വടക്കന് കേരളത്തില് കനത്ത മഴ തുടരുന്നു, 5 ജില്ലകളില് വിദ്യാഭ്യാസ സ്ഥാപനങ്ങള്ക്ക് അവധി
തിരുവനന്തപുരം: വടക്കന് കേരളത്തില് കനത്ത മഴ തുടരുന്നു. നാളെ അഞ്ച് ജില്ലകളിലെ വിദ്യാഭ്യാസ സ്ഥാപനങ്ങള്ക്ക് നാളെ അവധി പ്രഖ്യാപിച്ചു. കണ്ണൂര്, കാസര്കോട്, പാലക്കാട്, വയനാട്, കോഴിക്കോട് ജില്ലകളിലെ വിദ്യാഭ്യാസ സ്ഥാപനങ്ങള്ക്കാണ് അവധി. വയനാട്ടില് മുന്കൂട്ടി നിശ്ചയിച്ച പരീക്ഷകള്ക്കും പിഎസ്സി പരീക്ഷകള്ക്കും മാറ്റമില്ല.
കാസര്കോട്, വയനാട്, കണ്ണൂര് ജില്ലകളില് റെഡ് അലര്ട്ട് പ്രഖ്യാപിച്ചു. ഏഴ് ജില്ലകളില് ഓറഞ്ച് അലട്ടും പ്രഖ്യാപിച്ചിട്ടുണ്ട്. കനത്ത മഴയില് രണ്ട് പേര് മരിച്ചു. വെള്ളക്കെട്ടില് വീണാണ് രണ്ട് പേര് മരിച്ചത്. മഞ്ചേരിയിലെ പാറമടയില് കാണാതായ ഒഡീഷ സ്വദേശി ഡിസ്ക് മാന്റിഗയുടെ മൃതദേഹം ഇന്ന് രാവിലെ കണ്ടെത്തി.
കോട്ടയം മാളിയേക്കടവില് താറാവ് കര്ഷകനും മുങ്ങി മരിച്ചു. പാടശേഖരത്തിലൂടെ താറാവുകളെ കൊണ്ടുപോകുന്നതിനിടെയാണ് അപകടം. പുഴകളില് ജലനിരപ്പുയര്ന്നതോടെ താഴ്ന്ന പ്രദേശങ്ങള് വെള്ളത്തിനടിയിലായി. കാസര്കോട് അങ്കണവാടികളും മദ്രസകളും അടക്കമുള്ള വിദ്യാഭ്യാസ സ്ഥാപനങ്ങള്ക്ക് നാളെ അവധിയായിരിക്കും. കോളേജുകള്ക്ക് അവധി ബാധകമല്ല.
വടക്കന് കേരളത്തില് ഇപ്പോഴും അതിതീവ്ര മഴ മുന്നറിയിപ്പാണ് കാലാവസ്ഥ നിരീക്ഷണ കേന്ദ്രം നല്കിയിരിക്കുന്നത്. കോട്ടയം, എറണാകുളം, ഇടുക്കി, തൃശൂര്, പാലക്കാട്, മലപ്പുറം, കോഴിക്കോട് ജില്ലകളില് ഓറഞ്ച് അലര്ട്ട് തുടരുകയാണ്. മറ്റ് യെല്ലോ അലര്ട്ടാണ്. നാളെ കോഴിക്കോട് മുതല് കാസര്കോട് വരെയുള്ള ജില്ലകളില് ഓറഞ്ച് അലര്ട്ട് പ്രഖ്യാപിച്ചിട്ടുണ്ട്.
അതേസമയം കോഴിക്കോട് ജില്ലയില് നാളെ വിദ്യാഭ്യാസ സ്ഥാപനങ്ങള്ക്ക് അവധി. ജില്ലയിലെ ഹയര് സെക്കന്ഡറി, വൊക്കേഷനല് ഹയര് സെക്കന്ഡറി ഉള്പ്പെടെയുള്ള സ്കൂളുള്ക്കാണ് അവധി പൊതുവിദ്യാഭ്യാസ ഡയറക്ടര് അവധി പ്രഖ്യാപിച്ചത്.
ജില്ലയില് മഴ ശക്തമായി തുടരുന്ന സാഹചര്യത്തില് അതത് പ്രദേശങ്ങളിലെ സാഹചര്യങ്ങള് പരിഗണിച്ച് സ്കൂളുകള്ക്ക് അവധി നല്കുന്ന കാര്യത്തില് പ്രധാനാധ്യാപകര്ക്കും പ്രിന്സിപ്പല്മാര്ക്കും ബന്ധപ്പെട്ട വിദ്യാഭ്യാസ ഓഫീസര്മാരുമായി ആലോചിച്ച് തീരുമാനം എടുക്കാമെന്ന് കളക്ടര് സ്നേഹില് കുമാര് സിംഗ് അറിയിച്ചിരുന്നു.
വിദ്യാര്ത്ഥികളുടെ സുരക്ഷ മുന്നിര്ത്തി ഇക്കാര്യത്തില് അനുയോജ്യമായ തീരുമാനം കൈക്കൊള്ളാം. ആശ്യമായ ഘട്ടങ്ങളില് ജില്ലാ തലത്തില് വിദ്യാഭ്യാസ സ്ഥാപനങ്ങള് അവധി പ്രഖ്യാപിക്കുമെന്നും കളക്ടര് പറഞ്ഞു.
അതേസമയം മലയോര മേഖലകളില് അതീവ ജാഗ്രത വേണമെന്ന് മുന്നറിയിപ്പുണ്ട്. ഉരുള്പ്പൊട്ടല്, മണ്ണിടിച്ചില്, മലവെള്ളപ്പാച്ചില് സാധ്യത കരുതിയിരിക്കണം. താഴ്ന്ന പ്രദേശങ്ങളില് വെള്ളക്കെട്ട് രൂപപ്പെടാനും സാധ്യതയുണ്ട്. കേരള തീരത്ത് ഉയര്ന്ന തിരമാലകള്ക്കും കടല് പ്രക്ഷുബ്ധമാകാനും സാധ്യതയുണ്ട്.
കണ്ണൂര്, കാസര്കോട്, തീരങ്ങളില് പ്രത്യേക ജാഗ്രത വേണം, കള്ളക്കടല് പ്രതിഭാസത്തിനും സാധ്യതയുണ്ട്. മത്സ്യബന്ധനത്തിനുള്ള വിലക്ക് തുടരുകയാണ്. കനത്ത മഴയില് കണ്ണൂരില് പുഴകള് കരകവിഞ്ഞു. താഴ്ന്ന പ്രദേശങ്ങളില് വെള്ളം കയറിയ വീടുകളില് നിന്ന് ആളുകളെ ഒഴിപ്പിക്കുന്നത് തുടരുകയാണ്.
Click it and Unblock the Notifications
Sign in with Google