കണ്ടക്ടറുടെ ശല്യം പരിധിവിട്ടു, വിദ്യാര്‍ഥിനി ചെയ്തത്!! ഇത് അയാളുടെ സ്ഥിരം 'കലാപരിപാടി'യെന്ന് !!

സ്റ്റോപ്പില്‍ ഇറങ്ങവെ ബസ് മുന്നോട്ട് എടുത്തതിനെ തുടര്‍ന്ന് പെണ്‍കുട്ടിക്കു പരിക്കേറ്റു

By Manu

Published: Tuesday, February 7, 2017, 10:28 [IST]

രാജപുരം: കാസര്‍ഗോഡ് ജില്ലയിലെ രാജപുരത്ത് വിദ്യാര്‍ഥിനിക്ക് ബസില്‍ നിന്ന് ഇറങ്ങുന്നതിനിടെ വീണു പരിക്കേറ്റു. കണ്ടക്ടറുടെ ശല്യം സഹിക്കാനാവാതെ ബസ് നിര്‍ത്തിച്ച് ഇറങ്ങിയ സെയ്ന്റ് പയന്‍സ് ടെന്‍ത്ത് കോളേജിലെ ഒന്നാം വര്‍ഷ ബിരുദ വിദ്യാര്‍ഥിനി ശ്രീന കെ നമ്പ്യാര്‍ക്കാണ് (18) പരിക്കേറ്റത്. പെണ്‍കുട്ടിയെ ആശുപത്രിയില്‍ പ്രവേശിപ്പിച്ചു. കണ്ടക്ടര്‍ പാണത്തൂര്‍ മാവുങ്കാലിലെ പ്രവീണിനെ പോലിസ് അറസ്റ്റ് ചെയ്തിട്ടുണ്ട്.

തിരക്ക് കുറവായിരുന്നിട്ടും മുന്നില്‍ നിന്ന് പിറകിലേക്ക് മാറി നില്‍ക്കാന്‍ കണ്ടക്ടര്‍ ശ്രീനയോട് ആവശ്യപ്പെടുകയായിരുന്നു. ഇതിന് കൂട്ടാക്കാതിരുന്നതോടെ കണ്ടക്ടര്‍ വളരെ മോശമായി രീതിയില്‍ പെണ്‍കുട്ടിയോടു പെരുമാറുകയായിരുന്നു. ബസ് നിര്‍ത്തി തനിക്ക് ഇറങ്ങണമെന്ന് ശ്രീന ആവശ്യപ്പെട്ടെങ്കിലും കണ്ടക്ടര്‍ ഇതിനു സമ്മതിച്ചില്ല. സ്റ്റോപ്പില്‍ മാത്രമേ നിര്‍ത്തൂവെന്ന് ഇയാള്‍ ശകാരിക്കുകയും ചെയ്തു. ഒടുവില്‍ ബസ് സ്റ്റോപ്പില്‍ നിര്‍ത്തിയപ്പോള്‍ പെണ്‍കുട്ടി ഇറങ്ങാന്‍ ശ്രമിക്കവെയാണ് കണ്ടക്ടര്‍ നിര്‍ദേശിച്ചതിനെത്തുടര്‍ന്ന് ബസ് മുന്നോട്ടെട്ടുത്തത്. ബാലന്‍സ് തെറ്റിയ ശ്രീന റോഡിലേക്ക് തെറിച്ചു വീഴുകയും ചെയ്തു.

ബസിലുണ്ടായിരുന്ന മറ്റു വിദ്യാര്‍ഥിനികള്‍ ഇതു കണ്ട് ബഹളം വച്ചെങ്കിലും ഇവരെയും അവിടെ നിര്‍ബന്ധിച്ച് ഇറക്കി ബസ് പുറപ്പെടുകയായിരുന്നു. വിദ്യാര്‍ഥികളും നാട്ടുകാരും വിവരം നല്‍കിയതിനെ തുടര്‍ന്നാണ് പോലിസ് ബസ് തടഞ്ഞ് കണ്ടക്ടറെ അറസ്റ്റ് ചെയ്തത്. ഇതാദ്യമായല്ല കണ്ടക്ടറുടെ ഭാഗത്തുനിന്ന് മോശം പെരുമാറ്റമുണ്ടാവുന്നതെന്നും നേരത്തേയും ഇയാള്‍ അപമര്യാദയായി പെരുമാറിയിട്ടുണ്ടെന്നും പെണ്‍കുട്ടികള്‍ പറഞ്ഞു.

Published On February 7, 2017