സാമ്പത്തികമായ പിന്നാക്കം നില്ക്കുന്നവര്ക്ക് സംവരണം; കോണ്ഗ്രസ് നിലപാട് വ്യക്തമാക്കി വിഡി സതീശന്
കോട്ടയം: നിലവില് സാമുദായിക സംവരണം ലഭിക്കുന്നവര്ക്ക് ഒരു ദോഷവും ഉണ്ടാകാത്ത തരത്തില് സാമ്പത്തികമായ പിന്നാക്കം നില്ക്കുന്നവര്ക്ക് സംവരണം നല്കണമെന്നതാണ് കോണ്ഗ്രസ് നിലപാടെന്ന് പ്രതിപക്ഷ നേതാവ് വി ഡി സതീശന് പറഞ്ഞു. സാമ്പത്തിക സംവരണത്തിന് കോണ്ഗ്രസ് എതിരല്ല. കെ.പി.സി.സി ഈ വിഷയം ചര്ച്ച ചെയ്ത് നിലപാട് സ്വീകരിച്ചിട്ടുണ്ട്. ദേശീയ തലത്തിലും കോണ്ഗ്രസ് ഈ നിലപാട് വ്യക്തമാക്കിയിട്ടുണ്ടെന്നും അദ്ദേഹം പറഞ്ഞു.
തിരുവനന്തപുരം കോര്പറേഷനില് നടന്ന ഗുരുതരമായ തെറ്റിനെതിരെയാണ് കോണ്ഗ്രസും യൂത്ത് കോണ്ഗ്രസും കെ.എസ്.യുവും സമരം നടത്തുന്നത്. സമരം അടിച്ചമര്ത്താനാണ് സര്ക്കാര് ശ്രമിക്കുന്നത്. കോര്പറേഷനിലെ 295 ഒഴിവുകളിലേക്ക് ആളെ നല്കണമെന്നാവശ്യപ്പെട്ട് മേയര് പാര്ട്ടി സെക്രട്ടറിക്ക് കത്തെഴുതിയത് ചെറുപ്പക്കാരെ മുഴുവന് ഞെട്ടിച്ച സംഭവമാണ്.
മേയറെ പാവയാക്കി കോര്പറേഷനില് സി.പി.എമ്മാണ് എല്ലാം ചെയ്യുന്നത്. തദ്ദേശസ്വയംഭരണ സ്ഥാപനങ്ങളില് മാത്രമല്ല സര്ക്കാര്, പൊതുമേഖലാ സ്ഥാപനങ്ങളിലും പിന്വാതില് നിയമനങ്ങളാണ് നടക്കുന്നത്. എംപ്ലോയിമെന്റ് എക്സേഞ്ചുകളെ നോക്കുകുത്തിയാക്കിയിരിക്കുകയാണ്. പിന്വാതില് നിയമനം കിട്ടയവര് പുറത്താകാതിരിക്കാനാണ് വകുപ്പ് തവന്മാര് പി.എസ്.സിക്ക് ഒഴിവ് റിപ്പോര്ട്ട് ചെയ്യാത്തത്. ഇപ്പോള് കത്ത് കൊടുത്തയാളും വാങ്ങിയ ആളുമില്ല.
കത്ത് എവിടെ നിന്നാണെന്ന് പോലും അറിയില്ലെന്ന് പറയുന്ന മേയറും സി.പി.എമ്മും ജനങ്ങളുടെ സാമാന്യബുദ്ധിയെ പരിഹസിക്കുകയാണ്. എന്താണ് നടന്നതെന്ന് അരിയാഹാരം കഴിക്കുന്ന എല്ലാവര്ക്കും അറിയാം. ആ അധ്യായം അടഞ്ഞു എന്നാണ് പാര്ട്ടി സെക്രട്ടറി പറഞ്ഞത്. അധ്യായം അടയ്ക്കുന്നതും തുറക്കുന്നതും പാര്ട്ടി സെക്രട്ടറിയാണോ? പാര്ട്ടി സെക്രട്ടറി പാര്ട്ടിയിലെ കാര്യങ്ങള് നോക്കിയാല് മതി. നിയമനങ്ങള് നടത്തേണ്ട. വ്യവസ്ഥാപിത മാര്ഗങ്ങളിലൂടെയല്ല നിയമനങ്ങള് നടത്തുന്നതെങ്കില് വലിയ സമരങ്ങള്ക്ക് കേരളം സാക്ഷിയാകുമെന്നും വി ഡി സതീശന് വ്യക്തമാക്കി.
അതേസമയം, മുന്നോക്ക സാമ്പത്തിക സംവരണം ശരിവെച്ച സുപ്രീംകോടതി വിധി സ്വാഗതാര്ഹമെന്ന് കെപിസിസി പ്രസിഡന്റ് കെ.സുധാകരന് എംപി പറഞ്ഞു. മുന്നോക്ക വിഭാഗങ്ങളിലെ സാമ്പത്തികമായി പിന്നാക്കം നില്ക്കുന്നവര്ക്ക് തൊഴില്,വിദ്യാഭ്യാസ മേഖലയില് പത്തുശതമാനം സംവരണം ഏര്പ്പെടുത്തുമ്പോള് സംവരണ വിഭാഗങ്ങളുടെ ആനുകൂല്യങ്ങളെ ബാധിക്കാതെയും അവരുടെ അവകാശത്തെ കവരാതെയും ഇത് നടപ്പാക്കാനുള്ള ഉത്തരവാദിത്തം സര്ക്കാരിനുണ്ട്.
നിലവില് അര്ഹതപ്പെട്ടവരുടെ അവകാശം നഷ്ടപ്പെടുത്തുന്ന നടപടി ഉണ്ടാകാന് പാടില്ല.സാമൂഹ്യനീതി ഉറപ്പാക്കേണ്ടത് അനിവാര്യവും അത്യാവശ്യമാണ്.പഠിക്കാന് കഴിവുണ്ടായിട്ടും വ്യവസ്ഥിതികളുടെ പേരില് നീതി നിഷേധിക്കുന്നതും മാറ്റിനിര്ത്തുന്നതും പരിഷ്കൃത സമൂഹത്തിന് ഉള്ക്കൊള്ളാന് സാധിക്കുന്നതല്ലെന്നും സുധാകരന് പറഞ്ഞു.
Click it and Unblock the Notifications
Sign in with Google