മിഗിനെ വ്യോമസേന ഒഴിവാക്കുന്നു

ദില്ലി: മിഗ് 21 വിമാനങ്ങള്‍ വ്യോമസേനയില്‍നിന്ന് ഒഴിവാക്കുന്നതിനുള്ള നടപടികള്‍ ആരംഭിച്ചതായി കേന്ദ്ര പ്രതിരോധമന്ത്രി എകെ ആന്റണി ലോക്‌സഭയെ അറിയിച്ചു.

ഉപയോഗിക്കാവുന്നതിന്റെ പരമാവധി കാലം പിന്നിട്ടതിനാലാണ് ഇവ ഒഴിവാക്കാന്‍ സര്‍ക്കാര്‍ തീരുമാനിച്ചരിക്കുന്നത്. 30-40 വര്‍ഷമാണ് ഒരു വിമാനത്തിന്റെ ആയുസ്. മാര്‍ച്ചില്‍ ഹൈദരാബാദിലെ ബീഗംപേട്ടില്‍ കിരണ്‍ വിമാനം വ്യോമാഭ്യാസത്തിനിടെ തകരാനിടയായ സംഭവത്തെക്കുറിച്ചുള്ള വിമര്‍ശനങ്ങള്‍ ആന്റണി തള്ളി.

ഏകദേശം 200 മിഗ് വിമാനങ്ങളാണ് വ്യോമസേനയുടെ ഭാഗമായി തുടരുന്നത്. ഇതില്‍ 121 എണ്ണം അപ്‌ഗ്രേഡ് ചെയ്തിരുന്നു. ഈ വിമാനങ്ങള്‍ 2017 വരെ ഉപയോഗിക്കാനാവും. ബാക്കിയുള്ള എണ്‍പതോളം വിമാനങ്ങള്‍ അടുത്ത രണ്ട്-മൂന്ന് വര്‍ഷത്തിനുള്ളില്‍ ഒഴിവാക്കാനാണ് തീരുമാനം. സമീപകാലത്തായി ഒട്ടേറെ മിഗ് വിമാനങ്ങള്‍ തകര്‍ന്ന് വീണിരുന്നു.

അതേ സമയം 1985ല്‍ സേനയുടെ ഭാഗമായ കിരണ്‍ വിമാനങ്ങള്‍ ഇരുപത്തഞ്ചുവര്‍ഷത്തിനുള്ളില്‍ മൂന്നുതവണ മാത്രമാണ് അപകടമുണ്ടാക്കിയതെന്നും ഓരോ അപകടവും തക്കതായ ഗൗരവത്തില്‍തന്നെയാണു സര്‍ക്കാര്‍ കാണുന്നതെന്നും ആന്റണി പറഞ്ഞു.