പൂർണമായും ഭൂമിക്കടിയിലൂടെ- ദുബൈയിൽ 3400 കോടിയുടെ മെട്രോ ഗോൾഡ്​ ലൈൻ വരുന്നു; 2032ൽ ഓടിത്തുടങ്ങും

42 കിലോമീറ്റർ മെട്രോ ലൈൻ, അതും പൂർണമായും ഭൂമിക്കടിയിലൂടെ. പൊതുഗതാഗത രംഗത്ത്​ വീണ്ടും കുതിക്കാൻ ഒരുങ്ങുന്ന ​ ദുബൈയുടെ ഗോൾഡ് ലൈൻ മെട്രോയുടെ പ്രത്യേകതയാണിത്. ബ്ലൂ ലൈനിന്​ പിന്നാലെ ദുബൈ മെട്രോയുടെ ഗോൾഡ്​ ലൈൻ കൂടി പ്രഖ്യാപിച്ചിരിക്കുകയാണ്​ യുഎഇ വൈസ്​ പ്രസിഡന്‍റും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം. അൽ ഗുബൈബ മുതൽ ജുമൈറ ഗോൾഡ്​ എസ്​റ്റേറ്റുകൾ വരെ 42 കിലോമീറ്റർ നീളത്തിലാണ്​ പുതിയ മെ​ട്രോ ലൈൻ വരുന്നത്​.

ദുബൈയിലെ ഏറ്റവും വലിയ ഗതാഗത പദ്ധതിയായി വിശേഷിപ്പിക്കുന്ന ഗോൾഡ്​ ലൈൻ മെട്രോ പദ്ധതിയുടെ 23ാം വാർഷികദിനമായ 2032 സെപ്​റ്റംബർ ഒമ്പതിന്​ യാഥാർഥ്യമാക്കാനാണ് തീരുമാനം. ദുബൈയെ ലോകത്തെ ഏറ്റവും മികച്ച നഗരമാക്കി മാറ്റുന്നതിനുള്ള നാഴികക്കല്ലാണ്​ മെട്രോ ഗോൾഡ് ലൈൻ പദ്ധതിയെന്ന്​ ശൈഖ്​ മുഹമ്മദ്​ ചൂണ്ടിക്കാട്ടി.

40 മീറ്റർ താഴ്ചയിൽ പൂർണമായും ഭൂമിക്കടിയിലൂടെ ഈ ലൈനിലൂടെ യാത്ര ചെയ്യാം. നിലവിലെ ദുബൈ മെട്രോ ടണലുകളുടെ രണ്ടിരട്ടി ദൈർഘ്യമുള്ള ടണലാണ് പദ്ധതിക്കായി തയാറാക്കുക. ദൈനംദിന ജീവിതത്തെയും ഗതാഗതത്തെയും നിലവിലെ വികസന പദ്ധതികളെയുമൊന്നും ബാധിക്കാത്ത തരത്തിലുള്ള സാ​ങ്കേതികതയാണ് ടണൽ നിർമാണത്തിനായി ഉപയോഗിക്കുക.

നഗരത്തിലെ തന്ത്രപ്രധാനമായ 15 സ്ഥലങ്ങളിലൂടെയാണ്​ പുതിയ പാത കടന്നുപോകുന്നത്. 3400 കോടി ദിർഹമാണ്​ പദ്ധതിയുടെ ആകെ ചെലവ് കണക്കാക്കുന്നത്​. നിലവിൽ വികസന പ്രവർത്തനങ്ങൾ പുരോഗമിക്കുന്ന നഗരത്തിലെ 55 മേഖലകളുമായി ബന്ധിപ്പിക്കുന്ന രീതിയിലാണ്​ പുതിയ ലൈനിന്‍റെ രൂപകൽപന. ഏതാണ്ട്​ 15 ലക്ഷം താമസക്കാർക്ക്​ പദ്ധതിയുടെ പ്രയോജനം ലഭിക്കുമെന്നാണ് കണക്കാക്കപ്പെടുന്നത്.

