ചാനലുകാരെ പേടിച്ച് ഫാദര് കൊക്കന്റെ നിലവിളി
തൃശൂര്: ഒല്ലൂരില് ഒമ്പത് വയസ്സുകാരിയെ പീഡിപ്പിച്ച വൈദികന് മാധ്യമ പ്രവര്ത്തകര്ക്ക് മുന്നിലെത്തിയപ്പോള് നിലവിളി. ക്യാമറയില് പകര്ത്താന് ശ്രമിച്ചപ്പോള് നിലവിളിച്ചുകൊണ്ട് പോലീസ് സ്റ്റേഷനകത്തേക്ക് ഓടി മറയാന് ശ്രമിക്കുകയാണ് ഫാദര് രാജു കൊക്കന് ചെയ്തത്.
മെയ് നാലിന് വൈകീട്ടോടെ നാഗര്കോവിലില് വച്ചാണ് പീഡന കേസിലെ പ്രതിയായ വൈദികനെ ഷാഡോപോലീസ് പിടികൂടിയത്. മെയ് അഞ്ചിന് തൃശൂര് പോലീസ് സ്റ്റേഷനില് എത്തിച്ചപ്പോഴായിരുന്നു വികാര പ്രകടനം.
പിന്നീട് കോടതിയില് ഹാജരാക്കിയ ഫാദര് കൊക്കനെ രണ്ടാഴ്ചത്തേക്ക് റിമാന്റ് ചെയ്തിരിക്കുകയാണ്. തുണികൊണ്ട് മുഖം മറച്ചാണ് രാജു കൊക്കന് കോടതിയില് നിന്ന് പുറത്തേക്കിറങ്ങിയത്. ചാനല് ക്യാമറകളില് മുഖം പതിയാതിരിക്കാന് പരമാവധി ശ്രമിച്ചിരുന്നു.
ഏപ്രില് 24 നാണ് ഫാദര് രാജു കൊക്കനെതിരെ പെണ്കുട്ടിയുടെ രക്ഷിതാക്കള് പോലീസില് പരാതി നല്കിയത്. കുര്ബാന വസ്ത്രം നല്കാമെന്ന് പറഞ്ഞ് പെണ്കുട്ടിയെ മൂന്ന് തവണയാണ് വൈദികന് ലൈംഗികമായി പീഡിപിച്ചത്. പെണ്കുട്ടിയുടെ നഗ്ന ചിത്രങ്ങളും ഇയാള് മൊബൈല് ഫോണില് പകര്ത്തിയിരുന്നു.
മൊബൈല് ഫോണ് കേന്ദ്രീകരിച്ചുള്ള അന്വേഷണത്തിനൊടുവിലാണ് രാജു കൊക്കന് പിടിയിലായത്. വൈദികനെ രക്ഷിക്കാന് പോലീസിന്റെ ഭാഗത്ത് നിന്ന് ശ്രമമുണ്ടായിരുന്നതായി ആരോപണം ഉയര്ന്നിരുന്നു. കേസില് കുടുങ്ങിയ ഫാദര് കൊക്കനെ സഭ സസ്പെന്ഡ് ചെയ്തിരിക്കുകയാണ് .