കണ്ണുപൊട്ടന്, ചെവികേള്ക്കാത്തവന്, കാല് മൊടന്തന്... എളമരം കരീം നിങ്ങള് സിപിഎം തന്നെയോ?
കാസര്കോട്: സിപിഎം കേന്ദ്ര കമ്മിറ്റി അംഗം ഭിന്നശേഷിയുള്ളവരെ ആക്ഷേപിച്ച് രംഗത്തെത്തിയത് വിവാദമാകുന്നു. കെഎസ്ആര്ടിസി നഷ്ടത്തിലാകാന് കാരണം കണ്ണുപൊട്ടനും ചെവി കേള്ക്കാത്തവനും കാല് മുടന്തനും ഒക്കെ സൗജന്യ യാത്ര അനുവദിച്ചതാണെന്നാണ് എളമരം കരീമിന്റെ കണ്ടെത്തല്.
കെഎസ്ആര്ടിസി എംപ്ലോയീസ് അസോസിയേഷന്(സിഐടിയു) നടത്തുന്ന ജനകീയ മാര്ച്ച് കാസര്കോട് ഉദ്ഘാടനം ചെയ്യുകയായിരുന്നു എളമരം കരീം. കഴിഞ്ഞ പാര്ട്ടി കോണ്ഗ്രസിലാണ് സിഐടിയു സംസ്ഥാന ജനറല് സെക്രട്ടറി കൂടിയായ എളമരം കരീമിനെ സിപിഎം കേന്ദ്ര കമ്മിറ്റിയില് എടുത്തത്.
'ഒരുത്തന് കണ്ണുപൊട്ടന്, അപ്പോള് മറ്റൊരുത്തന് ചെവി കേള്ക്കാത്തവന്, അടുത്ത മന്ത്രി കാല് മൊടന്തന്, മൂന്നാമത്തെ മന്ത്രി എല്കെജി വിദ്യാര്ത്ഥികള്ക്ക്, നാലാമത്രെ മന്ത്രി യുകെജി വിദ്യാര്ത്ഥികള്ക്ക്. ഇങ്ങനെ പോയി തിരുവഞ്ചൂരിന് പ്രഖ്യാപിയ്ക്കാന് ഒന്നും കണ്ടില്ല. അപ്പോള് ഹയര് സെക്കന്ഡറി വരെയുള്ള വിദ്യാര്ത്ഥികള്ക്ക് മൂപ്പരും പ്രഖ്യാപിച്ചു. സൗജന്യം പ്രഖ്യാപിച്ച ഇനത്തില് എത്ര കോടി ഉറുപ്പിക ഗണ്മെന്റ് കൊടുക്കാനുണ്ടെന്നറിയാമോ'- എളമരം കരീമിന്റെ വാക്കുകള് ഇങ്ങനെയാണ്.
വികലാംഗന് എന്ന വാക്ക് തന്നെ സാമൂഹിക നിഘണ്ടുവില് നിന്ന് എടുത്ത് കളയുന്ന കാലത്താണ് സിപിഎമ്മിന്റെ ഒരു മുതിര്ന്ന നേതാവ് ഇത്തരം പദപ്രയോഗങ്ങള് നടത്തുന്നത്. സിപിഎമ്മിന്റെ കേന്ദ്ര കമ്മിറ്റിയില് ഭിന്ന ശേഷിയുളളവരുടെ സംഘടനാ പ്രതിനിധിയെ പ്രത്യേക ക്ഷണിതാവാക്കുന്ന കാലത്താണ് ഒരു കേന്ദ്ര കമ്മിറ്റി അംഗം ഇങ്ങനെ പറയുന്നത്.
കരീമിന്റെ വാക്കുകള് ഇപ്പോള് തന്നെ സോഷ്യല് മീഡിയയില് വലിയ ചര്ച്ചയായിക്കഴിഞ്ഞു.