ഡല്ഹി-നോയിഡ എയര്പോര്ട്ട് യാത്ര 21 മിനുട്ടില്; അതിവേഗ റെയില് വരുന്നു, യുപി അംഗീകാരം
ഡൽഹിയും നോയിഡ അന്താരാഷ്ട്ര വിമാനത്താവളവും തമ്മിൽ ബന്ധിപ്പിക്കുന്ന റീജിയണൽ റാപ്പിഡ് ട്രാൻസിറ്റ് സിസ്റ്റത്തി (ആർആർടിഎസ്)ന്റെ വിശദമായ പദ്ധതി റിപ്പോർട്ടിന് (ഡിപിആർ) ഉത്തർപ്രദേശ് സർക്കാർ അംഗീകാരം നൽകി. ഇത് കേന്ദ്ര ഭവന, നഗരകാര്യ മന്ത്രാലയത്തിന് അയച്ചു. ഈ റെയിൽ പദ്ധതി നടപ്പിലാക്കുന്നതിലൂടെ ഡൽഹിക്കും വരാനിരിക്കുന്ന നോയിഡ അന്താരാഷ്ട്ര വിമാനത്താവളത്തിനും ഇടയിലുള്ള യാത്രാ സമയം 21 മിനിറ്റായി കുറയ്ക്കാനാകുമെന്ന് ഉത്തർപ്രദേശ് വ്യാവസായിക വികസന മന്ത്രി നന്ദ ഗോപാൽ ഗുപ്ത അറിയിച്ചു. ജെവാർ വിമാനത്താവള മേഖലയിലേക്കും യമുന എക്സ്പ്രസ് വേ കടന്നുപോകുന്ന പ്രദേശത്തേക്കും വേഗത്തിലുള്ള ഗതാഗതം ഉറപ്പാക്കുകയാണ് ഇതിന്റെ പ്രധാന ലക്ഷ്യം.
ഡൽഹി-വാരാണസി അതിവേഗ റെയിൽ പാതയെ വിമാനത്താവള സ്റ്റേഷൻ വഴി ആർആർടിഎസ് പദ്ധതിയുമായി യോജിപ്പിക്കും. ഭാവിയിൽ അതിവേഗ റെയിൽ ഇടനാഴികൾക്കുള്ള ലിങ്കുകളും ഡിപിആറിൽ ഉൾപ്പെടുത്തിയിട്ടുണ്ടെന്ന് ഉദ്യോഗസ്ഥർ വെളിപ്പെടുത്തി. ഇത് ഡൽഹിയുമായുള്ള കണക്റ്റിവിറ്റിക്ക് വലിയ ഗുണം ചെയ്യും.
പിഐസിയുപി ഭവനിൽ യമുന എക്സ്പ്രസ് വേ ഇൻഡസ്ട്രിയൽ ഡെവലപ്മെന്റ് അതോറിറ്റിയുടെ (YEIDA) പദ്ധതികൾ വിലയിരുത്തിയ ശേഷം സംസാരിക്കുകയായിരുന്നു മന്ത്രി. ജെവാർ വിമാനത്താവളത്തിന്റെ ഉദ്ഘാടനത്തിന് ശേഷം യമുന എക്സ്പ്രസ് വേ പ്രദേശങ്ങളൊരു വലിയ കാർഗോ ഹബ്ബായി മാറുമെന്നും അദ്ദേഹം പറഞ്ഞു.
ഉദ്യോഗസ്ഥർ തങ്ങളുടെ പ്രവർത്തന ശൈലി മെച്ചപ്പെടുത്തണമെന്നും കോർപ്പറേറ്റ് രീതിയിലുള്ള സമീപനം സ്വീകരിക്കണമെന്നും മന്ത്രി നിർദ്ദേശിച്ചു. കൂടാതെ, എക്സ്പ്രസ് വേയിലെ കേടായ റോഡുകളുടെ അറ്റകുറ്റപ്പണി വേഗത്തിലാക്കാനും അദ്ദേഹം ആവശ്യപ്പെട്ടു.
ആഗ്ര-ലഖ്നൗ, ബുന്ദേൽഖണ്ഡ്, പൂർവാഞ്ചൽ, ഡൽഹി-മുംബൈ, ഗംഗ എക്സ്പ്രസ് വേകൾ ഉൾപ്പെടെ നിരവധി പ്രധാന അതിവേഗ പാതകളുമായി യമുന എക്സ്പ്രസ് വേയെ ബന്ധിപ്പിക്കുന്നുണ്ട്. ഭൂമി ഏറ്റെടുക്കുന്നതുമായി ബന്ധപ്പെട്ട നഷ്ടപരിഹാരം കർഷകർക്ക് ഓൺലൈനായി വേഗത്തിൽ നൽകാൻ മന്ത്രി ഉദ്യോഗസ്ഥരോട് നിർദ്ദേശിച്ചു. മാപ്പുകളും പ്ലോട്ടുകളുമായി ബന്ധപ്പെട്ട നോ-ഒബ്ജക്ഷൻ സർട്ടിഫിക്കറ്റുകൾക്കായി ഓഫീസുകൾ കയറിയിറങ്ങുന്നത് കുറയ്ക്കാൻ ഒരു സംവിധാനം ഒരുക്കാനും അദ്ദേഹം ആവശ്യപ്പെട്ടു.
പ്ലോട്ടുമായി ബന്ധപ്പെട്ട വിവരങ്ങൾ തത്സമയം ഓൺലൈനിൽ ലഭ്യമാക്കണമെന്നും ഭാവിയിലെ ആവശ്യകതകൾ കണക്കിലെടുത്ത് അതോറിറ്റി ഉദ്യോഗസ്ഥർക്ക് ആർട്ടിഫിഷ്യൽ ഇന്റലിജൻസ് പരിശീലനം നൽകണമെന്നും ഗുപ്ത നിർദ്ദേശിച്ചു.
ഹാഥ്റസിനായി ഒരു മാസ്റ്റർ പ്ലാൻ തയ്യാറാക്കുകയാണെന്നും അവിടെ ഒരു പുതിയ നഗരം വികസിപ്പിക്കുമെന്നും ഉദ്യോഗസ്ഥർ മീറ്റിംഗിൽ അറിയിച്ചു. ഹാഥ്റസിന് ശേഷം യമുന എക്സ്പ്രസ് വേ ആഗ്ര വരെ നീട്ടുമെന്നും ടപ്പാൽ-ബജ്നയിൽ 4,700 ഏക്കറിൽ ഒരു നഗരം വികസിപ്പിക്കാനുള്ള പദ്ധതികൾ പുരോഗമിക്കുകയാണെന്നും അവർ പറഞ്ഞു.
YEIDA മേഖലയിൽ HCL-Foxconn സെമികണ്ടക്ടർ ചിപ്പ് നിർമ്മാണ യൂണിറ്റ്, ഇലക്ട്രോണിക് നിർമ്മാണ ക്ലസ്റ്ററുകൾ, അപ്പാരൽ പാർക്ക്, മെഡിക്കൽ ഡിവൈസ് പാർക്ക്, ടോയ് പാർക്ക്, എംഎസ്എംഇ പാർക്ക്, കരകൗശല പാർക്ക്, ഡാറ്റാ പാർക്ക് തുടങ്ങിയ നിരവധി വ്യവസായ വികസന പ്രവർത്തനങ്ങൾ നടക്കുന്നുണ്ടെന്നും ഉദ്യോഗസ്ഥർ കൂട്ടിച്ചേർത്തു.
Click it and Unblock the Notifications
Sign in with Google