പിവി അൻവറിന് പാർക്ക് പൂട്ടിയിടേണ്ടി വരില്ല! പാർക്കിന് പ്രവർത്തനം തുടരാമെന്ന് ഹൈക്കോടതി ഉത്തരവ്...
കക്കടാംപൊയിലിലാണ് പിവി അൻവറിന്റെ ഉടമസ്ഥതയിലുള്ള അമ്യൂസ്മെന്റ് വാട്ടർ തീം പാർക്ക് സ്ഥിതി ചെയ്യുന്നത്.
കൊച്ചി: നിലമ്പൂർ എംഎൽഎ പിവി അൻവറിന്റെ ഉടമസ്ഥതയിലുള്ള അമ്യൂസ്മെന്റ് പാർക്കിന് പ്രവർത്തനം തുടരാമെന്ന് ഹൈക്കോടതി ഉത്തരവ്. മലിനീകരണ നിയന്ത്രണ ബോർഡിന്റെ റിപ്പോർട്ടിനെ തുടർന്നാണ് ഹൈക്കോടതി പ്രവർത്തനാനുമതി നൽകിയത്.
കക്കടാംപൊയിലിലാണ് പിവി അൻവറിന്റെ ഉടമസ്ഥതയിലുള്ള അമ്യൂസ്മെന്റ് വാട്ടർ തീം പാർക്ക് സ്ഥിതി ചെയ്യുന്നത്. നടപടിക്രമങ്ങൾ പാലിക്കാത്തതിനെ തുടർന്ന് മലിനീകരണ നിയന്ത്രണ ബോർഡ് തന്നെയാണ് ആദ്യം പാർക്കിന് പ്രവർത്തനാനുമതി നിഷേധിച്ചത്.
പാർക്കിന്റെ നടപടിക്രമങ്ങൾ പാലിച്ചിട്ടില്ലെന്നും, നിയമലംഘനം നടത്തിയെന്നും കാണിച്ച് മലിനീകരണ നിയന്ത്രണ ബോർഡ് ഹൈക്കോടതിയിൽ നേരത്തെ റിപ്പോർട്ട് നൽകിയിരുന്നു. ബോർഡ് നിഷ്കർഷിക്കുന്ന നടപടിക്രമങ്ങൾ പാലിച്ചാൽ പാർക്കിന് പ്രവർത്തനാനുമതി നൽകുമെന്നും നേരത്തെ വ്യക്തമാക്കിയിരുന്നു.
മലിനീകരണ നിയന്ത്രണ ബോർഡ് പാർക്കിന്റെ പ്രവർത്തനാനുമതി റദ്ദാക്കിയതിനെതിരെ പിവി അൻവർ എംഎൽഎ ഹൈക്കോടതിയെ സമീപിച്ചിരുന്നു. തുടർന്ന് മലിനീകരണ നിയന്ത്രണ ബോർഡിനോട് ഏറ്റവും പുതിയ റിപ്പോർട്ട് നൽകാൻ ഹൈക്കോടതി നിർദേശിച്ചു. പാർക്ക് പാരിസ്ഥിതിക മലിനീകരണ നിയന്ത്രണ ചട്ടങ്ങൾ പാലിക്കുന്നുണ്ടെന്നാണ് മലിനീകരണ നിയന്ത്രണ ബോർഡ് കഴിഞ്ഞദിവസം റിപ്പോർട്ട് നൽകിയത്. ഇതിനെ തുടർന്നാണ് പാർക്കിന് പ്രവർത്തനം തുടരാമെന്ന് വ്യക്തമാക്കി ഹൈക്കോടതി ഉത്തരവ് പുറപ്പെടുവിച്ചത്.
Click it and Unblock the Notifications
Sign in with Google