'തനി ദേശാഭിമാനി ലേഖകനായി താങ്കള് അധഃപതിക്കുമെന്ന് വിചാരിച്ചില്ല': എംവി ഗോവിന്ദനെതിരെ സുധാകരന്
തിരുവനന്തപുരം: സി പി എം സംസ്ഥാന സെക്രട്ടറി എം വി ഗോവിന്ദനെതിരെ രൂക്ഷവിമര്ശനവുമായി കെ പി സി സി അധ്യക്ഷന് കെ സുധാകരന് രംഗത്ത്. തലച്ചോറില് അശ്ലീലം നിറച്ചൊരു 'തനി' ദേശാഭിമാനി ലേഖകനായി ഇത്ര പെട്ടെന്ന് താങ്കള് അധഃപതിക്കുമെന്ന് ഞാന് വിചാരിച്ചിരുന്നില്ലെന്ന് കെ സുധാകരന് പറഞ്ഞു. മോന്സന് മാവുങ്കല് പ്രതിയായ പോക്സോ കേസില് കെ സുധാകരനെതിരെ ആരോപണവുമായി എം വി ഗോവിന്ദന് രംഗത്തെത്തിയിരുന്നു. ഈ ആരോപണങ്ങളുടെ പശ്ചാത്തലത്തിലാണ് വിമര്ശനം.
'എന്താണ് ഗോവിന്ദന്? ഇതാണോ രാഷ്ട്രീയം? അല്പമെങ്കിലും സംസ്കാരത്തോടെ രാഷ്ട്രീയ ആരോപണങ്ങള് ഉന്നയിക്കാന് നിങ്ങള്ക്കും സിപിഎമ്മിനും നാളിതുവരെയും കഴിയാതെ പോകുന്നത് എന്തുകൊണ്ടാണ്? നാട്ടിലെ മുഴുവന് മാധ്യമങ്ങളെയും വിരട്ടി, ജനങ്ങളുടെ മുന്നിലൊരു കോമാളി പരിവേഷത്തില് സ്വയം നില്ക്കുമ്പോള്, ഇത്ര വേഗം അടുത്ത വിഡ്ഢിത്തവുമായി ഇറങ്ങണമായിരുന്നോ?'
'പൊലീസും കേസുമൊക്കെ കാണിച്ചു വിരട്ടിയാല് ഉടന് തന്നെ കേന്ദ്രത്തിലെ യജമാനന്റെ കാലില് വീഴുന്നൊരു പിണറായി വിജയനെ താങ്കള്ക്ക് പരിചയമുണ്ടാകും. ആ തുലാസ്സും കൊണ്ട് മറ്റുള്ളവരെ അളക്കാന് വരരുത്, ഗോവിന്ദന്'- കെ സുധാകരന് ഫേസ്ബുക്കില് കുറിച്ചു. അതേസമയം, മോന്സന് പീഡിപ്പിക്കുമ്പോള് കെ സുധാകരനും വീട്ടിലുണ്ടായിരുന്നുവെന്ന് അതിജീവിതയായ പെണ്കുട്ടി തന്നെ വെളിപ്പെടുത്തിയിട്ടുണ്ടെന്നാണ് എം വി ഗോവിന്ദന് ആരോപിച്ചത്. മാധ്യമ വാര്ത്തകളെയും ക്രൈം ബ്രാഞ്ചിനെയും ഉദ്ധരിച്ചാണ് താന് ഇത്തരമൊരു കാര്യം പറയുന്നതെന്നും അദ്ദേഹം പറഞ്ഞു.
എന്നാല് ഇക്കാര്യം തള്ളി ക്രൈംബ്രാഞ്ചും രംഗത്തെത്തിയിരുന്നു. കെ സുധാകരനെ മോന്സന് മാവുങ്കലുമായി ബന്ധപ്പെട്ട തട്ടിപ്പ് കേസില് മാത്രമാണ് വിളിപ്പിച്ചതെന്നാണ് ക്രൈംബ്രാഞ്ച് നല്കുന്ന വിശദീകരണം. സുധാകരനെതിരെ അതിജീവിതയുടെ ഭാഗത്ത് നിന്ന് ഇത്തരത്തിലുള്ളൊരു മൊഴിയില്ല. എല്ലാ ആരോപണങ്ങളിലും ചോദ്യം ചെയ്യലില് വ്യക്തത വരുത്തുമെന്നും ക്രൈംബ്രാഞ്ച് അറിയിച്ചിരുന്നു.
