മണിച്ചന്റെ ജാമ്യാപേക്ഷ തള്ളി
കൊല്ലം: കല്ലുവാതുക്കല് മദ്യദുരന്തക്കേസില് ഏഴാം പ്രതിയായ അബ്കാരി കോണ്ട്രാക്ടര് മണിച്ചന്റെ ജാമ്യാപേക്ഷ കോടതി തള്ളി.
കരുനാഗപ്പള്ളിയിലെ അഭിഭാഷകനായ അനില്കുമാര് മുഖേന മണിച്ചന് സമര്പ്പിച്ച ജാമ്യാപേക്ഷ ഡിസംബര് 16 ശനിയാഴ്ചയാണ് പരവൂര് മുന്സീഫ് മജിസ്ട്രേറ്റ് വി.എസ്.ബിന്ദുകുമാരി തള്ളിയത്. ഇതിനോടൊപ്പം ഒമ്പതാം പ്രതി മുഹമ്മദ് ഷാഫി എന്ന ഷാബുവിന്റെ റിമാന്ഡ് ഡിസംബര് 26 ചൊവാഴ്ച വരെ നീട്ടാനും ഉത്തരവായിട്ടുണ്ട്.
പ്രത്യേക അന്വേഷണ സംഘത്തിന്റെ അപേക്ഷയനുസരിച്ച് കേസിലെ അഞ്ചാം പ്രതി മുള്ളുവിള അനില്കുമാറിനെ ഡിസംബര് 21 വ്യാഴാഴ്ച വരെ പൊലീസ് കസ്റഡിയില് വിടാന് മജിസ്ട്രേറ്റ് ഉത്തരവായി. കൊച്ചനിയുടെ ഡ്രൈവറും സഹായിയുമാണ് അനില്കുമാര്.
ഇതിനിടെ മണിച്ചനെ വെള്ളിയാഴ്ച രഹസ്യമായി പൊലീസ് പുനലൂര് കോടതിയില് ഹാജരാക്കി. പട്ടാഴി വിഷമദ്യദുരന്തക്കേസുമായി ബന്ധപ്പെട്ടാണ് മണിച്ചനെ കോടതിയില് കൊണ്ടു വന്നത്. പുനലൂര് ഫസ്റ് ക്ലാസ് മജിസ്ട്രേറ്റ് വി.ഹരിനായര് മണിച്ചനെ ഡിസംബര് 30 ശനിയാഴ്ച വരെ റിമാന്ഡ് ചെയ്തു.