'ആമിറിന്റെ ഭാര്യയ്ക്ക് ഇറാനിലോ താലിബാനിലോ പോകാന്‍ ആഗ്രഹമുണ്ടോ?'; സാക്ഷി മഹാരാജ്

By Anwar Sadath

Updated: Wednesday, November 25, 2015, 9:16 [IST]

ഉന്നാവോ: ഇന്ത്യയില്‍ അസഹിഷ്ണുതയുണ്ടെന്ന് പറഞ്ഞ ബോളിവുഡ് നടന്‍ ആമിര്‍ ഖാനെതിരെ പതിവുപോലെ ബിജെപി സംഘ്പരിവാര്‍ അംഗങ്ങള്‍ കൂട്ടായ ആക്രമണം തുടങ്ങി. വിവാദ പ്രസ്താവനകള്‍ നടത്തി ശ്രദ്ധയാകാറുള്ള ബിജെപി എംപി സാക്ഷി മഹാരാജ് പതിവുപോലെ പ്രസ്താവനയുമായി രംഗത്തെത്തിയിട്ടുണ്ട്.

ഇന്ത്യയില്‍ നിന്നും മാറിത്താമസിക്കാന്‍ ആഗ്രഹിച്ചിരുന്ന ആമിര്‍ ഖാന്റെ ഭാര്യ ഏതു രാജ്യത്ത് പോകാനാണ് ഉദ്ദേശിച്ചത്? ഇറാനോ താലിബാനോ ആണോയെന്ന് സാക്ഷി മഹാരാജ് ചോദിച്ചു. അമീര്‍ഖാന്‍ തന്നെയാണ് അത് പറഞ്ഞതെങ്കില്‍ അയാളുടെത് മോശം മനസാണ്. നരേന്ദ്ര മോദിക്കെതിരെയുള്ള ചിലരുടെ വികാരമാണ് ഇതിലൂടെ പുറത്തുവന്നതെന്നും അദ്ദേഹം പറഞ്ഞു.

ആമിര്‍ഖാന്റെ സിനികള്‍ ഇപ്പോഴും ഇന്ത്യയില്‍ കോടികള്‍ വരുമാനമുണ്ടാക്കുന്നു. എന്നിട്ടും ഇതുപോലൊരു പരാമര്‍ശം നടത്തിയത് എന്തിനാണ്. എല്ലാം നരേന്ദ്ര മോദിയെ ലക്ഷ്യംവെച്ചുള്ളതാണെന്ന് സാക്ഷി മഹാരാജ് പറഞ്ഞു. നേരത്തെ ബോളിവുഡ് താരം അനുപം ഖേറും ആമിര്‍ ഖാനെ വിമര്‍ശിച്ച് രംഗത്തെത്തിയിരുന്നു.

ഇന്ത്യയാണ് ആമിര്‍ഖാന്‍ എന്നയാളെ ഉണ്ടാക്കിയതെന്നും ആമിറിന്റെ ഭാര്യയ്ക്ക് ഏത് രാജ്യത്ത് പോകാനാണ് താത്പര്യമെന്ന് ചോദിക്കണമെന്നുമായിരുന്നു അനുപം ഖേറിന്റെ പ്രതികരണം. ദില്ലിയില്‍ ഒരു പൊതു പരിപാടിയില്‍ പങ്കെടുത്ത് സംസാരിക്കവെയാണ് ആമിര്‍ ഇന്ത്യയിലെ അടുത്തിടെ ഇന്ത്യയിലുണ്ടായ അരക്ഷിതാവസ്ഥയെക്കുറിച്ച് സൂചിപ്പിച്ചത്.