തേജ് പ്രതാപ് യാദവ് കുതിരപ്പുറത്ത്, വിമര്‍ശനവുമായി ബിജെപി!

പാറ്റ്‌ന: ലാലു പ്രസാദ് യാദവിന്റെ മകനും ബിഹാര്‍ മന്ത്രിയുമായ തേജ് പ്രതാപ് യാദവിന്റെ ഇത്തവണത്തെ ക്രിസ്തുമസ് ആഘോഷം കാണേണ്ടതു തന്നെയായിരുന്നു. ക്രിസ്തുമസ് ആഘോഷം നടത്തി വിമര്‍ശനങ്ങള്‍ ഏറ്റുവാങ്ങേണ്ടി വന്നിരിക്കുകയാണ് തേജ് പ്രതാപിന്. കുതിരപ്പുറത്തേറിയാണ് ക്രിസ്തുമസ് ആഘോഷിക്കാന്‍ തേജ് പ്രതാപ് യാദവ് വസതിയില്‍ എത്തിയത്.

ആര്‍ഭാടം ഒട്ടും കുറച്ചില്ല, ഒരു സംഘം പോലീസ് ഉദ്യോഗസ്ഥരുടെ അകമ്പടിയോടെയായിരുന്നു തേജ് പ്രതാപിന്റെ രംഗപ്രവേശം. ബിജെപിക്ക് ഇതൊന്നും അത്ര രസിച്ചില്ല എന്നു തന്നെ പറയാം. തേജിനെതിരെ വിമര്‍ശനവുമായി ബിജെപി നേതാക്കള്‍ രംഗത്തു വന്നു.

ആശുപത്രികളില്‍ രോഗികള്‍ മരുന്നും മറ്റു സൗകര്യങ്ങളും ഇല്ലാതെ ബുദ്ധിമുട്ടുമ്പോള്‍ തേജിന്റെ ഇത്തരം ആര്‍ഭാടം കണ്ടില്ലെന്നുവെക്കാന്‍ പറ്റില്ലെന്ന് ബിജെപി അംഗം പ്രേം കുമാര്‍ പറഞ്ഞു. അര കിലോമീറ്ററോളം ദൂരം തേജിന്റെ കുതിരപ്പുറത്തുള്ള സവാരി ഉണ്ടായിരുന്നു. കുതിരപ്പുറത്തുള്ള യാത്ര ഏറെ ആസ്വദിച്ചെന്നാണ് അദ്ദേഹം പറഞ്ഞത്.

കുതിരപ്പുറത്ത് യാത്ര ചെയ്യുന്നത് ഇഷ്ടമാണെന്ന് പണ്ട് യാത്ര ചെയ്തിട്ടുണ്ടെന്നും തേജ് പറഞ്ഞു. കുതിരപ്പുറത്തുള്ള യാത്ര പരിസ്ഥിതിക്ക് ഗുണകരമാണെന്നും അദ്ദേഹം അഭിപ്രായപ്പെടുകയുണ്ടായി.

English summary

Bihar Health Minister Tej Pratap Yadav, who is Rashtriya Janata Dal supremo Lalu Prasad's elder son, rode a horse from his parents' home to his official residence to celebrate Christmas.