ദുബായിൽ പെട്ട് കിടക്കുന്നത് ടൺ കണക്കിന് സ്വർണം, അങ്ങോട്ടുമില്ല ഇങ്ങോട്ടുമില്ല, ആർക്കും വേണ്ടേ? എന്താണ് സംഭവം?

ഇറാൻ സംഘർഷം രൂക്ഷമാകുന്ന പശ്ചാത്തലത്തിൽ ദുബായിലേക്കും അവിടെ നിന്നുമുള്ള വിമാനങ്ങൾ വ്യാപകമായി റദ്ദാക്കിയത് സ്വർണ്ണ വ്യാപാരികളെ വലിയ പ്രതിസന്ധിയിലാക്കിയിരിക്കുകയാണ്. ആഗോള സ്വർണ്ണ വിപണിയിലെ ഒരു പ്രധാന കേന്ദ്രമാണ് യുണൈറ്റഡ് അറബ് എമിറേറ്റ്സ്. ഏഷ്യയിലെ വിവിധ രാജ്യങ്ങളിലേക്ക് സ്വർണ്ണം ശുദ്ധീകരിച്ച് കയറ്റുമതി ചെയ്യുന്നതിനൊപ്പം, സ്വിറ്റ്സർലൻഡിൽ നിന്നും ലണ്ടനിൽ നിന്നുമുള്ള ചരക്കുകൾക്കുള്ള ഇടനാഴിയായും യുഎഇ പ്രവർത്തിക്കുന്നു.

യാത്രാവിമാനങ്ങളുടെ ചരക്ക് അറകളിലാണ് സ്വർണ്ണം സാധാരണയായി വ്യാപാര കേന്ദ്രങ്ങൾക്കിടയിൽ കൊണ്ടുപോകുന്നത്. ഒരു തവണത്തെ യാത്രയ്ക്ക് ഒരു ഔൺസിന് ഒരു ഡോളറിൽ താഴെ മാത്രമാണ് ചെലവ് വരാറുള്ളത്. ഇറാനിയൻ മിസൈൽ ആക്രമണങ്ങളുടെ പശ്ചാത്തലത്തിൽ ദുബായ് ഭാഗികമായി വ്യോമപാത അടയ്ക്കുകയും വിമാന സർവീസുകൾ നിർത്തിവയ്ക്കുകയും ചെയ്തു. ഇതോടെ ആകാശമാർഗമുളള സ്വർണം, വെള്ളി കയറ്റുമതി പൂർണമായും തടസ്സപ്പെട്ടിരിക്കുകയാണ്.

നിരവധി വ്യാപാര, ലോജിസ്റ്റിക്സ് സ്ഥാപനങ്ങളുടെ പ്രതിനിധികൾ വ്യക്തമാക്കിയത് ദുബായിലേക്കും തിരിച്ചുമുള്ള തങ്ങളുടെ സ്വർണ്ണ കയറ്റുമതി അനിശ്ചിതമായി നിർത്തിവെച്ചിരിക്കുകയാണെന്നാണ്. ലക്ഷ്യസ്ഥാനങ്ങളിലേക്ക് ദുബായിലൂടെ പോകേണ്ടിയിരുന്ന ചരക്കുകൾ വഴിതിരിച്ചുവിടാൻ തിങ്കളാഴ്ച നെട്ടോട്ടമോടിയെന്നും ഒരു വ്യാപാരി പറഞ്ഞു.

ഉയർന്ന മൂല്യമുള്ള ചരക്കുകൾ കരമാർഗ്ഗം കൊണ്ടുപോകുന്നത് ഏറെ അപകടകരമായതിനാൽ മറ്റ് വിമാനത്താവളങ്ങളിലേക്ക് റോഡ് മാർഗ്ഗം അയയ്ക്കുന്നത് പലപ്പോഴും പ്രായോഗികമല്ലെന്നാണ് പേര് വെളിപ്പെടുത്താൻ ആഗ്രഹിക്കാത്ത ചിലർ പറയുന്നത്. ഇത്തരം ചരക്കുകൾ കരമാർഗ്ഗം കൊണ്ടുപോകുന്നത് വലിയ അപകടസാധ്യതകളാണ് ക്ഷണിച്ചുവരുത്തുന്നത്.

