സ്കൂളില് ദളിത് പാചകക്കാര് വേണ്ടെന്ന് സവര്ണര്
ദില്ലി: സ്കൂളിലെ പാചകക്കാര് ദളിത് വിഭാഗക്കാരായതില് പ്രതിഷേധിച്ച് രക്ഷിതാക്കള് മക്കളെ സ്കൂളിലയ്ക്കാന് മടിയ്ക്കുന്നു.
ദളിത് വനിത മുഖ്യമന്ത്രിസ്ഥാനത്തിരിക്കുന്ന ഉത്തര് പ്രദേശിലെ ഒരു സ്കൂളിലാണ് സംഭവം റിപ്പോര്ട്ട് ചെയ്തിരിക്കുന്നത്. കനൗജ് ജില്ലയിലെ സര്ക്കാര് സ്കൂളിലാണ് ദളിത് പാചക്കാരെ നിയമിച്ചതിനെതിരെ രക്ഷിതാക്കള് ശീതസമരം നടത്തുന്നത്.
ദളിതര് പാകംചെയ്ത ഭക്ഷണം തങ്ങളുടെ മക്കള്ക്ക് കൊടുക്കാന് പറ്റില്ലെന്ന് പറഞ്ഞാണ് സവര്ണവിഭാഗത്തില്പ്പെട്ട രക്ഷിതാക്കള് കുട്ടികളെ സ്കൂളില് വിടാതിരിക്കുന്നത്.
സംസ്ഥാനത്ത് നിലനില്ക്കുന്ന ജ്യാതി വ്യവസ്ഥയെ ഇല്ലായ്മ ചെയ്യുകയെന്ന ഉദ്ദേശത്തോടെ മായാവതി സര്ക്കാര് നടപ്പിലാക്കിയ പദ്ധതികളുടെ ഭാഗമായാണ് സ്കൂളുകളില് ഉച്ചഭക്ഷണം പാകം ചെയ്യാന് ദളിത് വിഭാഗക്കാരെ നിയമിച്ചത്.
ഇരുപത്തിയഞ്ച്് കുട്ടികള് മാത്രമുള്ള സ്കൂളുകളില് ഒരു ദളിത് സ്ത്രീയെയാണ് പാചകക്കാരിയായി നിയമിച്ചത്. നൂറോളം വിദ്യാര്ഥികളുള്ള സ്കൂളുകളില് ഒരു ദളിത് സ്ത്രീയെയും ദളിത് വിഭാഗത്തിന് പുറത്തുള്ള ഒരാളെയുമാണ് പാചക ജോലികള്ക്കായി നിയമിച്ചിരിക്കുന്നത്.
എന്നാല് കനൗജില് നിന്നുള്ള റിപ്പോര്ട്ടുകള് സൂചിപ്പിക്കുന്നത് മായാവതി സര്ക്കാറിന്റെ ഈ പദ്ധതി പ്രശ്നങ്ങള് നേരിടുകയാണെന്നാണ്. കാണ്പൂര്, അലഹബാദ്, തുടങ്ങിയ സ്ഥലങ്ങിലും ഇതിന്റെ പേരില് രക്ഷിതാക്കള് ഇടയുന്നതായി റിപ്പോര്ട്ടുകളുണ്ട്.