അമേരിക്കയെ സുരക്ഷിതമാക്കി: ബുഷ്

വാഷിങ്‌ടണ്‍: അമേരിക്കയെ കൂടുതല്‍ സുരക്ഷിതമാക്കിയാണ്‌ താന്‍ വിടവാങ്ങുന്നതെന്ന്‌ പ്രസിഡന്റ്‌ ജോര്‍ജ്ജ്‌ ബുഷ്‌. വിടവാങ്ങല്‍ പ്രസംഗത്തിനിടെയാണ്‌ ബുഷ്‌ ഇക്കാര്യം പറഞ്ഞത്‌.

പ്രസിഡന്റ്‌ പദവിയിലിരിക്കെ രാജ്യ താത്‌പര്യങ്ങള്‍ മുന്‍നിര്‍ത്തി ചില കടുത്ത തീരുമാനങ്ങള്‍ കൈക്കൊണ്ടിട്ടുണ്ട്‌. എല്ലാ അമേരിക്കന്‍ പൗരന്‍മാരും ഇത്‌ അംഗീകരിക്കണമെന്നില്ല.

താനെടുത്ത നടപടികളെക്കുറിച്ച്‌ ഒട്ടേറെ ചര്‍ച്ചകള്‍ നടന്നു. എന്നാല്‍ അതിന്റെ ഫലങ്ങളെക്കുറിച്ച്‌ ചര്‍ച്ചകള്‍ നടന്നിട്ടില്ല. കഴിഞ്ഞ ഏഴു വര്‍ഷത്തിനിടെ അമേരിക്കയില്‍ ഒറ്റ ഭീകരാക്രമണം പോലും ഉണ്ടായിട്ടില്ലെന്ന്‌ ബുഷ്‌ ചൂണ്ടിക്കാട്ടി.

മനസാക്ഷിക്കനുസരിച്ചാണ്‌ താന്‍ പ്രവര്‍ത്തിച്ചത്‌. നന്മയെ അംഗീകരിക്കുകയും തിന്മയെ എതിര്‍ക്കുകയും ചെയ്‌തിട്ടുണ്ട്‌. രാജ്യത്ത്‌ തീവ്രവാദ ഭീഷണി ഇപ്പോഴും നിലനില്‌ക്കുന്നുണ്ട്‌. തീവ്രവാദികള്‍ തക്കം പാര്‍ത്തിരിയ്‌ക്കുകയാണ്‌. എന്നാല്‍ ഏഴു വര്‍ഷം മുമ്പുണ്ടായിരുന്നതിനേക്കാള്‍ രാജ്യം സുരക്ഷിതമാണ്‌.

പുതിയ പ്രസിഡന്റ്‌ ബറാക്‌ ഒബാമയ്‌ക്കും അദ്ദേഹത്തിന്റെ കുടുംബത്തിനും എല്ലാവിധി ആശംസകളും നേരുന്നു- ബുഷ്‌ പറഞ്ഞു.