യാത്രാവിമാനങ്ങളിൽ കൊണ്ടുപോകാൻ കഴിയുന്ന സ്വർണ്ണത്തിന്റെ അളവ് ഭാരത്തെ അടിസ്ഥാനമാക്കിയല്ല, മറിച്ച് മൂല്യത്തെ ആശ്രയിച്ചാണ്. കാരണം, ഇൻഷുറൻസ് കമ്പനികൾ ഏതെങ്കിലും ഒരു വിമാനത്തിൽ ഏതാനും ടൺ സ്വർണ്ണത്തിന് മാത്രമേ പരിരക്ഷ നൽകാറുള്ളൂ. ഇത് വിമാനങ്ങളിലൂടെയുള്ള സ്വർണ്ണ നീക്കത്തിന് പരിധി നിശ്ചയിക്കുന്നു.

വിലയേറിയ ലോഹ ലോജിസ്റ്റിക്സ് വ്യവസായത്തിലെ വിദഗ്ദ്ധനും കൺസൾട്ടന്റുമായ ലാർസ് ജോഹാൻസൺ ചൂണ്ടിക്കാട്ടിയത്, കരമാർഗ്ഗം സ്വർണ്ണം കടത്തുന്നത്, പ്രത്യേകിച്ചും അന്താരാഷ്ട്ര അതിർത്തികൾ കടക്കുമ്പോൾ, വ്യോമമാർഗ്ഗം എന്ന സാധാരണ രീതിയെ അപേക്ഷിച്ച് സങ്കീർണ്ണതകൾ സൃഷ്ടിക്കുന്നു എന്നാണ്.

"അപകടസാധ്യത നിയന്ത്രിക്കാൻ വഴികളുണ്ട്," അദ്ദേഹം പറഞ്ഞു. "സാങ്കേതികമായി ഒരു കവചിത ട്രക്കിൽ കൊണ്ടുപോകാൻ കഴിയുന്നത് മൂന്ന് കവചിത ട്രക്കുകളിൽ കൊണ്ടുപോകാം. കൂടാതെ, സായുധ കാവൽക്കാരെയും ഏർപ്പെടുത്താം." എന്നിരുന്നാലും, ഈ പ്രക്രിയ അനുയോജ്യമല്ലെന്നും ആയുധങ്ങളുമായി അതിർത്തി കടക്കുന്നത് എല്ലായ്പ്പോഴും അനുവദനീയമല്ലെന്നും ജോഹാൻസൺ കൂട്ടിച്ചേർത്തു.

ദുബായിലെ ഈ തടസ്സങ്ങൾ താൽക്കാലികമായിരിക്കുമെന്നാണ് പൊതുവെ കരുതുന്നതെങ്കിലും, യുഎഇയിൽ നിന്നുള്ള വിമാനങ്ങൾക്ക് ദീർഘകാലത്തേക്ക് വിലക്കേർപ്പെടുത്തുന്നത് ഇന്ത്യയിലെയും മറ്റ് വിപണികളിലെയും വ്യാപാരികൾക്ക് വലിയ വെല്ലുവിളിയായേക്കാം. ഉൽപ്പന്ന ലഭ്യതയെക്കുറിച്ചുള്ള ആശങ്കകൾ കാരണം സൗദി അറേബ്യയിൽ തിങ്കളാഴ്ച സ്വർണ്ണത്തിന്റെ പ്രീമിയം ഗണ്യമായി വർധിച്ചതായി മെറ്റൽസ് ഫോക്കസ് ലിമിറ്റഡിന്റെ മാനേജിംഗ് ഡയറക്ടർ ഫിലിപ്പ് ന്യൂമാൻ അറിയിച്ചു.

ഫ്ലൈറ്റ്റഡാർ24 നൽകുന്ന വിവരങ്ങൾ അനുസരിച്ച്, ഇറാന്റെ ആദ്യ പ്രത്യാക്രമണത്തിന് ശേഷം ആഗോളതലത്തിൽ 12,300-ലധികം വിമാനങ്ങൾ റദ്ദാക്കിയിട്ടുണ്ട്. ലോകത്തിലെ ഏറ്റവും വലിയ അന്താരാഷ്ട്ര കാരിയറായ എമിറേറ്റ്സ് എയർലൈൻസ് ദുബായിലേക്കും പുറത്തേക്കുമുള്ള ഷെഡ്യൂൾഡ് വിമാനങ്ങളുടെ സർവീസ് ബുധനാഴ്ച രാത്രി വരെ നീട്ടി. എത്തിഹാദ് എയർവേസ് വ്യാഴാഴ്ച വരെയാണ് തങ്ങളുടെ സർവീസുകൾ നിർത്തിവെച്ചത്.