പി.കെ ശശി ഒറ്റപ്പാലത്ത് യുഡിഎഫ് സ്ഥാനാർത്ഥി? ഔദ്യോഗിക പ്രഖ്യാപനത്തിന് മുൻപേ പോസ്റ്ററുകൾ

സിപിഎമ്മിൽ നിന്ന് പുറത്തുവന്ന മുൻ എംഎൽഎ പി കെ ശശി ഒറ്റപ്പാലം നിയോജക മണ്ഡലത്തിൽ യുഡിഎഫ് സ്ഥാനാർത്ഥിയായേക്കുമെന്ന് ശക്തമായ സൂചന. യുഡിഎഫിന്റെ ഔദ്യോഗിക സ്ഥാനാർത്ഥി പ്രഖ്യാപനം വരുന്നതിന് മുൻപ് തന്നെ മണ്ഡലത്തിന്റെ വിവിധ ഭാഗങ്ങളിൽ ശശിയെ അനുകൂലിച്ചുകൊണ്ടുള്ള പോസ്റ്ററുകൾ പ്രത്യക്ഷപ്പെട്ടു കഴിഞ്ഞു.

കോൺഗ്രസ് ഓഫീസുകളിൽ പ്രചാരണ ബോർഡുകൾ

ഒറ്റപ്പാലത്തെ ബ്ലോക്ക് കോൺഗ്രസ് ആസ്ഥാനത്താണ് പി കെ ശശിക്കായി ആദ്യമായി പ്രചാരണ ബോർഡുകൾ സ്ഥാപിച്ചത്. 'ഒറ്റപ്പാലം നിയോജക മണ്ഡലം യുഡിഎഫ് സ്ഥാനാർത്ഥി പി കെ ശശിയെ വിജയിപ്പിക്കുക' എന്ന അഭ്യർത്ഥനയുമായാണ് ബോർഡുകൾ പ്രത്യക്ഷപ്പെട്ടിരിക്കുന്നത്. ശശി സ്വതന്ത്ര സ്ഥാനാർത്ഥിയായി മത്സരിക്കുകയും യുഡിഎഫ് പുറത്തുനിന്ന് പിന്തുണയ്ക്കുകയും ചെയ്യുമെന്നായിരുന്നു ആദ്യഘട്ടത്തിലെ അഭ്യൂഹങ്ങൾ. എന്നാൽ ഇപ്പോൾ പുറത്തുവന്ന പോസ്റ്ററുകൾ അദ്ദേഹം യുഡിഎഫിന്റെ നേരിട്ടുള്ള സ്ഥാനാർത്ഥിയാകുമെന്ന സൂചനയാണ് നൽകുന്നത്. അതേസമയം, പോസ്റ്ററുകളിൽ ചിഹ്നം വ്യക്തമാക്കിയിട്ടില്ല.

പാലക്കാട്ടെ രാഷ്ട്രീയ മാറ്റങ്ങൾ

സിപിഎമ്മിലെ പ്രമുഖ നേതാവായിരുന്ന പി കെ ശശി യുഡിഎഫ് പാളയത്തിലേക്ക് എത്തുന്നത് പാലക്കാട്ടെ രാഷ്ട്രീയ സമവാക്യങ്ങളിൽ വലിയ മാറ്റങ്ങൾ ഉണ്ടാക്കുമെന്നാണ് കരുതപ്പെടുന്നത്. പാർട്ടിയിലെ ആഭ്യന്തര കലഹങ്ങളെത്തുടർന്നാണ് അദ്ദേഹം സിപിഎം ബന്ധം ഉപേക്ഷിച്ചത്. പാലക്കാട് ജില്ലയിലെ സ്വാധീനമുള്ള നേതാവായ ശശിയുടെ വരവ് മണ്ഡലത്തിൽ ഇടത് മുന്നണിക്ക് വലിയ വെല്ലുവിളിയാകും.

കൂടുമാറി എത്തുന്നവർക്ക് കോൺഗ്രസ് കൈ കൊടുക്കുന്നു

ഈ തിരഞ്ഞെടുപ്പ് കാലത്ത് സിപിഎമ്മിൽ നിന്ന് കൂടുമാറി എത്തുന്ന പ്രമുഖ നേതാക്കളെ സ്വാഗതം ചെയ്യുന്ന നയമാണ് യുഡിഎഫ് സ്വീകരിക്കുന്നത്. കൊല്ലത്തെ പ്രമുഖ സിപിഎം നേതാവായിരുന്ന ഐഷ പോറ്റി കൊട്ടാരക്കരയിൽ യുഡിഎഫ് സ്ഥാനാർത്ഥിയായി അങ്കത്തിനിറങ്ങുന്നുണ്ട്. ഇതിന് പിന്നാലെയാണ് പി കെ ശശിയുടെയും സ്ഥാനാർത്ഥിത്വം ചർച്ചയാകുന്നത്. കൂടാതെ മുൻ മുഖ്യമന്ത്രി വി എസ് അച്യുതാനന്ദന്‍റെ പേഴ്സണൽ സ്റ്റാഫായിരുന്ന എസ് സുരേഷിനും വലിയ പരിഗണനയാണ് നൽകിയിരിക്കുന്നത്. പാർട്ടി അംഗത്വമെടുത്ത സുരേഷിനെ വി എസിന്‍റെ സ്വന്തം മലമ്പുഴയിൽ തന്നെയാണ് പോരിനിറക്കിയിരിക്കുന്നത്.

ജി സുധാകരൻ ഉൾപ്പെടെയുള്ള മറ്റ് പ്രമുഖ നേതാക്കളും സിപിഎം വിട്ട പശ്ചാത്തലത്തിൽ, ഇവരെയെല്ലാം അണിനിരത്തിക്കൊണ്ട് ഇടത് കോട്ടകൾ തകർക്കാനുള്ള നീക്കത്തിലാണ് യുഡിഎഫ് നേതൃത്വം. ഒറ്റപ്പാലത്തെ പി കെ ശശിയുടെ സ്ഥാനാർത്ഥിത്വം സംബന്ധിച്ച ഔദ്യോഗിക സ്ഥിരീകരണം വരും ദിവസങ്ങളിൽ ഉണ്ടാകുമെന്നാണ് രാഷ്ട്രീയ നിരീക്ഷകർ കരുതുന്നത്.