സ്റ്റേഷനുകൾ ഏതെല്ലാമാണെന്ന് നിശ്ചയിച്ചിട്ടില്ലെങ്കിലും ബർ ദുബൈ, അൽ ഗുബൈബ, ദുബൈ മാരിടൈം സിറ്റി, പോർട്ട് റാഷിദ്, സിറ്റി ​വോക്ക്, ജുമൈറ, സത്​വ, സബീൽ, ബിസിനസ് ബേ, എംബിആർ സിറ്റി, മെയ്​ദാൻ, റാസൽഖോർ, ദുബൈ ഹിൽസ്, അൽബർഷ സൗത്ത്​, ദുബൈ സ്പോർട്സ് സിറ്റി, ജുമൈറ വില്ലേജ് ട്രയാംഗ്​ൾ, ദുബൈ സ്​പോർട്സ് സിറ്റി, പ്രൊഡക്ഷൻ സിറ്റി, സ്റ്റുഡിയോ സിറ്റി, വാദി അൽ സഫ, ജുമൈറ ഗോൾഫ് എസ്റ്റേറ്റ്സ് തുടങ്ങിയ പ്രധാന സ്ഥലങ്ങളുമായി പാതയെ ബന്ധിപ്പിക്കും.

ദുബൈ റെയിൽ നെറ്റ് വർക്ക്, ഇത്തിഹാദ് റെയിൽ എന്നിവയുമായി സംയോജിപ്പിക്കാനാകുമെന്നതാണ് ​ഗോൾഡ് ലൈനിന്റെ മറ്റൊരു പ്രത്യേകത. ഗ്രീൻ ലൈനുമായി ചേരുന്ന ഇന്റർസെക്ഷൻ അൽ ഗുബൈബയിലും റെഡ് ലൈനുമായ​ുള്ള ഇന്റർചെയ്ഞ്ച് ബിസിനസ് ബേയിലും ഭാവിയിലെ ഇത്തിഹാദ് റെയിൽ പാസഞ്ചർ സ്റ്റേഷനുമായുള്ള ഇന്റർചെയ്ഞ്ച് മെയ്ദാനിലും റെഡ് ലൈനുമായും ഭാവിയിലെ ഇത്തിഹാദ് റെയിൽ പാസഞ്ചർ സ്റ്റേഷനുമായുള്ള ഇന്റർചെയ്ഞ്ച് ജുമൈറ ഗോൾഫ് എസ്റ്റേറ്റ്സിലുമായിരിക്കും.

പദ്ധതി പൂർണമായും പ്രവർത്തനക്ഷമമായാൽ 2040 ആകുമ്പോഴേക്കും പ്രതിദിനം 4,65,000 യാത്രക്കാർക്ക്​ സേവനം നൽകുമെന്നാണ്​ പ്രതീക്ഷ. ടണൽ ബോറിങ്​ സാങ്കേതികവിദ്യ ഉപയോഗിക്കുന്ന പദ്ധതിയിൽ നിലവിലുള്ള മെട്രോ തുരങ്കങ്ങളേക്കാൾ ഇരട്ടി വലിപ്പമുള്ള ഭൂഗർഭ ട്രാക്കാണ്​ ഉപയോഗിക്കുക. 20 വർഷത്തിനുള്ളിൽ 430 ശതമാനം വരുമാനമാണ്​ പ്രതീക്ഷിക്കുന്നത്​.

മെട്രോ ബ്ലൂലൈനിന്‍റെ നിർമാണം അതിവേഗം പുരോഗമിക്കുകയാണ്​. 2029 സെപ്​റ്റംബർ ഒമ്പതിന്​ ബ്ലൂലൈനിന്‍റെ നിർമാണം പൂർത്തിയാക്കുകയാണ്​ ലക്ഷ്യം. 2009 സെപ്​റ്റംബർ ഒമ്പതിനാണ്​ ദുബൈയിൽ ആദ്യ മെട്രോ സ്ഥാപിതമാകുന്നത്​. ഗോൾഡ്​ ലൈൻ യാഥാർഥ്യമാകുന്നതോടെ 2032 സെപ്​റ്റംബർ ഒമ്പതിന്​ ഗതാഗത രംഗത്ത്​ മറ്റൊരു ചരിത്രത്തിന്​ കൂടിയാണ്​ ദുബൈ നഗരം സാക്ഷ്യം വഹിക്കുക.