പകര്ച്ചപ്പനി ഭീതി ഉയരുന്നു, എലിപ്പനി ബാധിച്ച് മരിച്ചവരുടെ എണ്ണം 14 ആയി
തിരുവനന്തപുരം: സംസ്ഥാനത്ത് പകര്ച്ചപ്പനി ഭീതി ഉയരുന്നു. വിവിധ ജില്ലകളില് എലിപ്പനിയും ഡെങ്കിപ്പനിയും റിപ്പോര്ട്ട് ചെയ്തിട്ടുണ്ട്. ഇന്ന് മൂന്ന് പേര് കൂടി മരണപ്പെട്ടതോടെ സംസ്ഥാനത്ത് എലിപ്പനി ബാധിച്ച് മരിച്ചവരുടെ എണ്ണം 14 ആയി ഉയര്ന്നു.
എല്ലാ ജില്ലകളിലേയും ആരോഗ്യ വകുപ്പ് ഉദ്യോഗസ്ഥരുടെ ഉന്നതതല യോഗം വിളിച്ച് പകര്ച്ചവ്യാധി പ്രതിരോധം ശക്തമാക്കാന് നിര്ദേശം നല്കിയെന്ന് ആരോഗ്യ വകുപ്പ് മന്ത്രി വീണാ ജോർജ് വ്യക്തമാക്കി. കാലാവസ്ഥാ വ്യതിയാനവും മഴയും കാരണം പകര്ച്ചവ്യാധി കൂടാന് സാധ്യതയുള്ള സാഹഹചര്യം മുന്നില് കണ്ട് ജില്ലകള് പ്രവര്ത്തനങ്ങള് ഊര്ജിതമാക്കണം. ആരോഗ്യ ജാഗ്രത പ്രവര്ത്തനങ്ങള് ശക്തമാക്കണം. അതിഥി തൊഴിലാളികള് താമസിക്കുന്ന സ്ഥലങ്ങള് ശ്രദ്ധിക്കേണ്ടതാണ്. പകര്ച്ചവ്യാധികള് ഉണ്ടാകാന് സാധ്യതയുള്ള ഹോട്ട് സ്പോട്ടുകള് നിശ്ചയിച്ച് കൃത്യമായ ഇടപെടലുകള് നടത്തണം. സംസ്ഥാനതല നിരീക്ഷണം ശക്തമാക്കണമെന്നും നിര്ദേശം നല്കി.
ഡെങ്കിപ്പനി, എലിപ്പനി, മലേറിയ, എച്ച്1 എന്1, ചിക്കന്ഗുനിയ, മഞ്ഞപ്പിത്തം, കോളറ, സിക, ഷിഗല്ല തുടങ്ങിയ രോഗങ്ങള്ക്കെതിരെ ജാഗ്രത പാലിക്കേണ്ടതാണ്. ഡെങ്കിപ്പനി, എലിപ്പനി എന്നിവയ്ക്കെതിരെ അതീവ ജാഗ്രത പാലിക്കണം. എറണാകുളം, തിരുവനന്തപുരം, ആലപ്പുഴ, പാലക്കാട്, കാസര്ഗോഡ്, തൃശൂര് എന്നീ ജില്ലകളിലാണ് ഡെങ്കിപ്പനി കൂടുതല് റിപ്പോര്ട്ട് ചെയ്തിട്ടുള്ളത്. പത്തനംതിട്ട, ആലപ്പുഴ, എറണാകുളം, തിരുവനന്തപുരം, മലപ്പുറം, കോട്ടയം, കാസര്ഗോഡ്, വയനാട്, കോഴിക്കോട് ജില്ലകളിലാണ് എലിപ്പനി കൂടുതല് റിപ്പോര്ട്ട് ചെയ്യുന്നത്. കോഴിക്കോടാണ് ഏറ്റവും കൂടുതല് ഷിഗല്ല കേസ് റിപ്പോര്ട്ട് ചെയ്തത്. കാസര്ഗോഡ്, മലപ്പുറം, തൃശൂര്, പാലക്കാട് ജില്ലകളും ശ്രദ്ധിക്കണം.
നീണ്ടുനില്ക്കുന്ന പനിയാണെങ്കില് ഏത് പനിയാണെന്ന് ഉറപ്പിക്കണം. ജലജന്യ ജന്തുജന്യ രോഗങ്ങള് പ്രത്യേകം ശ്രദ്ധിക്കണം. കുടിക്കുന്നത് ശുദ്ധജലമാണെന്ന് ഉറപ്പ് വരുത്തണം. വയറിളക്ക രോഗങ്ങള് ഉണ്ടാകാതിരിക്കാന് ജാഗ്രത പാലിക്കണം. വെള്ളം ക്ലോറിനേറ്റ് ചെയ്യണം. ഭക്ഷണവും വെള്ളവും അടച്ച് സൂക്ഷിക്കുക. വൃത്തി വളരെ പ്രധാനമാണ്. പഴകിയ ഭക്ഷണം കഴിക്കരുത്. കൊതുക് കടിയേല്ക്കാതെ നോക്കണം. വീടും സ്ഥാപനവും പരിസരവും വൃത്തിയായി സൂക്ഷിക്കണം. മലിനജലവുമായോ മണ്ണുമായോ ഇടപെടുന്നവര് എലിപ്പനി പ്രതിരോധ ഗുളികയായ ഡോക്സിസൈക്ലിന് കഴിക്കേണ്ടതാണ്.
Click it and Unblock the Notifications
Sign in with Google