഷിക്കുന്നത്.
സഞ്ജയ് റാവത്തിന്റെ അടുത്ത അനുയായി പ്രവീണ് റാവത്തിനെ നേരത്തെ അറസ്റ്റ് ചെയ്യുകയും ശിവസേന നേതാവിന്റെ ഭാര്യ വര്ഷ റാവത്തിന്റെ സ്വത്തുക്കള് കണ്ടുകെട്ടുകയും ചെയ്തിരുന്നു. മഹാരാഷ്ട്ര ഹൗസിംഗ് ആന്ഡ് ഏരിയ ഡെവലപ്മെന്റ് അതോറിറ്റിയുമായി ഗുരു ആശിഷ് കണ്സ്ട്രക്ഷന് ഒരു ത്രികക്ഷി കരാര് ഒപ്പുവെച്ചിരുന്നു.
പ്രവീണ് റാവത്തും ഗുരു ആശിഷ് കണ്സ്ട്രക്ഷന്സിന്റെ മറ്റ് ഡയറക്ടര്മാരും എം എച്ച് എ ഡി എയെ തെറ്റിദ്ധരിപ്പിക്കുകയും 672 കുടിയാന്മാര്ക്ക് പുനരധിവാസം സാധ്യമാക്കാതെ 901.79 കോടി രൂപ സമാഹരിച്ച് ഒമ്പത് സ്വകാര്യ ഡെവലപ്പര്മാര്ക്ക് ഫ്ലോര് സ്പേസ് ഇന്ഡക്സ് (എഫ്എസ്ഐ) വിറ്റുവെന്ന് ഇ ഡി അവകാശപ്പെടുന്നു.
പ്രവീണ് റാവത്ത് എച്ച്ഡിഐഎല്ലില് നിന്ന് 100 കോടി രൂപ കൈപ്പറ്റിയെന്നും അത് സഞ്ജയ് റാവത്തിന്റെ കുടുംബം ഉള്പ്പെടെയുള്ള അദ്ദേഹത്തിന്റെ അടുത്ത കൂട്ടാളികള്, കുടുംബാംഗങ്ങള്, ബിസിനസ്സ് സ്ഥാപനങ്ങള് എന്നിവയുടെ വിവിധ അക്കൗണ്ടുകളിലേക്ക് വഴിതിരിച്ചുവിട്ടുവെന്നുമാണ് ഇ ഡി പറയുന്നത്. അതേസമയം ഇ ഡി അന്വേഷിക്കുന്ന ഒരു കമ്പനിയുമായും തനിക്ക് ബന്ധമില്ലെന്നും അന്വേഷണവുമായി സഹകരിക്കുമെന്നും റാവത്ത് പറഞ്ഞു.
ഇതൊരു വ്യാജ അന്വേഷണമാണ്. ആളുകളെ ഭീഷണിപ്പെടുത്തിയും ആക്രമിച്ചും എനിക്കെതിരെ വ്യാജ തെളിവുകള് ശേഖരിച്ചു. മഹാരാഷ്ട്രയെയും ശിവസേനയെയും ദുര്ബലപ്പെടുത്താനുള്ള ഗൂഢാലോചനയുടെ ഭാഗമാണിത്. ഈ സംസ്ഥാനവും സേനയും ഒരിക്കലും ദുര്ബലമാകില്ല, അദ്ദേഹം പറഞ്ഞു. അതിനിടെ ഞായറാഴ്ച വൈകുന്നേരത്തോടെ സഞ്ജയ് റാവത്തിന്റെ വസതിയില് നിന്ന് കണക്കില്പ്പെടാത്ത 11.5 ലക്ഷം രൂപ കണ്ടെടുത്തതായി ഇ ഡി വൃത്തങ്ങള് അവകാശപ്പെട്ടു.
പത്ര ചൗള് കേസിലെ ഇ ഡി സാക്ഷിയായ സ്വപ്ന പട്കറെ ഭീഷണിപ്പെടുത്തിയെന്നാരോപിച്ച് എം പിക്കെതിരെ മുംബൈ പോലീസ് ഞായറാഴ്ച എഫ് ഐ ആര് രജിസ്റ്റര് ചെയ്തിട്ടുണ്ട്. റാവുത്തും പട്കറും തമ്മിലുള്ള സംഭാഷണത്തിന്റെ ഓഡിയോ റെക്കോര്ഡിംഗിന്റെ അടിസ്ഥാനത്തിലാണ് എഫ് ഐ ആര്. വക്കോല പോലീസ് സ്റ്റേഷനില് ഇന്ത്യന് ശിക്ഷാ നിയമത്തിലെ 504, 504, 509 വകുപ്പുകള് പ്രകാരം എഫ്ഐആര് രജിസ്റ്റര് ചെയ്തതായി മുംബൈ പോലീസ് ഉദ്യോഗസ്ഥന് പറഞ്ഞു.
തന്നെ ഭയപ്പെടുത്താനാണ് റാവത്ത് ശ്രമിക്കുന്നതെന്ന് പട്കര് ആരോപിച്ചു. അതേസമയം പാര്ട്ടിയെ തകര്ക്കാനുള്ള ഗൂഢാലോചനയുടെ ഭാഗമാണ് ഇഡിയുടെ നടപടിയെന്ന് ശിവസേന അധ്യക്ഷന് താക്കറെ ഞായറാഴ്ച പറഞ്ഞു.
വന്നു...കണ്ടു...കീഴടക്കി; മീര അനിലിന്റെ പുതിയ ഫോട്ടോഷൂട്ടും കലക്കന്
Click it and Unblock the Notifications
Sign in with Google