കൗമാരക്കാർക്കുള്ള രണ്ടാമത്തെ കോവിഡ് വാക്സിൻ കോർബെവാക്സിന് അനുമതി

ഡൽഹി: രാജ്യത്ത് കൗമാരക്കാർക്കായുള്ള രണ്ടാമത്തെ കോവിഡ് വാക്സിന് അം​ഗീകാരം. 12 മുതൽ 18 വയസ് വരെയുള്ള പ്രായക്കാർക്കായാണ് ബയോളജിക്കൽ ഇ ലിമിറ്റഡിന്റെ പുതിയ വാക്സിനായ കോർബെവാക്സിന് അടിയന്തര ഉപയോഗ അനുമതി നൽകിയത്. വാക്സിൻ നിർമ്മാതാക്കൾ തന്നെയാണ് ഈ വാർത്ത പുറത്ത് വിട്ടത്. കോവാക്സിൻ, സൈകോവ്-ഡി എന്നിവയ്ക്കു പിന്നാലെ ഇന്ത്യയുടെ മൂന്നാമത്തെ തദ്ദേശീയ വാക്സീനാണിത്.

പതിനെട്ട് വയസിന് മുകളിലുള്ളവർക്ക് കോർബെവാക്സിൻ നൽകാൻ നേരത്തെ തന്നെ അനുമതിയുണ്ട്. കോർബെവാക്‌സിനെ ഇന്ത്യയിലെ ആദ്യത്തെ സ്വദേശീയ പ്രോട്ടീൻ സബ്-യൂണിറ്റ് വാക്സിൻ ആയി ആണ് കണക്കാക്കുന്നത്. നിലവിൽ രാജ്യത്തെ പതിനഞ്ചിനും പതിനെട്ടിനും ഇടയിൽ പ്രയമുള്ളവർക്കായി ഭാരത് ബയോടെക്കിന്റെ കോവാക്സിൻ എന്ന വാക്സിനാണ് നൽകി വരുന്നത്. ജനുവരി മൂന്ന് മുതലായിരുന്നു കുട്ടികൾക്കായുള്ള വാക്സിന് രാജ്യം അം​ഗീകാരം നൽകിയത്.

"നമ്മുടെ രാജ്യത്തെ 12 മുതൽ 18 വയസ്സുവരെയുള്ളവരിലേക്ക് വാക്‌സിൻ വ്യാപിപ്പിക്കാൻ സഹായിക്കുന്ന എല്ലാ നടപടികളിലും ഞങ്ങൾ സന്തുഷ്ടരാണ്. ഈ അംഗീകാരത്തോടെ, ആഗോളതലത്തിലുള്ള പോരാട്ടം അവസാനിപ്പിക്കാറായി. വിജയത്തിലേക്ക് ഞങ്ങൾ കൂടുതൽ അടുത്തിരിക്കുന്നു" ബയോളജിക്കൽ ഇ മാനേജിംഗ് ഡയറക്ടർ മഹിമ ദറ്റ്‌ല കഴിഞ്ഞ ദിവസം ഇറക്കിയ പ്രസ്താവനയിൽ പറഞ്ഞു.

അഞ്ച് വയസ് മുതൽ പതിനെട്ട് വയസ് വരെയുള്ളവരിൽ കോർബെവാക്സിന്റെ രണ്ടും മൂന്നും ഘട്ടം ക്ലിനിക്കൽ പരീക്ഷണങ്ങൾ നടത്താൻ ബയോളജിക്കൽ ഇ ക്ക് കഴിഞ്ഞ സെപ്റ്റംബറിൽ അനുമതി ലഭിച്ചിരുന്നു. ഇതേ തുടർന്ന് ഒക്ടോബറിൽ ക്ലിനിക്കൽ പഠനം ആരംഭിക്കുകയും സുരക്ഷയും രോഗപ്രതിരോധ ഫലങ്ങളും വിലയിരുത്തുകയും ചെയ്തു, ശേഷമാണ് വാക്സിൻ സുരക്ഷിതവും പ്രതിരോധശേഷിയുള്ളതുമാണെന്ന് കമ്പനി വെളിപ്പെടുത്തിയത്. 28 ദിവസത്തെ ഇടവേളയിൽ രണ്ട് ഡോസുകൾ ഷെഡ്യൂൾ ചെയ്ത് 2 മുതൽ 8 ഡിഗ്രി സെൽഷ്യസിലാണ് കോർബെവാക്സ്. ഇത് 0.5 മില്ലി (സിംഗിൾ ഡോസ്), 5 മില്ലി (10 ഡോസ്), 10 മില്ലി (20 ഡോസ്) കുപ്പി പായ്ക്കുകളിലാണ് വരുന്നത്.

ഹൈദരാബാദ് ആസ്ഥാനമായി 1953-ൽ ആണ് ബയോളജിക്കൽ ഇ സ്ഥാപിതമാകുന്നത്. ഇന്ത്യയിലെ ആദ്യത്തെ സ്വകാര്യ മേഖലയിലെ ജൈവ ഉൽപ്പന്ന കമ്പനിയും ദക്ഷിണേന്ത്യയിലെ ആദ്യത്തെ ഫാർമസ്യൂട്ടിക്കൽ കമ്പനിയുമാണ് ബയോളജിക്കൽ ഇ.

English summary

The second covid vaccine for childrens, corbevax, is approved