വിദ്യാര്ത്ഥിനിയോട് ദ്വയാര്ത്ഥ പ്രയോഗം; റിപ്പോര്ട്ടര് ചാനലിനും അരുണ് കുമാറിനുമെതിരെ പോക്സോ കേസ്
തിരുവനന്തപുരം: സംസ്ഥാന സ്കൂള് കലോത്സവത്തിലെ റിപ്പോര്ട്ടിംഗിനിടെ ദ്വയാര്ത്ഥ പ്രയോഗം നടത്തിയ സംഭവത്തില് റിപ്പോര്ട്ടര് ചാനലിന് എതിരെ പോക്സോ കേസ്. ബാലാവകാശ കമ്മീഷന്റെ പരാതിയിലാണ് കേസ് രജിസ്റ്റര് ചെയ്തിരിക്കുന്നത്. റിപ്പോര്ട്ടര് ചാനലിന്റെ കണ്സല്ട്ടിംഗ് എഡിറ്റര് അരുണ് കുമാറിനെ ഒന്നാം പ്രതിയാക്കിയാണ് തിരുവനന്തപുരം കന്റോണ്മെന്റ് പൊലീസ് കേസെടുത്തിരിക്കുന്നത്.
റിപ്പോര്ട്ടര് ഷഹബാസ്, കണ്ടാലറിയാവുന്ന മറ്റൊരു റിപ്പോര്ട്ടര് എന്നിവരടക്കം ആകെ മൂന്ന് പ്രതികള്ക്കെതിരെയാണ് കേസെടുത്തിരിക്കുന്നത്. സംഭവത്തില് നേരത്തെ ബാലാവകാശ കമ്മീഷനും കേസെടുത്തിരുന്നു. തിരുവനന്തപുരം ജില്ലാ ശിശു ക്ഷേമ സമിതി ഡിജിപിക്ക് നല്കിയ പരാതി കന്റോണ്മെന്റ് പൊലീസിന് കൈമാറുകയായിരുന്നു. കലോത്സവത്തില് പങ്കെടുത്ത ഒപ്പന ടീമില് മണവാട്ടിയായി വേഷമിട്ട പെണ്കുട്ടിയോട് ചാനലിലെ റിപ്പോര്ട്ടര് നടത്തിയ സംഭാഷണമാണ് കേസിനാധാരം.
പോക്സോ വകുപ്പിലെ 11, 12 വകുപ്പുകള് ചുമത്തിയാണ് കേസെടുത്തിരിക്കുന്നത്. പ്രായപൂര്ത്തിയാവാത്ത വിദ്യാര്ഥിനിയുടെ ആത്മാഭിമാനത്തെ കളങ്കപ്പെടുത്തിയെന്നാണ് എഫ്ഐആര്. നേരത്തെ ചാനല് മേധാവിയില് നിന്നും തിരുവനന്തപുരം ജില്ലാ പൊലീസ് മേധാവിയില് നിന്നും ബാലാവകാശ കമ്മിഷന് അടിയന്തര റിപ്പോര്ട്ട് തേടിയിരുന്നു. കലോത്സവുമായി ബന്ധപ്പെട്ട വാര്ത്താവതരണത്തില് അരുണ്കുമാര് സഭ്യമല്ലാത്ത ഭാഷയില് ദ്വയാര്ത്ഥ പ്രയോഗം നടത്തിയതുമായി ബന്ധപ്പെട്ടാണ് സ്വമേധയാ കേസെടുത്തതെന്ന് ബാലാവകാശ കമ്മീഷന് ചെയര്പേഴ്സണ് നേരത്തെ പറഞ്ഞിരുന്നു.
മത്സരത്തില് പങ്കെടുത്ത ഒപ്പന സംഘത്തിലെ മണവാട്ടിയോട് പ്രണയം തോന്നുന്ന റിപ്പോര്ട്ടര് എന്നതായിരുന്നു സ്റ്റോറിയുടെ ഉള്ളടക്കം. ഇത് സംപ്രേഷണം ചെയ്തതിന് പിന്നാലെ വലിയ വിവാദങ്ങള്ക്ക് വഴി വെച്ചിരുന്നു. സോഷ്യല് മീഡിയയിലും സംഭവത്തില് റിപ്പോര്ട്ടര് ചാനലിനെതിരെ വ്യാപകമായി വിമര്ശനം ഉയര്ന്നിരുന്നു
Click it and Unblock the Notifications
Sign in with Google