മലേഷ്യന്‍ വിമാനം തകര്‍ന്നത് മലാക്കാ കടലിടുക്കില്‍?

കൊലാലംപുര്‍: ശനിയാഴ്ച കാണാതായ മലേഷ്യ എയര്‍ലൈന്‍സിന്റെ വിമാനം തകര്‍ന്ന് വീണത് മലാക്കാ കടലിടുക്കിലെന്ന് റിപ്പോര്‍ട്ട്. മലേഷ്യന്‍ സൈന്യം വിമാനത്തിന്റെ സാന്നിധ്യം റഡാര്‍ സംവിധാനത്തില്‍ കണ്ടെത്തിയെന്നാണ് വിവരം. മലേഷ്യന്‍ സൈനികവൃത്തങ്ങളെ ഉദ്ധരിച്ച് റോയ്‌റ്റേഴ്‌സ് ന്യൂസ് ഏജന്‍സിയാണ് വാര്‍ത്ത റിപ്പോര്‍ട്ട് ചെയ്തിരിക്കുന്നത്.

മലേഷ്യയുടെ പശ്ചിമ തീരത്താണ് മലാക്കാ കടലിടുക്ക്. ഏറെ തിരക്കുള്ള കപ്പല്‍ ചാലാണ് ഇത്. 239 യാത്രക്കാരുമായി കാണാതായ വിമാനം ഏറ്റവും ഒടുവില്‍ എയര്‍ട്രാഫിക് കണ്‍ട്രോളുമായി ബന്ധപ്പെട്ടത് മലേഷ്യയുടെ കിഴക്കന്‍ തീരത്ത് വച്ചായിരുന്നു.

മലേഷ്യയുടെ കിഴക്കേ തീരത്തെ കോട്ട ഭാരു എന്ന നഗരത്തിന് മുകളില്‍ വച്ചായിരുന്നു അവസാനം വിമാനവുമായി ബന്ധപ്പെട്ടത്. ഇവിടെ നിന്ന് വിമാനം മലാക്കാ കടലിടുക്കിന് മുകളിലൂടെ താഴ്ന്ന് പറന്നിട്ടുണ്ടാകാം, അവിടെ വച്ച് അപകടവും നടന്നിട്ടുണ്ടാകാം എന്നാണ് സൈന്യത്തിന്റെ വിലയിരുത്തല്‍. മലാക്കാ കടലിടുക്കില്‍ തിരച്ചില്‍ ഇപ്പോള്‍ ശക്തമാക്കിയിരിക്കുകയാണ്.

ഇതിനിടെ വിമാനത്തിലുണ്ടായിരുന്ന യാത്രക്കാരുടെ മൊബൈല്‍ ഫോണുകള്‍ ഇപ്പോഴും പ്രവര്‍ത്തന ക്ഷമം ആണെന്നും വാര്‍ത്തകള്‍ ഉണ്ട്. യാത്രക്കാരുടെ ബന്ധുക്കള്‍ വിളിച്ചപ്പോള്‍ ഫോണില്‍ ബെല്ലടിച്ചിരുന്നുവെന്നാണ് വാര്‍ത്ത. എന്നാല്‍ ഇക്കാര്യം സ്ഥിരീകരിച്ചിട്ടില്ല.

English summary

Malaysia military tracks missing jet to Strait of Malacca: Source.