'വോട്ടുകള് കൊണ്ട് അവര്ക്ക് അടി കൊടുക്കണം'; വോട്ടര്മാരോട് അഭ്യര്ത്ഥനയുമായി യോഗി ആദിത്യനാഥ്
ലക്നൗ: പ്രതിപക്ഷത്തിനെതിരെ രൂക്ഷവിമര്ശനവുമായി ഉത്തര് പ്രദേശ് മുഖ്യമന്ത്രി യോഗി ആദിത്യനാഥ് രംഗത്ത്. കൊവിഡ് വാക്സിനുകളെ കുറിച്ച് അഭ്യൂഹങ്ങള് പരത്തുന്നവര്ക്ക് വോട്ട് ഉപയോഗിച്ച് ശക്തമായ അടി നല്കണമെന്ന് യോഗി ആദിത്യനാഥ് വോട്ടര്മാരോട് അഭ്യര്ത്ഥിച്ചു. ബിജ്നോറില് ജന് ചൗപാല് റാലിയെ അഭിസംബോധന ചെയ്ത് സംസാരിക്കുന്നതിനിടെയാണ് അദ്ദേഹം ഇക്കാര്യം വ്യക്തമാക്കിയത്.
ഇവിടെയുള്ള 100 ശതമാനം ആളുകളും പൂര്ണ്ണമായും വാക്സിനേഷന് എടുത്തിട്ടുണ്ടെങ്കില്, എല്ലാവരോടും ഞാന് അഭ്യര്ത്ഥിക്കുന്നു. വാക്സിനുകള്ക്കെതിരെ കിംവദന്തികള് പ്രചരിപ്പിക്കുകയും അവരെ 'മോദി', 'ബിജെപി' വാക്സിന് എന്ന് വിളിക്കുകയും ചെയ്യുന്നവര്ക്ക് നിങ്ങളുടെ വോട്ടുകള് കൊണ്ട് ശക്തമായ അടി നല്കേണ്ട സമയമാണിതെന്ന് യോഗി ആദിത്യനാഥ് പറഞ്ഞു.
ബി ജെ പി സര്ക്കാര് ഉത്തര്പ്രദേശിലെ എല്ലാ വീട്ടിലും വൈദ്യുതി ഉറപ്പാക്കുമ്പോള് ബഹുജന് സമാജ് പാര്ട്ടിയും സമാജ്വാദി പാര്ട്ടി അംഗങ്ങളും ഇരുട്ടില് കഴിയുകയും ജനങ്ങളെ കൊള്ളയടിക്കുകയും ചെയ്യുകയാണെന്ന് മുഖ്യമന്ത്രി യോഗി ആദിത്യനാഥ് പറഞ്ഞു. കഴിഞ്ഞ അഞ്ച് വര്ഷങ്ങള്ക്ക് മുമ്പ് ആര്ക്കെങ്കിലും വൈദ്യുതി ലഭിച്ചിട്ടുണ്ടോ, എസ് പി, ബി എസ് പി എന്നിവര് എല്ലാവരെയും ഇരുട്ടില് കഴിയാന് വിട്ടു. കൂടാതെ മുന്കാലങ്ങളില് നിന്ന് വ്യത്യസ്തമായി ക്രമസമാധാന പ്രശ്നവും അദ്ദേഹം ഉയര്ത്തി, മുസഫര്നഗര് കലാപത്തെക്കുറിച്ചും അദ്ദേഹം ജനങ്ങളെ ഓര്മ്മിപ്പിച്ചു.
മുസാഫര്നഗര് കലാപം നിങ്ങള് ഓര്ക്കുന്നുണ്ടോ? ഒന്നുരണ്ടു ആണ്കുട്ടികളെ കാണാതായി, ഒരാള് ലഖ്നൗവില് കലാപം നടത്തി, മറ്റൊരാള് ഡല്ഹിയില് നിന്ന് അത് കണ്ടിരുന്നു. അവര് ഇപ്പോള് എവിടെയാണ്? ഇന്ന്, ബിജെപിക്ക് അവരുടെ കോപം തണുപ്പിക്കാന് കഴിയുമെന്ന് അവര്ക്കറിയാമെന്ന് യോഗി ആദിത്യനാഥ് വ്യക്തമാക്കി.
അതേസമയം, തിങ്കളാഴ്ച മോശം കാലാവസ്ഥ കാരണം ഹെലികോപ്റ്റര് പറന്നുയരാന് കഴിയാത്തതിനെത്തുടര്ന്ന് പ്രധാനമന്ത്രി നരേന്ദ്ര മോദിയും ജന് ചൗപാല് റാലിയെ ഓണ്ലൈന് വഴിയാണ് അഭിസംബോധന ചെയ്തത്. ഉത്തര്പ്രദേശില് ഫെബ്രുവരി 10, 14, 20, 23, 27, മാര്ച്ച് 3, 7 തീയതികളില് ഏഴ് ഘട്ടങ്ങളിലായാണ് വോട്ടെടുപ്പ്. വോട്ടെണ്ണല് മാര്ച്ച് 10ന് നടക്കും.
Click it and Unblock the Notifications
Sign in with Google