കായികമായി നേരിടാനാണ് സിപിഎം തീരുമാനമെങ്കില് അതേ നാണയത്തില് തിരിച്ചടിക്കും: കെ സുധാകരന്
തിരുവനന്തപുരം: യുവാക്കളുടെ ആത്മാഭിമാനത്തിന് വിലപറഞ്ഞ തിരുവനന്തപുരം മേയര്ക്കെതിരായ കോണ്ഗ്രസിന്റെ ജനകീയ പ്രതിഷേധത്തെ കായികമായി നേരിടാനാണ് സിപിഎമ്മിന്റെ തീരുമാനമെങ്കില് അതേ നാണയത്തില് തിരിച്ചടിക്കുമെന്ന് കെപിസിസി പ്രസിഡന്റ് കെ.സുധാകരന് എംപി.
സംസ്ഥാന സര്ക്കാരും സിപിഎമ്മും തുടര്ച്ചയായി വഞ്ചിച്ച സംസ്ഥാനത്തെ യുവാക്കളുടെ പ്രതിഷേധമാണ് കെ.എസ്.യു പ്രവര്ത്തകര് രേഖപ്പെടുത്തിയത്.മേയറുടെ വഴി തടഞ്ഞ ചുണക്കുട്ടികളായ കെ.എസ്.യു പ്രവര്ത്തകരെ ഡി.വൈ.എഫ്.ഐ,സിപിഎം ക്രിമിനുകള് ക്രൂരമായി കണ്മുന്നിലിട്ട് തല്ലിചതച്ചിട്ടും പോലീസ് നിഷ്ക്രിയമായി നോക്കിനിന്നു. കൊടിയ മര്ദ്ദനമേറ്റുവാങ്ങിയ കെ.എസ്.യു പ്രവര്ത്തകരെ കയ്യാമം വെച്ച പോലീസ് അക്രമികളായ സിപിഎം പ്രവര്ത്തകരെ വെറുതെ വിടുകയും ചെയ്തു.
അധികാരത്തിന്റെ തണലില് സിപിഎം പ്രവര്ത്തകര് തിണ്ണമിടുക്ക് കാട്ടാന് മുതിരുമ്പോള് അതിന് കെ.എസ്.യുവിന്റെ കുട്ടികളെ ബലിയാടാക്കാമെന്ന് പോലീസ് സ്വപ്നം കാണണ്ട.സിപിഎമ്മിന്റെ വാറോല അനുസരിച്ചാണ് മേയര്ക്കെതിരെ പ്രതിഷേധിക്കുന്ന കെ.എസ്.യു,കോണ്ഗ്രസ് പ്രവര്ത്തകരെ പോലീസ് അറസ്റ്റ് ചെയ്യുന്നത്. അതേസമയം മേയര്ക്കെതിരായ ഗുരുതര ആരോപണം അന്വേഷിച്ച് കേസ് രജിസ്റ്റര് ചെയ്യാനോ, പ്രിന്സിപ്പാളിനെതിരെ കൊലവിളി നടത്തുന്ന എസ്.എഫ്.ഐ പ്രവര്ത്തകര്ക്കെതിരെയോ സംരംഭകരുടെ മേല് കുതിരകേറുന്ന ഇടതു തൊഴിലാളി സംഘടനയുടെ നേതാക്കള്ക്കെതിരെയോ നടപടി സ്വീകരിക്കാന് നട്ടെല്ലില്ലാത്ത പോലീസ് സിപിഎമ്മിന്റെ ക്വട്ടേഷന് ഏറ്റെടുത്ത് കോണ്ഗ്രസിനെ വിരട്ടാമെന്ന് കരുതണ്ടെന്നും സുധാകരന് പറഞ്ഞു.
അതേസമയം, കോര്പറേഷനിലെ നിയമനങ്ങള് സി.പി.എമ്മിന് വിട്ടുകൊടുത്ത മേയര്ക്കെതിരെ പ്രതിഷേധിക്കുന്നവരെ അടിച്ചമര്ത്താന് പൊലീസിന്റെ ജോലിയുമായി ഡി.വൈ.എഫ്ഐയും സി.പി.എമ്മും ഇറങ്ങിയിരിക്കുകയാണെന്ന് പ്രതിപക്ഷ നേതാവ് വി ഡി സതീശനും പറഞ്#ു. പാര്ട്ടി തന്നെ കോടതിയും പൊലീസും പബ്ലിക് സര്വീസ് കമ്മിഷനും എംപ്ലോയ്മെന്റ് എക്സേഞ്ചും ആകുകയാണ്. എസ്.ഐയും പൊലീസുകാരനും നോക്കി നില്ക്കുമ്പോഴാണ് പ്രിന്സിപ്പലിന്റെ മുട്ടുകാല് തല്ലിയൊടിക്കുമെന്ന് എസ്.എഫ്.ഐ ജില്ലാ സെക്രട്ടറി ഭീഷണിപ്പെടുത്തിയത്. എന്നിട്ടും പൊലീസ് ഒരു നടപടിയുമെടുത്തില്ല. മേയര്ക്കെതിരെ പ്രതിഷേധിച്ച കെ.എസ്.യുക്കാരെ റോഡിലിട്ട് ചവിട്ടിക്കൂട്ടിയതും പൊലീസ് നോക്കി നില്ക്കുമ്പോഴാണ്.
സ്കോട്ട്ലന്റ് യാഡിനെ വെല്ലുന്ന കേരളത്തിലെ പൊലീസ് എ.കെ.ജി സെന്ററില് അടിമപ്പണിയെടുക്കുകയാണ്. പൊലീസിനെ പൂര്ണമായും എ.കെ.ജി സെന്ററിന് പണയപ്പെടുത്തിയിരിക്കുകയാണ്. ഡി.ജി.പിക്കും ക്രമസമാധാന ചുമതലയുള്ള എ.ഡി.ജി.പിയും എ.കെ.ജി സെന്ററില് നിന്നും പറയുന്ന പണിയാണ് ചെയ്തുകൊണ്ടിരിക്കുന്നത്. ഒരു അക്രമവും നടത്താതെ സമരം ചെയ്ത മൂന്ന് കെ.എസ്.യു പ്രവര്ത്തകരെ ഇന്നലെ റിമാന്ഡ് ചെയ്തു. പൊലീസ് കമ്മിഷണര് ഉള്പ്പെടെയുള്ളവര് പാര്ട്ടി ഓഫീസില് നിന്നും എഴുതിക്കൊടുത്ത പേരനുസരിച്ചാണ് മൂന്നു പേരെയും റിമാന്ഡ് ചെയ്തതെന്ന് വി ഡി സതീശന് വ്യക്തമാക്കി.
Click it and Unblock the Notifications
Sign in with Google