ദുബായ്:വാഹനാപകടം ഉണ്ടാക്കുന്നതില്‍ ഒന്നാമത് പാകിസ്താനികള്‍

ദുബായ്: ദുബായില്‍ ഏറ്റവും അധികം വാഹനാപകടങ്ങള്‍ ഉണ്ടാക്കുന്നതില്‍ മുന്‍ പന്തിയില്‍ നില്‍ക്കുന്ന വിദേശ രാജ്യക്കാര്‍ ആരാണെന്ന് അറിയാമോ? പാകിസ്താന്‍, ഇന്ത്യ, ബംഗ്ളാദേശ് എന്നീ രാജ്യങ്ങളില്‍ നിന്നുള്ളവരാണ് രാജ്യത്ത് ഏറ്റവും അധികം വാഹനാപകടങ്ങള്‍ ഉണ്ടാക്കുന്ന വിദേശ ഡ്രൈവര്‍മാര്‍. 2014 ജൂലൈ വരെയുള്ള അപകടത്തിന്റെ കണക്കുകള്‍ അനുസരിച്ച് 106 പേര്‍ക്കാണ് വാഹനാപകടങ്ങളില്‍ ജീവന്‍ നഷ്ടമായത്.

എമിറേറ്റില്‍ നിന്നുള്ള അപകടത്തിന്റെ കണക്കുകള്‍ പുറത്തു വരുമ്പോള്‍ ഏറ്റവും അധികം അപകടങ്ങള്‍ ഉണ്ടാക്കിയത് പാകിസ്താനികളാണ്. 189 അപകടങ്ങളാണ് ഇവര്‍ ഉണ്ടാക്കിയത്. 35 പേര്‍ക്ക് ജീവന്‍ നഷ്ടമായി.

രണ്ടാം സ്ഥാനത്ത് സ്വദേശികള്‍ തന്നെയാണ്. 158 അപകടങ്ങളാണ് ഇവര്‍ ഉണ്ടാക്കിയത്. ഇതില്‍ 22 പേര്‍ മരിച്ചു. ഇന്ത്യക്കാര്‍ മൂന്നാം സ്ഥാനത്താണ്. 142 അപകടങ്ങളും 20 മരണവുമാണ് ഇന്ത്യന്‍ ഡ്രൈവര്‍മാര്‍ രാജ്യത്തുണ്ടാക്കിയത്.

31 റോഡപകടങ്ങളാണ് ബംഗ്ളാദേശികള്‍ ഉണ്ടാക്കിയത്. ഇതില്‍ അഞ്ചു മരണവും സംഭവിച്ചു.2014 ജനവരി മുതല്‍ ജൂലൈ വരെയുള്ള കണക്കുകളാണ് ദുബായ് അധികൃതര്‍ പുറത്ത് വിട്ടത്. മുന്‍പും ദുബായില്‍ വാഹനാപകടങ്ങള്‍ ഉണ്ടാക്കുന്നതില്‍ ഏഷ്യന്‍ രാജ്യങ്ങള്‍ തന്നെയായിരുന്നു മുന്നില്‍.

English summary

UAE, Asian drivers have worst road safety records in Dubai