നരേന്ദ്ര മോദിയുടെ ഊണിന് വില 29 രൂപ!

ദില്ലി: ഇന്ന് (മാര്‍ച്ച് 2, 2015 തിങ്കളാഴ്ച) പ്രധാനമന്ത്രി നരേന്ദ്ര മോദി ഉച്ചയൂണിന് ചെലവഴിച്ചത് എത്ര രൂപ. ഉത്തരം സിംപിള്‍ 29 രൂപ. പാര്‍ലമെന്റ് കാന്റീനിലായിരുന്നു ഇന്ന് നരേന്ദ്ര മോദിയുടെ വിഭവസമൃദ്ധമായ ഉച്ചയൂണ്. പാര്‍ലമെന്റ് കെട്ടിടത്തിലെ ഒന്നാം നിലയിലുള്ള എഴുപതാം നമ്പര്‍ മുറിയിലെ കാന്റീനിലാണ് മോദി ഇന്ന് ഉച്ചയൂണ് കഴിക്കാനെത്തിയത്.

പ്രത്യേകിച്ച് ഒരു ഒച്ചപ്പാടും ബഹളവും കൂടാതെ പ്രധാനമന്ത്രി നരേന്ദ്ര മോദി കാന്റീനിലേക്ക് കയറിവരുന്നത് കണ്ട് ജീവനക്കാര്‍ ആദ്യമൊന്നു പകച്ചു. പിന്നെ പതിയെ പ്രധാനമന്ത്രിക്ക് അരികിലെത്തി കഴിക്കാന്‍ എന്താണ് വേണ്ടത് എന്ന് ചോദിച്ചു. ഉച്ചയൂണിന് എന്താണോ ഉള്ളത് അത് തരൂ എന്നായി മോദി. കുറച്ച് ചൂടുവെള്ളം കുടിച്ച മോദി സാലഡും രുചിനോക്കി. അതായിരുന്നു പ്രധാനമന്ത്രിയുടെ സ്റ്റാര്‍ട്ടര്‍.

പിന്നാലെ ചോറും റൊട്ടിയും ഉരുളക്കിഴങ്ങ് സബ്ജിയും തൈരും മറ്റുമായി വെജിറ്റേറിയന്‍ ഊണ് എത്തി. ഊണും കഴിച്ച് 29 രൂപ ബില്ലും അടച്ചാണ് മോദി കാന്റീനില്‍ നിന്നും മടങ്ങിയത്. മൂന്ന് എം പിമാരും മോദിയുടെ കൂടെ കാന്റീനിലെത്തിയിരുന്നു. ബിഹാറില്‍ നിന്നുള്ള ഛേദി പാസ്വാന്‍ മാത്രമായിരുന്നു ഇവരില്‍ ബി ജെ പിയില്‍ നിന്നും ഉണ്ടായിരുന്നത്.

25 - 30 എം പിമാരാണ് മോദി വരുമ്പോള്‍ കാന്റീനില്‍ ഉണ്ടായിരുന്നത്. ഓരോരുത്തരുടെയും അടുത്തുപോയി കുശലം ചോദിച്ച ശേഷമാണ് മോദി മടങ്ങിയത്.

English summary

Prime Minister Narendra Modi, Monday, had lunch at the canteen in Parliament. He has paid Rs 29 for lunch.