പിടിയിലായ സ്വാമിയുടെ കയ്യില് 22വിഗ്രഹങ്ങള്
സ്വര്ണത്തിലും പഞ്ചലോഹത്തിലും നിര്മ്മിച്ച 22 വിഗ്രഹങ്ങള്, അമൂല്യമായ രത്നങ്ങള് പതിച്ച 234 ഇനം ആഭരണങ്ങള്, ആയിരം കിലോ വെള്ളി എന്നിവയുമായാണ് രാഘവേന്ദ്ര തീര്ഥ ഒഴിവില്ക്കഴിഞ്ഞിരുന്നത്. ഗൗഡ സാരത്വത ബ്രാഹ്മണ സഭ ഏരെ പവിത്രമായിക്കണ്ട് പൂജിക്കുന്നവയാണ് ഈ വിഗ്രഹങ്ങളും ആഭരണങ്ങളുമെല്ലാം.
അഞ്ഞൂറിലേറെ വര്ഷം പഴക്കം കണക്കാക്കുന്ന ഇവയുടെ യഥാര്ത്ഥ മൂല്യം കണക്കാക്കാനായിട്ടില്ല. കോടിക്കണക്കിന് രൂപ വിലമതിക്കുമെന്നാണ് നിഗമനം. കഴിഞ്ഞ മാര്ച്ച് മുതലാണ് രാഘവേന്ദ്ര തീര്ത്ഥ ഒളിവില് പോയത്. എളമക്കര പുതുക്കലവട്ടത്തുള്ള ദ്വാരക ആശ്രമത്തില് നിന്നും ഒളിവില് പോകുമ്പോള് രാഘവേന്ദ്ര തീര്ത്ഥ ഈ വിഗ്രഹങ്ങളും സ്വര്ണവുമെല്ലാം കയ്യിലെടുത്തിരുന്നു.
വിഗ്രഹങ്ങളും ആഭരണങ്ങളും കണ്ടെത്തുന്നതിനായി പോലീസ് സംഘം ഒട്ടേറെ തവണ രാഘവേന്ദ്ര തീര്ത്ഥയുടെ കൊച്ചിയിലെ വീടും ആശ്രമവുമെല്ലാം പരിശോധിച്ചിരുന്നു. എറണാകുളം ജില്ലാ കോടതിയുടെ അനുമതിയോടെയായിരുന്നു ഈ പരിശോധന. പക്ഷേ കേസില് ഉള്പ്പെട്ട വസ്തുവകകള് ഒന്നും അന്ന് കണ്ടെത്താനായിരുന്നില്ല.
കാശി മഠാധിപതി ശ്രീ സുധീന്ദ്ര തീര്ത്ഥ സ്വാമിയ്ക്ക് പരമ്പരാഗതമായി കൈമാറി കിട്ടിയവയാണ് ഈ വിഗ്രഹങ്ങളും ആഭരണവുമെല്ലാം. ഗൗഡ സാരസ്വതരുടെ ഏറ്റവും പ്രധാന ദേവനായ വ്യാസ രഘുപതിയുടേതുള്പ്പെടെയുള്ള വിഗ്രഹങ്ങള് ഇക്കൂട്ടത്തിലുണ്ട്. ശ്രീരാമചന്ദ്രന്, നരസിംഹസ്വാമി, ഹനുമാന്, ശ്രീകൃഷ്ണന്, മഹാലക്ഷ്മി, വിഠോബന് എന്നിവയെല്ലാം വിഗ്രഹങ്ങളില് ഉള്പ്പെടുന്നു.