മലയാളി ഭീകരരെ ബോംബ് നിര്മിക്കാന് പരിശീലിപ്പിച്ചു
കൊച്ചി: കോഴിക്കോട് സ്ഫോടനക്കേസിലെ പ്രതി മുഹമ്മദ് ആലിമിനെ 14 ദിവസത്തേക്ക് കൂടി കോടതി റിമാന്ഡ് ചെയ്തു. റിമാന്ഡ് കാലാവധി അവസാനിച്ചതിനേ തുടര്ന്നാണ് അന്വേഷണസംഘം ആലിമിനെ കോടതിയില് ഹാജരാക്കിയത്.
കോഴിക്കോട് ഇരട്ട സ്ഫോടനക്കേസില് രണ്ടു പേരെകൂടി അന്വേഷണസംഘം പ്രതിപട്ടികയില് ഉള്പ്പെടുത്തിയിട്ടുണ്ട്. മലപ്പുറം സ്വദേശി ഷമ്മി ഫിറോസ്, കാശ്മീരില് സുരക്ഷാസേനയുടെ വെടിയേറ്റു മരിച്ച മുഹമ്മദ് ഫായീസ് എന്നിവരെ കൂടിയാണ് പട്ടികയില് ഉള്പ്പെടുത്തിയത്. ആലിമിന്റെ പുതിയ വെളിപ്പെടുത്തലുകളെ തുടര്ന്നാണ് നടപടി.
കശ്മീരില് കൊല്ലപ്പെട്ട മലയാളി തീവ്രവാദികള്ക്ക് ബോംബ് നിര്മ്മാണത്തില് പരിശീലനം നല്കിയതായി ചോദ്യം ചെയ്യലില് ആലിം വെളിപ്പെടുത്തിയിരുന്നു. റഹിം, ഫായിസ് എന്നിവര്ക്ക് ബോംബ് നിര്മ്മിയ്ക്കുന്നതിനായി പരിശീലനം നല്കിയിട്ടുണ്ടെന്നാണ് ആലിം പോലീസിന് മൊഴി നല്കിയത്.
പാനൂരിലെ അസറിന്റെ വീട്ടിലും ഓഫീസിലുമായി ക്ലാസുകളെടുത്തിട്ടുണ്ടെന്നും ഇവിടെ വച്ച് പരിശീലനം സംഘടിപ്പിച്ചുവെന്നുമാണ് ആലിം സമ്മതിച്ചിരിയ്ക്കുന്നത്. ഇതോടെ കോഴിക്കോട് ഇരട്ട സ്ഫോടനത്തില് പ്രതി അബ്ദുല് ആമിന്റെ പങ്ക് പൂര്ണമായി വ്യക്തമാകുന്ന തെളിവുകളാണ് അന്വേഷണ സംഘത്തിന് ലഭിച്ചിരിയ്ക്കുകയാണ്.