കെ സുധാകകരന്റെ ഫേസ്ബുക്ക് പോസ്റ്റിന്റെ പൂര്ണരൂപം
സിപിഎമ്മിന്റെ 'അശ്ലീല' സെക്രട്ടറിയോടാണ്..
ഇരിക്കുന്ന സ്ഥാനത്തിന്റെ മാന്യതയെങ്കിലും കാണിക്കണമെന്ന് താങ്കളോട് പറയണമെന്നുണ്ട്. പക്ഷേ ഒന്നോര്ത്താല് ആ സ്ഥാനത്തിന്റെ നിലവാരം തന്നെയാണ് താങ്കള് ഇപ്പോള് കാണിക്കുന്നതും! ആന്തൂരിലെ സാജനെ 'കൊന്ന' ശേഷം, അയാളുടെ ഭാര്യക്ക് അവിഹിത ബന്ധമുണ്ടെന്ന് ആരോപിച്ച ശ്യാമളയുടെ ഭര്ത്താവിനോട് 'മാന്യത' കാണിക്കണമെന്ന് പറയുന്നത് ഒരല്പം കടന്ന കൈയ്യാണ്. എന്നാലും.... ഞരമ്പ് രോഗികളായ കമ്മ്യൂണിസ്റ്റ് അടിമകള് മാത്രമല്ല, 'മാന്യമായി' ജീവിക്കുന്ന ബാക്കിയുള്ള ജനങ്ങളും താങ്കളെ കേള്ക്കുന്നുണ്ടെന്ന് വെറുതെയെങ്കിലുമൊക്കെ ഓര്ക്കുക.
തലച്ചോറില് അശ്ലീലം നിറച്ചൊരു 'തനി' ദേശാഭിമാനി ലേഖകനായി ഇത്ര പെട്ടെന്ന് താങ്കള് അധഃപതിക്കുമെന്ന് ഞാന് വിചാരിച്ചിരുന്നില്ല. എന്താണ് ഗോവിന്ദന്? ഇതാണോ രാഷ്ട്രീയം? അല്പമെങ്കിലും സംസ്കാരത്തോടെ രാഷ്ട്രീയ ആരോപണങ്ങള് ഉന്നയിക്കാന് നിങ്ങള്ക്കും സിപിഎമ്മിനും നാളിതുവരെയും കഴിയാതെ പോകുന്നത് എന്തുകൊണ്ടാണ്?
നാട്ടിലെ മുഴുവന് മാധ്യമങ്ങളെയും വിരട്ടി, ജനങ്ങളുടെ മുന്നിലൊരു കോമാളി പരിവേഷത്തില് സ്വയം നില്ക്കുമ്പോള്, ഇത്ര വേഗം അടുത്ത വിഡ്ഢിത്തവുമായി ഇറങ്ങണമായിരുന്നോ? വിദൂഷക വേഷത്തില് കണ്വീനര് സ്ഥാനത്തിരിക്കുന്ന ആളോട് മത്സരിക്കാനാണോ പാര്ട്ടി സെക്രട്ടറിയായി താങ്കളെ നിയമിച്ചിരിക്കുന്നതെന്ന് കേരളം സംശയിക്കുന്നുണ്ട്.
പോലീസും കേസുമൊക്കെ കാണിച്ചു വിരട്ടിയാല് ഉടന് തന്നെ കേന്ദ്രത്തിലെ യജമാനന്റെ കാലില് വീഴുന്നൊരു പിണറായി വിജയനെ താങ്കള്ക്ക് പരിചയമുണ്ടാകും. ആ തുലാസ്സും കൊണ്ട് മറ്റുള്ളവരെ അളക്കാന് വരരുത്, ഗോവിന്ദന്.
Click it and Unblock the Notifications
Sign in with Google