ബീഹാറില്‍ ഉപദേഷ്ടാക്കളെ നിയമിക്കാന്‍ നിര്‍ദേശം

മോസ്കോ: ബീഹാറിലെ ഭരണം സുഗമമായി മുന്നോട്ടുപോവുന്നത് ഉറപ്പുവരുത്താന്‍ ഉപദേഷ്ടാക്കളെ ഉടന്‍ നിയമിക്കണമെന്ന് രാഷ്ട്രപതി എ. പി. ജെ. അബ്ദുള്‍ കലാം പ്രധാനമന്ത്രി മന്‍മോഹന്‍സിംഗിനോട് നിര്‍ദേശിച്ചു.

നാല് ദിവസത്തെ സന്ദര്‍ശനത്തിനായി മോസ്കോയിലെത്തിയ കലാമുമായി പ്രധാനമന്ത്രി നടത്തിയ ടെലഫോണ്‍ സംഭാഷണ വേളയിലാണ് ഈ നിര്‍ദേശമുണ്ടായത്. ബീഹാര്‍ നിയമസഭ പിരിച്ചുവിടാനുണ്ടായ സാഹചര്യത്തെ കുറിച്ച് പ്രധാനമന്ത്രി രാഷ്ട്രപതിയെ ധരിപ്പിച്ചു.

സാധാരണക്കാര്‍ക്ക് ഗുണകരമാവുന്ന വിധത്തില്‍ തങ്ങളുടെ മേഖലകളില്‍ വിദഗ്ധരായവരെയായിരിക്കണം ഉപദേഷ്ടാക്കളായി നിയമിക്കേണ്ടതെന്ന് കലാം മന്‍മോഹന്‍സിംഗിനോട് നിര്‍ദേശിച്ചു.