ഇത് മൂന്നാം തരംഗമല്ല, പ്രതിരോധ ശേഷി കൈവരിച്ചാൽ മൂന്നാം തരംഗമുണ്ടാകില്ലെന്ന് മുഖ്യമന്ത്രി
തിരുവനന്തപുരം: സംസ്ഥാനത്ത് നിലവില് കൊവിഡ് കേസുകള് ഉയരുന്നത് മൂന്നാം തരംഗമായി കണക്കാക്കാനാകില്ലെന്ന് മുഖ്യമന്ത്രി പിണറായി വിജയന് പ്രതിദിന കൊവിഡ് അവലോകന യോഗത്തിന് ശേഷം വൈകിട്ട് വാര്ത്താ സമ്മേളനത്തില് സംസാരിക്കുകയായിരുന്നു മുഖ്യമന്ത്രി. കേരളം മൂന്നാം തരംഗത്തിന് സമീപത്താണ്. രാജ്യത്ത് കോവിഡ് മൂന്നാം തരംഗത്തെക്കുറിച്ചുള്ള മുന്നറിയിപ്പുകള് വന്നു തുടങ്ങിയിരിക്കുകയാണ് എന്ന് മുഖ്യമന്ത്രി ചൂണ്ടിക്കാട്ടി. വിദേശരാജ്യങ്ങളിലെ രണ്ടാം തരംഗം അവസാനിച്ച് കഴിഞ്ഞാണ് ഇന്ത്യയില് രണ്ടാം തരംഗം ആരംഭിച്ചത്.
ഇന്ന് 17,518 പേര്ക്കാണ് സംസ്ഥാനത്ത് കോവിഡ് ബാധ സ്ഥിരീകരിച്ചത്. 12.1 ശതമാനമാണ് കഴിഞ്ഞ മൂന്ന് ദിവസത്തെ ശരാശരി ടെസ്റ്റ്പോസിറ്റിവിറ്റി നിരക്ക് എന്നും മുഖ്യമന്ത്രി ചൂണ്ടിക്കാട്ടി. '' കോവിഡ് പെരുമാറ്റ ചട്ടങ്ങള് കര്ശനമായി പാലിച്ച് സാമൂഹ്യ പ്രതിരോധ ശേഷി അവശ്യമായ തോതില് കൈവരിക്കാന് കഴിഞ്ഞാല് മൂന്നാം തരംഗം ഉണ്ടാവണമെന്നില്ല. മൂന്നാം തരംഗം സ്വാഭാവികമായി ഉണ്ടാവുകയല്ല ചെയ്യുന്നത്. കോവിഡ് നിയന്ത്രണത്തിലുള്ള പാളിച്ചകളിലൂടെയും വാക്സിന് വിതരണത്തിലെ വീഴ്ചകളിലൂടെയും ഉണ്ടാക്കപ്പെടുകയാണ് ചെയ്യുന്നത്'', മുഖ്യമന്ത്രി പറഞ്ഞു.
Recommended Video
''കൊവിഡ് മൂന്നാം തരംഗം ഉണ്ടായാല് അത് കുട്ടികളെ കൂടുതലായി ബാധിക്കുമെന്ന വിശ്വാസത്തിന് വലിയ ശാസ്ത്രീയ അടിത്തറയില്ല. ഇതിനകം കേവലം 4% കുട്ടികളെ മാത്രമാണ് രോഗം ബാധിച്ചിട്ടുള്ളത്. കുട്ടികളിലെ മരണ നിരക്കും വളരെ കുറവാണ്'' എന്നും മുഖ്യമന്ത്രി പിണറായി വിജയൻ കൂട്ടിച്ചേർത്തു. സംസ്ഥാനത്ത് വാക്സിന് വിതരണം മികച്ച രീതിയില് പുരോഗമിക്കുന്നുണ്ട്. കേന്ദ്രസര്ക്കാരില് നിന്നും വാക്സിന് കൃത്യമായി ലഭിക്കുകയാണെങ്കില് ഇപ്പോള് കേരളം വാക്സിന് വിതരണം ചെയ്യുന്ന വേഗതയില് രണ്ടോ മൂന്നോ മാസങ്ങള്ക്കുള്ളില് 60 ശതമാനം പേര്ക്കെങ്കിലും വാക്സിന് നല്കാന് സാധിക്കും എന്നും മുഖ്യമന്ത്രി വാർത്താ സമ്മേളനത്തിൽ പറഞ്ഞു.
Click it and Unblock the Notifications
Sign in with Google