3 വയസ്സുകാരിയെ ബലി കൊടുത്ത ദന്പതികള് പിടിയില്
മംഗലാപുരം: ദുര്മന്ത്രവാദത്തിന്റെ പേരില് മൂന്നു വയസുകാരിയെ ബലികൊടുത്ത ദമ്പതികളെ പൊലീസ് അറസ്റ്റ് ചെയ്തു. കര്ണാടകയിലെ യെയ്യാഡിക്കടുത്ത് ശര്ബത്കട്ടെയിലാണ് സംഭവം.
ബിഹാറി ദമ്പതികളായ കിരണ് കുമാര് ഝായുടെയും അഞ്ജലിയുടെയും മകള് പ്രിയങ്കയാണ് അന്ധവിശ്വാസത്തിന് ഇരയായി ദാരുണമായി കൊല്ലപ്പെട്ടത്.
ഇവരുടെ അയല്വാസികളായ കമലാക്ഷ, ഭാര്യ വിമല എന്നിവര് കുട്ടിയെ ബലി കൊടുത്തതായി സമ്മതിച്ചിട്ടുണ്ട്. കുട്ടിയെ വിമലയാണ് തട്ടിക്കൊണ്ടുപോന്നത്. കുടുംബത്തിന്റെ ഐശ്വര്യത്തിനായി പൂജാരിയുടെ നിര്ദേശപ്രകാരമാണ് കുട്ടിയെ കൊലപ്പെടുത്തിയതെന്ന് ഇവര് പൊലീസിനോട് പറഞ്ഞു. കെപിടി അങ്കണവാടി വിദ്യാര്ഥിനിയായ പ്രിയങ്കയെ വ്യാഴാഴ്ച ഉച്ചയോടെ വീട്ടില്നിന്ന് ആരും കാണാതെ സ്നേഹം നടിച്ച് ചന്ദ്രകല കൊണ്ടുപോയി ഹോമകുണ്ഡത്തിനടുത്തെ പലകയില് കിടത്തി. ഇരുവരും ചേര്ന്ന് കഴുത്ത് ഞെരിച്ച് അടുത്തുള്ള തോട്ടത്തില് തള്ളുകയായിരുന്നു.
കുട്ടിയെ അന്വേഷിച്ചിറങ്ങിയ രക്ഷിതാക്കളും നാട്ടുകാരും തെരച്ചില് നടത്തിയെങ്കിലും കണ്ടെത്താനായില്ല. വെള്ളിയാഴ്ച രാവിലെ കദ്രി പൊലീസ് ചന്ദ്രലേഖയെ ചോദ്യം ചെയ്തപ്പോഴാണ് സംഭവം വെളിപ്പെട്ടത്. പൊലീസ് ചോദ്യം ചെയ്യലില് ആദ്യമൊന്നും കുറ്റം സ്മ്മതിയ്ക്കാന് ഇവര് തയാറായിരുന്നില്ല.
കുട്ടിയുടെ മരണത്തെത്തുടര്ന്ന് രോഷാകുലരായ നാട്ടുകാര് പ്രതികളുടെ വീട് അടിച്ചുതകര്ത്തു. ജനക്കൂട്ടത്തെ ലാത്തിച്ചാര്ജ് നടത്തിയാണ് പൊലീസ് പിരിച്ചുവിട്ടത്.