അച്ചടക്ക നടപടി മാധ്യമസൃഷ്ടി: മന്ത്രി

കോഴിക്കോട്: കോണ്‍ഗ്രസില്‍ ഒരു വിഭാഗത്തിനെതിരെ അച്ചടക്ക നടപടിയുണ്ടാവുമെന്ന റിപ്പോര്‍ട്ടുകള്‍ മാധ്യമങ്ങളുടെ ഊഹോപോഹം മാത്രമാണെന്ന് മന്ത്രി ജി. കാര്‍ത്തികേയന്‍ പറഞ്ഞു.

പാര്‍ട്ടിയുടെ നേതൃത്വത്തില്‍ ഒരു മാറ്റവും വരില്ലെന്ന് അദ്ദേഹം വ്യക്തമാക്കി. സപ്തംബര്‍ 26 വെള്ളിയാഴ്ച വാര്‍ത്താ ലേഖകരോട് സംസാരിക്കുകയായിരുന്നു കാര്‍ത്തികേയന്‍.

സി പി എം സ്വപ്നം കാണുന്നതു പോലുള്ള പിളര്‍പ്പ് ഒരിക്കലും കോണ്‍ഗ്രസില്‍ സംഭവിക്കില്ല. എറണാകുളം ഉപതിരഞ്ഞെടുപ്പിന്റെ പശ്ചാത്തലത്തില്‍ കോണ്‍ഗ്രസില്‍ ഗുരുതരമായ പ്രശ്നങ്ങളുണ്ടാവുമെന്ന് സി പി എം സംസ്ഥാന സെക്രട്ടറി പിണറായി വിജയനും പ്രതിപക്ഷ നേതാവ് വി. എസ്. അച്യുതാനന്ദനും സ്വപ്നം കാണുകയാണ്. എന്നാല്‍ ആ സ്വപ്നങ്ങള്‍ ഒരിക്കലും യാഥാര്‍ഥ്യമാവില്ല.

കോണ്‍ഗ്രസില്‍ ചില അഭിപ്രായവ്യത്യാസങ്ങളുണ്ടെന്നത് ശരിതന്നെ. എന്നാല്‍ അതൊരിക്കലും സി പി എം പ്രതീക്ഷിക്കുന്നതു പോലെ പാര്‍ട്ടിയെ ഒരു പിളര്‍പ്പിലേക്ക് നയിക്കില്ല. അഭിപ്രായവ്യത്യാസങ്ങള്‍ പാര്‍ട്ടിയില്‍ നിന്ന് പുറത്താക്കലിലും രാജിയിലും കലാശിക്കുന്നത് സി പി എമ്മിലാണെന്നും കാര്‍ത്തികേയന്‍ ചൂണ്ടിക്കാട്ടി.