കന്യാസ്ത്രീയുടെ മരണം; പൊലീസുകാരനെ ചോദ്യംചെയ്തു

തിരുവനന്തപുരം: പൂങ്കുളത്ത് കന്യാസ്ത്രീയെ ജലസംഭരണിയ്ക്കുള്ളില്‍ മരിച്ച നിലയില്‍ കണ്ടെത്തിയ ദിവസം കോണ്‍വന്റില്‍ നിന്നും പുലര്‍ച്ചെ ഇറങ്ങിപ്പോയ പോലീസുകാരനെ ചോദ്യം ചെയ്തു. വിഴിഞ്ഞം സി.ഐയുടെ നേതൃത്വത്തിലായിരുന്നു ചോദ്യം ചെയ്യല്‍. ഇക്കാര്യം വെളിപ്പെടുത്തിയ മൂന്ന് ദൃക്‌സാക്ഷികളുടെയും മൊഴിയെടുത്തിട്ടുണ്ട്. പൊലീസുകാരനെ രണ്ടാംവട്ടവും ചോദ്യം ചെയ്തുകൊണ്ടിരിക്കുകയാണ്.

കോവളത്തിനടുത്ത് പൂങ്കുളത്തെ ഫാത്തിമ മാതാപള്ളി കോണ്‍വെന്റിലെ വാട്ടര്‍ ടാങ്കിലാണ് സിസ്റ്റര്‍ മേരി ആന്‍സിയെ മരിച്ച നിലയില്‍ കണ്ടെത്തിയത്. സംഭവം നടന്ന ദിവസം പുലര്‍ച്ചെ രണ്ടുപേര്‍ കോണ്‍വെന്റില്‍ നിന്ന് പുറത്തുപോകുന്നത് കണ്ടതായി കോണ്‍വെന്റിന് സമീപമുള്ള ഒരു ചായക്കടക്കാരനും മറ്റുരണ്ടുപേരും മൊഴി നല്‍കിയിരുന്നു.

മൃതദേഹം കണ്ടതായി റിപ്പോര്‍ട്ട് ചെയ്യപ്പെട്ട സമയത്തിന് രണ്ട് മണിക്കൂര്‍ മുമ്പാണിത്. പുറത്തിറങ്ങിയ രണ്ടുപേരും പോലീസുകാരാണെന്നും വെളിപ്പെട്ടിരുന്നു.

കോണ്‍വെന്റിലെ അന്തേവാസികളായ ഒമ്പത് കന്യാസ്ത്രീകളില്‍ മുതിര്‍ന്ന രണ്ടു പേരില്‍ ഒരാളായിരുന്നു സിസ്റ്റര്‍ മേരി ആന്‍സി. സിസ്റ്ററിന്റെ മരണത്തില്‍ ദുരൂഹതയുണ്ടെന്ന് നാട്ടുകാര്‍ നേരത്തെ ആരോപിച്ചിരുന്നു.

English summary

The police team investigating the mysterious death of Sister Mary Ancy interrogated a police man in Kovalam in connection with the case.