ലാവലിന്‍: നിര്‍ണായക മന്ത്രിസഭ ബുധനാഴ്‌ച

തിരുവനന്തപുരം: എസ്‌എന്‍സി ലാവലിന്‍ കേസില്‍ സിപിഎം സംസ്ഥാന സെക്രട്ടറി പിണരായി വിജയനെ പ്രോസിക്യൂട്ട്‌ ചെയ്യാന്‍ അനുമതി നല്‍കേണ്ടെന്ന അഡ്വക്കേറ്റ്‌ ജനറലിന്റെ റിപ്പോര്‍ട്ടില്‍ മന്ത്രിസഭ ബുധനാഴ്‌ച തീരുമാനമെടുക്കും.

ഇക്കാര്യത്തില്‍ മന്ത്രിസഭയ്‌ക്ക്‌ നിര്‍ദ്ദേശമൊന്നും നല്‍കിയിട്ടില്ലെന്നാണ്‌ സിപിഎം പറയുന്നത്‌. എന്നാല്‍ ഏതാനും ദിവസം മുമ്പ്‌ ചേര്‍ന്ന സംസ്ഥാന സെക്രട്ടേറിയറ്റ്‌ യോഗത്തില്‍ എജിയുടെ നിയമോപദേശം സ്വീകരിക്കാനായിരുന്നു തീരുമാനം. ഇതുതന്നെയായിരിക്കും മന്ത്രിസഭയുടെ തീരുമാനവുമെന്നാണ്‌ കരുതുന്നത്‌.

ആരോഗ്യപ്രശ്‌നങ്ങളെത്തുടര്‍ന്ന്‌ കോഴിക്കോട്ട്‌ ആശുപത്രിയില്‍ കഴിയുകയായിരുന്ന ചീഫ്‌ സെക്രട്ടറി കെജെ മാത്യു മന്ത്രിസഭായഗോത്തിനായി ചൊവ്വാഴ്‌ച രാവിലെ തലസ്ഥാനത്തെത്തും.

പിണറായിയെ പ്രോസിക്യൂട്ട്‌ ചെയ്യേണ്ടതില്ലെന്ന നിര്‍ദ്ദേശം എല്‍ഡിഎഫിലെ മറ്റു ഘടകകക്ഷികളും അംഗീകരിക്കുമെന്നാണ്‌ അറിയുന്നത്‌. ഇക്കാര്യത്തില്‍ സിപിഎമ്മിലെ ഔദ്യോഗികപക്ഷത്തിന്റെ അപ്രീതി സമ്പാദിക്കേണ്ടെന്നാണ്‌ ഘടകകക്ഷികളുടെ നിലപാട്‌.

കേസില്‍ എജിയുടെ നിയമോപദേശം മന്ത്രിസഭ ചര്‍ച്ച ചെയ്യുന്നതിന്‌ മുമ്പായി പ്രതിപക്ഷ നേതാക്കള്‍ക്ക്‌ മുഖ്യമന്ത്രിയെ നേരിട്ട്‌ കണ്ട്‌ അഭിപ്രായം അറിയിക്കാന്‍ അവസരം നല്‍കണമെന്ന്‌ വിഎസിന്‌ അയച്ച കത്തില്‍ പ്രതിപക്ഷ നേതാവ്‌ ഉമ്മന്‍ ചാണ്ടി ആവശ്യപ്പെട്ടിട്ടുണ്ട്‌.

പിണറായിയെ പ്രോസിക്യൂട്ട്‌ ചെയ്യേണ്ടെന്ന നിലപാടാണ്‌ മന്ത്രിസഭ കൈക്കൊള്ളുന്നതെങ്കില്‍ സംസ്ഥാന വ്യാപകമായി യുഡിഎഫ്‌ പ്രക്ഷോഭപരിപാടികള്‍ നടത്തുമെന്ന്‌ സൂചനയുണ്ട്‌.